«Зэкъошныгъ» Мыекъуапэ – «Интер» Щэрджэскъал – 3:3. Iоныгъом и 6-м Адыгэ республикэ стадионым щызэдешIагъэх.

«Зэкъошныгъ»: Гиголаев, Хъуа­кIо (Власов, 70), Хьагъур, Ещенко, Подковыров, Каракоз, Къонэ, Крылов (А. Делэкъу, 80), Андрейченко, Бабенко, Букия (Манченко, 85).

Къэлапчъэм Iэгуаор дэзы­дзагъэхэр: Крылов – 7, 1:0, Ещенко – 27, икъэлапчъэ ди­дзэжьыгъ – 1:1, Бостанов – 66, 1:2, Къонэ – 69, 2:2, Бостанов – 86, 2:3, Ещенко – 90, 3:3.

Лъэшэу къызэрещхырэм зэнэкъокъур къыгъэхьылъагъ. «Зэкъошныгъэр» нахь шъабэу зэрешIэщтым фэхьазырыгъ.

— КIуачIэхэр ощхым зэфэдэ ышIыгъэх. ЕшIакIохэм гупшыса­гъэ ахэлъэу Iэгуаор зэратыжьыным пылъыгъэх, ау ощхым ар къадигъэхъугъэп. ЕшIапIэм псыр итэу зэхэщэн Iофыгъохэр гъэцэкIэ­гъуаех, — къытиIуагъ «Зэкъошныгъэм» итренер шъхьаIэу Ешыгоо Сэфэрбый.

Денис Крыловым я 7-рэ та­къикъым «Интер» икъэлапчъэ Iэгуаор дидзагъ. «Зэкъошныгъэм» пчъагъэм хигъахъо шIоигъоу амалхэм алъыхъущтыгъ.

ОшIэ-дэмышIэу Олег Ещенкэм тикъэлапчъэ Iэгуаор зыдедзэм, зэIукIэгъур нахь хьылъэ хъугъэ. Каракозэ шапхъэхэр зеукъохэм, судьям ар къыфигъэгъугъэп, ешIапIэм ригъэкIыгъ. ЗэIукIэгъум ия 2-рэ едзыгъо «Зэкъошныгъэр» ипчъагъэкIэ нахь макIэ хъугъэу ешIагъ.

«Интер» иешIакIоу Бостановым «Зэкъошныгъэм» икъэлапчъэ гъогогъуитIо Iэгуаор дидзагъ. А уахътэм тиешIакIохэм ягуетыныгъэ къырагъэIыхыгъэп. «Зэкъошныгъэм» икапитанэу Къонэ Амир ухъумакIохэр ыгъэплъэхъухи, хъагъэм Iэгуаор дидзагъ.

ЕшIэгъу уахътэр аухыгъэу судьям къафыхигъэхъогъэ та­къикъхэр кIощтыгъэх. «Зэкъошныгъэр» ыпэкIэ илъыгъэу пчъагъэр зэрихъокIы шIоигъуагъ. «Интер» ухъумэн Iофыгъохэр ыгъэцакIэхэзэ, Олег Ещенкэм ешIакIохэр икъоу лъыплъагъэхэп. ЯтIонэрэ Iэгуаор О. Ещенкэм хъагъэм дидзэгъэ къодыеу ешIэгъур аухыгъ. О. Ещенкэм «зы­къищэфыжьыгъ», тэри тигъэгу­шIуагъ.

Я 5-рэ ешIэгъухэр

«Биолог» — «Черноморец» — 0:1, «Ессентуки» — «Спартак» — 2:3, «Кубань-Холдинг» — «Анжи» — 1:2, «Легион» — Махачкала – 1:1, СКА — «Кубань» — 3:2, «Форте» — «ТIуапсэ» — 6:0.

ЧIыпIэхэм тызэпяплъы

1. «Кубань» — 12 2. «Кубань-Холдинг» — 10 3. «Черноморец» — 10 4. «Форте» — 9 5. «Мэщыкъу» — 9 6. СКА – 9 7. «Легион» — 9 8. «Анжи» — 7 9. «Краснодар-3» — 7 10. «Динамо» — 7 11. «Зэкъошныгъ» — 4 12. «Спартак» — 4 13. «Махачкала» — 4 14. «Интер» — 4 15. «Биолог» — 3 16. «ТIуапсэ» — 0 17. «Ессентуки» — 0. Iоныгъом и 13-м я 6-рэ ешIэгъухэр яIэщтых. «Зэкъошныгъэр» ТIуапсэ щыIукIэщт чIыпIэ командэу «ТIуапсэм».