Мыл спорт Унэшхоу «Ошъутенэр» Мыекъуапэ къыщызэIуахыгъ.

Iоныгъом и 6-р Адыгэ Республикэм имызакъоу, Урысые Федерацием испорт итарихъ шIукIэ къыхэнэжьыщт.

Федеральнэ программэу «Спортыр — щыIэныгъэм ишапхъ» зыфиIорэм Адыгэ Респуб­ликэр хэлажьэ. Мыл Унэшхоу «Ошъутенэр» зы илъэсым къы­кIоцI Мыекъуапэ щагъэпсыгъ.

Спорт Унэшхом икъызэIухын фэгъэхьыгъэ зэхахьэр гъэшIэгъонэу зэхащагъ. Iофтхьабзэм Урысыем и Правительствэ икъулыкъушIэхэр, Адыгеим иIэшъхьэтетхэр хэлэжьагъэх.

Лентэр зэпаупкIы

Урысыем спортымкIэ иминистрэу Олег Матыцинымрэ Адыгэ Республикэм и ЛIышъхьэу КъумпIыл Муратрэ зэхахьэм хэлажьэхэрэм къафэгушIуагъэх. Лентэ плъыжьыр зэпаупкIи, мыл Унэшхом ипчъэхэр къызэIуахыгъэх, «шъукъеблагъ» аIуагъ.

КъафэгушIуагъэх

Урысые Федерацием спортымкIэ иминистрэу Олег Матыциныр пчэгум итэу зэхахьэм хэлажьэхэрэм къафэгушIуагъ. Спортыр зэрэгъэшIэгъоныр, физкультурэмрэ спортымрэ псауныгъэр зэрагъэпытэрэр, «Ошъутенэр» зэтегъэпсыхьа­гъэу зэрэщытыр ащ хигъэунэфыкIыгъэх. Спорт псэолъакIэ иIэ зэрэхъугъэм фэшI Адыгэ Рес­публикэм къыфэгушIуагъ.

Республикэм и ЛIышъхьэу КъумпIыл Мурат спорт Унэшхоу «Ошъутенэм» мэхьэнэ ин ритыгъ. Федеральнэ программэу «Спортыр — щыIэныгъэм ишапхъ» зыфиIоу хэгъэгум щыкIорэм шъолъырхэр чанэу хэлажьэх. Адыгеир ары зэкIэми апэу спорт псэуалъэр программэм диштэу зыщагъэпсыгъэр.

— Урысыем и Правительствэ, спортымкIэ министрэу Олег Матыциным тафэраз, «тхьашъуегъэпсэу» ясIожьы сшIоигъу, ахэр чанэу Iэпы­Iэгъу къытфэхъугъэх, — къы­Iуагъ КъумпIыл Мурат.

Мыл спортымкIэ Адыгеим апэрэ Унэшхор къызэрэщызэ­Iуахырэм фэгъэхьыгъэ зэхахьэм къыщыгущыIагъ полицием икъу­лыкъушIэхэм я Дунэе ассоциацие икъутамэу Урысыем щызэхащагъэм ипрезидентэу Юрий Ждановыр.

Хоккей щешIэнхэу спорт псэуалъэ Адыгеим иIэ зэрэ­хъу­гъэр IофшIэгъэ дэгъукIэ ылъытагъ Юрий Ждановым. Адыгэ Республикэм бэнэкIо цIэрыIохэр щагъэсагъэх, медальхэр зэнэ­къокъухэм къащахьыгъ. Хоккеир республикэм щыпсэухэрэм нахь ашIогъэшIэгъон хъущтэу Ю. Ждановым ылъытагъ.

Полицием икъулыкъушIэхэм я Дунэе къутамэ хэгъэгу 63-рэ хэт. Мыекъуапэ спорт Унэшхор къызэрэщызэIуахырэм фэшI ныбджэгъу ешIэгъоу щызэхащагъэм хоккеим щыцIэрыIохэр хэтых. ЧIыпIэ плъырхэм дзэ къулыкъур ащызыхьыгъэхэр, медальхэр, орденхэр къызыфагъэшъошагъэхэр, спортым пы­лъ­хэр командэхэм зэраще­шIэхэрэр Ю. Ждановым зэхахьэм къыщиIуагъ.

Хоккеир зышIогъэшIэгъонхэм я Ассоциациеу Урысыем щызэхащагъэм ипрезидентэу Алина Бородаевар, Адыгеим физкультурэмкIэ ыкIи спортымкIэ икъу­лыкъушIэхэр зэхахьэм хэлэжьагъэх.

Апэрэ ешIэгъур

Полицием икъулыкъушIэхэм я Дунэе ассоциацие и Урысые къутамэ икомандэрэ Адыгэ Республикэм хоккеимкIэ ихэшыпыкIыгъэ командэрэ ешIапIэм къырагъэблэгъагъэх.

Олег Матыциныр, КъумпIыл Мурат, Алина Бородаевар, Юрий Ждановыр, нэмыкIхэри ешIапIэм ипчэгу къихьэхи, зэнэкъокъум хэлэжьэщтхэм къафэгушIуагъэх, шайбэу зэрешIэщтхэр къара­тыгъ, мылым зэIукIэгъур щырагъэжьагъ.

Хоккеир зыгу рихьыхэрэм яхэшыпыкIыгъэ командэу Адыгеим щызэхащагъэм анахьыкIэу ахэтыр Шъхьэлэхъо Тимур. Гъэ­шIэгъоныр полицием икъулыкъушIэхэм якомандэ зэIукIэгъур 1:0-у ыхьызэ, Шъхьэлэхъо Тимур ухъумакIор къызэринэкIи, къэлапчъэм шайбэр зэрэдидзагъэр ары. Спортсмен ныбжьыкIэр Адыгеим хоккеимкIэ итарихъ хэхьагъ.

Полицием икъулыкъушIэхэм ныбджэгъу ешIэгъум пчъагъэр 6:5-у текIоныгъэр къыщыдахыгъ.

Анахь дэгъоу ешIагъэхэм, зэIу­кIэгъум къащыхэщыгъэхэм шIухьафтынхэр аратыжьыгъэх.

Мыекъуапэ къыщыхъугъэ Никита Кучеровыр хоккей ешIэнымкIэ дунаим щыцIэрыIу. Ащ фэдэ спортсменхэр тикъалэ щагъэсэнхэмкIэ джы амалышIу­хэр тиIэх.

Мыл Унэшхор

2019-рэ илъэсым Урысыем спортымкIэ и Министерствэрэ Адыгеим и Правительствэрэ зэзэгъыныгъэ зэдашIи, спорт Унэшхом тефэщт ахъщэр къа­лъы­тагъ. Сомэ миллион 262-рэ пэIуагъэхьагъ.

«Ошъутенэм» хоккей щешIэщтых, лъэрычъэхэм атетхэу зэнэкъокъухэр къашъохэмкIэ зэхащэщтых, искусствэм фэгъэ­хьыгъэ спорт лъэпкъхэм ныбжьыкIэхэр адагъэсэщтых. ЦIыфхэм япсауныгъэ игъэпытэн Iофыгъо шъхьаIэхэм ахалъытэ.

Залым тIысыпIэ 301-рэ, спорт­сменхэм зызыщафэпэщтхэр, судьяхэм афагъэнэфэгъэ чIыпIэхэр, шхапIэр, кIуачIэр зыщапсыхьэрэ спорт псэуалъэ­хэр, нэмыкIхэри хэтых. ЯтIонэрэ къатыр дахэу ашIыгъ, гуIэтыпIэу щыт, IофшIапIэхэр зэтегъэпсы­хьагъэх.

ЕплъыкIэхэр

Урысыем и Къэралыгъо Думэ идепутатэу, дунаим самбэмкIэ гъогогъу 11 дышъэр къыщызыхьыгъэ Хьасанэкъо Мурат зэхахьэм къыщытиIуагъ спорт псэуалъэм пIуныгъэ мэхьанэ зэрэритырэр. НыбжьыкIэхэр спортым, шэн-зекIуакIэхэм афэгъэсэгъэнхэмкIэ «Ошъутенэр» щысэ зытырахырэ спорт Унэ­шхоу тиIэщт.

Псауныгъэр зыщагъэпытэрэ, лъэныкъуабэмэ афэгъэзэгъэ физкультурнэ зэхэт Унэшхоу «Ошъутенэм» ипащэу Осмэн Альберт спорт псэуалъэм игъэ­псын хэлэжьагъэхэм лъэшэу афэраз. IофшIэныр зэрэзэхищэщтым ехьылIэгъэ унашъохэр ыгъэцакIэхэу ригъэжьагъ.

Псэуалъэм ыпашъхьэ транспорт зэфэшъхьафхэм апае уцупIэхэр щагъэпсыгъэх. Еджа­пIэхэм зэпхыныгъэ адыряIэу спорт лъэпкъхэм ныбжьыкIэхэр афагъэсэщтых, хоккей командэ 2021-рэ илъэсым зэхащэщт.

«Ошъутенэм» баскетбол, гандбол, волейбол щешIэх, хоккеир къахэхъуагъ, лъэрычъэ спортыми зиушъомбгъущт.

ЕмтIылъ Нурбый.