«ТIуапсэ» ТIуапсэ — «Зэкъошныгъ» Мыекъуапэ – 1:2 (0:0). Iоныгъом и 14-м ТIуапсэ щызэдешIагъэх.

«Зэкъошныгъ»: Ковалев, Хьагъур, Подковыров, Такълый, ХъуакIо, Ещенко, Букия (А. Делэкъу, 80), Къонэ (Манченко, 85), Крылов (Власов, 90), Бабенко (Андрейченко, 70), Антоненко (Юсуфов, 50).

«Зэкъошныгъэм» иешIакIохэу къэлапчъэм Iэгуаор дэзыдзагъэ­хэр: Къонэ — 50 (пенальтикIэ), Ещенко — 90.

ЕшIапIэм изытет ущытхъуным Iофыр пэчыжь. КIуачIэр на­хьышIоу зыгъэфедэрэм иIэпэIэсэныгъэ къыгъэлъэгъоныр амалышIухэм зэу ащыщыгъ. «Зэ­къошныгъэм» икапитанэу Къонэ Амир ыпэкIэ илъи, ухъумакIохэр къызэринэкIыхэу фежьагъ. А уахътэм «ТIуапсэм» иешIа­кIохэм ащыщ шапхъэр ыукъуи, А. Къо­нэр къызэтыригъэуцуагъ. Судьям ыгъэнэфэгъэ пенальтир тикапитан дэгъоу ыгъэцэкIагъ, къэлапчъэм Iэгуаор дидзагъ.

ТIуапсэ иешIакIохэри бэрэ апэкIэ къылъыкIуатэщтыгъэх. КъэлэпчъэIутэу Ковалевыр, тиухъумакIохэр агъэгумэкIыщтыгъэх.

«Зэкъошныгъэм» итренер шъхьа­Iэу Ешыгоо Сэфэрбый зэри­лъытэрэмкIэ, ешIакIохэм ащыщ­хэр зэрэзэблихъугъэхэм шIуагъэ къыхьыгъ. Пчъагъэр 1:1-у зэрэщытым «Зэкъошныгъэр» езэгъы­нэу фэягъэп. ЗэкIэ тиешIакIохэр апэкIэ илъыхэуи уахътэ къыхэ­кIыгъ. ЗэIукIэгъум иаужырэ та­къикъ О. Ещенкэм ухъумакIохэр ыгъэплъэхъухи, Iэгуаом лъы­чъагъ, хъагъэм ридзэнэу игъо ифагъ.

Адыгеим икомандэ зэхъокIыныгъэхэр фэхъухэзэ, иешIакIэ лъэхъу. Зыпкъ итэу хэгъэгум изэнэкъокъу хэлэжьэным фэшI уахътэ ищыкIагъ.

Олег Ещенкэм Iоныгъом и 6-м аужырэ такъикъым «Интер» икъэ­лапчъэ Iэгуаор дидзагъ. Iоныгъом и 14-м «ТIуапсэм» икъэлапчъэ Iэгуаор зыдедзэм, я 90-рэ та­къикъыр кIощтыгъэ. ТекIоныгъэм икъыдэхын гуетыныгъэ фыриIэу О. Ещенкэр зэрешIэрэм пае тыфэраз, игъэхъагъэхэм ахигъэ­хъонэу фэтэIо. Опсэу, Олег!

Я 6-рэ зэIукIэгъухэр

«Анжи» — «Ессентуки» — 3:0, «Динамо» — «Кубань-Холдинг» — 1:2, «Интер» — СКА – 1:4, «Кубань» — «Легион» — 0:2, «Махачкала» — «Краснодар-3» — 4:2, «Мэщыкъу» — «Форте» — 1:1, «Спартак» — «Биолог» — 2:0.

Зэгъэпшэнхэр

1. «Кубань-Холдинг» — 13 2. «Анжи» — 13 3. «Кубань» — 12 4. СКА – 12 5. «Легион» — 12 6. «Форте» — 10 7. «Мэщыкъу» — 10 8. «Черноморец» — 10 9. «Динамо» — 10 10. «Зэкъошныгъ» — 7 11. «Спартак» — 7 12. «Махачкала» — 7 13. «Краснодар-3» — 7 14. «Интер» — 4 15. «Биолог» — 3 16. «Ессентуки» — 0 17. «ТIуапсэ» — 0.

Iоныгъом и 20-м «Зэкъошныгъэр» «Мэщыкъу» Пятигорск Мыекъуапэ щыIукIэщт.