«Ставрополье-2» Ставрополь – «Адыиф-2» Мые­къуапэ – 23:21 (10:11). Iоныгъом и 5-м Ставрополь щызэдешIагъэх.

Апшъэрэ купым хэт гандбол командэхэм 2020 – 2021-рэ илъэс ешIэгъур рагъэжьагъ. «Адыиф-2-м» итренер шъхьаIэу, Урысыем изаслуженнэ тренерэу Александр Реввэ апэрэ ешIэгъуи­тIур Ставрополь зэрэщыкIуагъэм тыщигъэгъозагъ.

ТиешIакIохэу къэлапчъэм Iэгуаор анахьыбэрэ дэзыдзагъэхэр: Куцевалова Ангелина – 5, Кожубекова Юлия – 3, Суворова Ксения – 3, Логвиненко Валерия – 2, Морозова Софа – 2, Кучеренко Мария – 2.

ЗэIукIэгъум иапэрэ едзыгъо 11:10-у «Адыиф-2-м» къыхьыгъ. Ставрополь иешIакIохэм зэнэкъо­къум икIэух яIэпэIэсэныгъэ нахьышIоу къыщагъэлъэгъуагъ.

ЯтIонэрэ зэIукIэгъур

«Ставрополье-2» — «Адыиф-2» — 24:24 (14:10). Iоныгъом и 6-м ешIагъэх.

«Адыиф-2-м» къыхэщыгъэхэр: А. Куцевалова – 8, С. Морозова – 4, Ю. Кожубекова – 3. Е. Толмачевар къэлэпчъэIутэу ешIагъ.

«Адыиф-2-р» текIоныгъэм нахь пэблэгъагъ. ТиешIакIохэр яза­къоу къэлэпчъэIутым гъогогъуи 3 екIугъэх, ау хъагъэм Iэгуаор радзагъэп. Метри 7 тазыр дзыгъохэр загъэцакIэхэм гъогогъуитIо къэлапчъэм Iэгуаор дадзэн алъэкIыгъэп.

Арэу щытми, типшъашъэхэм аужырэ такъикъхэм ешIэкIэ дэгъу къагъэлъэгъуагъэу Александр Реввэ елъытэ.

Пчъагъэр 23:24-у «Ставрополье-2-м» зэIукIэгъур ыхьызэ, «Адыиф-2-р» ыпэкIэ илъыгъ. Зы нэгъэупIэпIэгъу нахь къэмына­гъэу Ангелина Куцеваловар ухъумакIохэм ябэнызэ хъагъэм Iэгуа­ор ридзагъ, пчъагъэр 24:24-у зэнэкъокъур аухыгъ.

Апшъэрэ купым командэ 18 хэт, купитIоу ахэр гощыгъэх. «Къыблэм» щешIэхэрэм зэIукIэгъу тIурытIу яIагъ.

ЧIыпIэхэр

1. «Ставрополье-2» — 3 2. «Динамо-3» — 3 3. «Динамо-2» — 2 4. «Ростов-Дон-2» — 2 5. «Адыиф-2» — 1 6. «Ростов-Дон-3» — 1 7. «Астраханочка-2» — 0 8. «Кубань-2» — 0 9. «Кубань-3» — 0.

Апэрэ чIыпIи 4-р къыдэзыхырэ командэхэр медальхэм афэбэнэщтых.

Iоныгъом и 19 – 20-м «Адыиф-2-р» Астрахань щыIукIэщт «Астраханочка-2-м». «Адыиф-2-м» анахь дэгъоу щешIэхэрэр суперлигэм хэт «Адыифым» аштэщтых.