Миранчук зэшхэу Алексейрэ Антонрэ футбо­лым щыцIэрыIох. Спортыр зышIогъэшIэгъонхэм ялъэIухэр къыдэтлъытэхэзэ, зэфэхьысыжьхэр тшIыгъэх.

ГущыIэгъу тызыфэхъугъэхэм янахьыбэхэм Миранчук зэшхэр Москва къыщыхъугъэхэу алъытэ. IорыIотэ къэбархэм ахэр ядэIу­хэзэ, шъыпкъэм пэчыжьэ хъугъэ. Гъунэгъу Краснодар краим зэшхэр зэрэщапIугъэхэр къыдэтлъы­тэхи, ящыIакIэ тыкъытегущыIэнэу итхъухьагъ.

Славянск-на-Кубани щыщых

Зэшхэр 1995-рэ илъэсым чъэ­пыогъум и 17-м Краснодар краим икъалэу Славянск-на-Кубани къыщыхъугъэх. ЯкIэлэцIыкIугъом къыщыублагъэу футбол клубэу «Олимпым» зыщагъасэзэ, яIэпэIэсэныгъэ хагъахъо­щтыгъ. Тренерэу Александр Во­ронковыр япащэу зэнэкъокъухэм ахэлажьэщтыгъэх.

Агу етыгъэу футбол ешIэхэрэ зэшхэр командэ цIэрыIохэм янэплъэгъу итыгъэх.

«Спартак» Москва аштагъэхэп

«Спартак» итренерхэу Борис Стрельцовымрэ Алексей Леоновымрэ сэнаущыгъэ зыхэлъхэу кIэ­­лэцIыкIу-ныбжьыкIэ командэхэм ащешIэхэрэм алъыплъэ­щты­гъэх. Нэбгыри 5 къызыхахым, Ми­ранчук зэшхэр купым хэфагъэх.

КIалэхэр «Спартак» иакадемие аштагъэх. «Спартак» ишъуашэ ащыгъэу хэгъэгу ыкIи дунэе зэ­IукIэгъухэм Миранчукхэр ахэла­жьэщтыгъэх, ау командэ цIэ­рыIом аштагъэхэп.

Тренерхэм зэралъытагъэмкIэ, Миранчукхэм яфизическэ ухьазырыныгъэ ыгъэрэзагъэхэп.

Москва хэку къэралыгъо университетым физкультурэмкIэ ифакультет 2019-рэ илъэсым зэшхэм къаухыгъ. «Локомотив» Москва аштагъэх, тренерэу Сергей Полстояновыр ныбжьыкIэхэм япэщагъ.

2013-рэ илъэсым мэлылъфэгъум и 20-м Алексей Миранчук хэгъэгум изэнэкъокъоу апшъэрэ купым щыкIорэм апэрэу ще­шIагъ. «Локомотив» «Кубань» Краснодар дешIагъ. «Амкар» ыкIи «Локомотив» жъоныгъуакIэм и 5-м зызэIокIэхэм, Алексей Миранчук къэлапчъэм Iэгуаор апэ­рэу дидзагъ.

Гъэхъагъэхэр

«Локомотив» хэтэу А. Миранчук 2017-рэ илъэсым Урысыем апэрэ чIыпIэр къыщыдихыгъ. Урысыем и Кубок гъогогъуи 3 «Локомотив» къыхьыгъ. Хэгъэгум изэнэкъокъу тыжьыныр ыкIи джэрзыр къыщыфагъэшъошагъэх.

2015-рэ илъэсым Урысыем иныбжьыкIэхэмкIэ ешIэкIо анахь дэгъоу къыхахыгъ.

Алексей Миранчук Урысыем футболымкIэ ихэшыпыкIыгъэ командэ хэт. Дунаим изэнэ­къокъоу 2018-рэ илъэсым тихэгъэгу щыкIуагъэм хэлэжьагъ.

«Аталантэ» рагъэблэгъагъ

Италием икомандэу «Аталан­тэм» Алексей Миранчук 2020-рэ илъэсым шышъхьэIум и 30-м аштагъ. Евро миллион 14,5-кIэ лъэныкъохэр зэзэгъыгъэх.

Алексей Миранчук Италием кIоным ыпэкIэ зэхахьэм къыщи­Iуагъ «Локомотив» ипащэхэм, ешIакIохэм, футболыр зышIогъэшIэгъонхэм зэрафэразэр.

Миранчук зэшхэм лъэшэу агъэ­лъапIэ тренер цIэрыIоу Юрий Семиныр. Ащ Iоф дашIэзэ, яIэпэIэсэныгъэ хагъэхъуагъ.

Юрий Семиныр Москва икоман­дэхэм ямызакъоу, «Кубань» Краснодар щешIагъ. Александр Плошник игъусэу къэлап­чъэм Iэгуаор дадзэнымкIэ шIыкIэу къагъотыщтыгъэхэр футболым бэшIагъэу пылъхэм ащы­гъупшэрэп.

Европэм ифутбол Алексей Ми­ранчук щешIэ шIоигъу. Славянск-на-Кубани шIукIэ ыгу къегъэкIыжьы.

Антон Миранчук «Локомотив», Урысыем ихэшыпыкIыгъэ командэ ащешIэ. Ащи Европэм ифутбол ыцIэ щыраIощтэу тэгугъэ.

Миранчук зэшхэр спортышхом илъэгапIэхэм алъыIэсынхэу, ягу­хэлъышIухэр къадэхъунхэу афэтэIо.