ЦIыф дэгъур ары дунаим ылъапсэр (Теуцожь Цыгъу)
Гум дэхабэ щыбырсыры хъумэ къиIотыкIыгъуае мэхъу. ЕгъэжьапIэри къыхэхыгъуай. Джащ фэд непэрэ мафэри. ШышъхьэIум и 15, 2020-рэ илъэс.
Сикъоджэ кIасэу Гъобэкъуае анахь ыгъэлъэпIэрэ мафэмэ ащыщ. Тыгъэм инэбзыйхэр шIэтхэу, жьы мэкIэ тIэкIуи къыкIэпщэу мэфэ дах. Игъэхъагъэ осэшхо зэрэфашIырэм ишыхьатэу адыгэ лъэпкъым иашуг цIэрыIоу Теуцожь Цыгъо имузей къоджэ гузэгум щагъэкIэрэкIагъ. Ар къызыхъугъэр илъэси 165-рэ хъугъэ. Чэу шIыхьагъэм быракъ дахэхэр щэбыбатэх. Тижъырэ щыIакIэ угу къагъэкIы. Адыгэмэ унэй шIыхьаф ашIымэ, унакIэм ышъхьэ басымэ быракъхэр хагъанэщтыгъэх, ахэр мэкъэгъэIугъэх, зылъэгъурэр унэим къакIощтыгъэ. ЗикIалэ къэзыщэрэми иунашъхьэ быракъыр пагъанэщтыгъ, къэзыщагъэм иныбджэгъу зикъэмыщэми е игъунэгъуми, е чылэм щыщми зикъэщэгъу къэсыгъэу алъытэрэм а быракъыр фахьыщтыгъ.
Музеим къыгуагъэуцогъэ адыгэ щагум къамылышъхьэ унэр дэт. Ижъырэ щыIакIэм ухещэ. ГущыIэ лъапIэу «шъукъеблагъ» зыфиIорэр хьарыф дахэхэмкIэ къэлэпчъэ шъхьагъым тетхагъ.
Узэреблагъэу, гъэлъэгъон шыгъэу «Сэ сылIэми — сиорэдхэр щыIэщтых» уапашъхьэ къеуцо. Баеу зэгъэфагъэ, гъэкIэрэкIагъэ мэкIаир. Цыгъо ыусыгъэхэр зыдэт тхылъ зэфэшъхьафхэр зэготых. ТхакIохэм Цыгъо игъэхъагъэ осэшхо зэрафашIырэр къэзыушыхьатырэ тхыгъэхэм ар къагъэбаи. Сыдэу дэгъубэ, дэхабэ щыIа тыбзэ ибаигъэ къырипIотыкIынэу, рыптхынэу. МэкIаир къэзыушъагъэр тхылъеджапIэм иIофышIэу Уджыхъу Сусан.
Ащ къыгот къэгъэлъэгъоным адыгэ унагъом щагъэфедэщтыгъэ Iэмэ-псымэхэр: ныжъ кIасэмэ хьалыгъур зыщапшэщтыгъэр, тхъу гъожьыбзэр зыщаутэщтыгъэ тхъуалъэр, къуаер зэрэрахыщтыгъэ бжъалъэр, лы щыпсыр, пIастэр зыщыпIоркIыщтыгъэ щыуанхэр, псыхьамбэщэу псы щэлъитIур зыщыкъаргъощтыгъэр, дэшхом, дэжъыем хэшIыкIыгъэ пкъыгъо зэфэшъхьафхэр. Мыхэр къэзгъэхьазырыгъэр культурэм и Унэ хэт музеим ипащэу Тхьэркъохъо Хъарет.
Сабыймэ ашIыгъэ сурэт зэфэшъхьафхэми щагур къагъэбаигъ.
Къамылышъхьэ унэ цIыкIоу дэтым уихьэмэ, адыгэ шъуашэхэр ащыгъхэу пшъэшъэ дэхэ цIыкIуитIу Iэнэ лъэкъуищым кIэлъырысых, машхэх. Унэм идэпкъыхэр гъэкIэрэкIагъэх сабыймэ ашIыгъэ пкъыгъо зэфэшъхьафхэмкIэ. Нэр пIэпахэу адыгэ шъуашэхэр, нэнэжъхэр жъоркъ мафэм жьы зызэрэфеожьыщтыгъэхэр, бзылъфыгъэ пэIо зэфэшъхьафхэр.
Пкъыгъо пэпчъ якъыхэхыкIэ, зэрагъэфедэщтыгъэ шIыкIэр къеIуатэ кIэлэегъаджэу Iэшъынэ МыIуминат.
Музеим ипчъи, икъэлапчъи зэIухыгъэх. Щагум узэрэдахьэу уижьабгъу лъэныкъокIэ пхъэм хэшIыкIыгъэ псынэ дахэ щыт. Ащ угу къегъэкIых Цыгъо игущыIэхэр: «Орэд зэхэлъхьаныр пхъэ псынэм фэд: дэгъоу зэгъэкIугъэу зэтелъхьэгъэ пхъэмэ зы нэмыIэми къахэплъэшъумэ зэщэкъо. Джащ фэдэх орэд сатырхэри. Зы гущыIи, зы мэкъэ лыий хэзэгъэщтэп, къыщыкIэми зэщыкъощт. Орэдыус шъыпкъэм цIыфхэм ягууз ежьыми игууз:
— Саужы къикIырэм орэд чэф къыIощт, Чъыгышхохэри ащ къыгъэкIыщт.
СэмэгубгъумкIэ чъыг лъэгэ бырабэхэр щышъхьэлъагъэх. Ахэм къагот исаугъэти.
Тиадыгабзэ идэхагъэ, гум нэсэу иIэшIугъэ зэхыуагъашIэ непэрэ зэIукIэгъум изещакIомэ. Заслуженнэ артистэу Тхьэркъохъо Теуцожь адыгабзэр зэригъэIорышIэрэм уехъуапсэ. Шъуашэу щыгъыр къешIэкIыгъэу, Iэпэ-Iасэу къызэрэрихьакIырэм ижъырэ адыгэлI хэшыпыкIыгъэу Цыгъо иусэмэ ахэтыр нэм къыкIегъэуцо. Гъусэгъу кIэракIи иI Iэшъынэ (Теуцожь) Нэфсэт.
Непэ агъэлъэпIэрэ хьакI АР-м культурэмкIэ иминистрэ игуадзэу ШъэуапцIэкъо Аминэт Теуцожь ыпхъур.
ЗиIофшIэн хьалэлэу зыгъэцакIэу, Цыгъо итворчествэ шIу язгъэлъэгъоу, имузей ибаиныгъэ, идэхагъэ зэлъашIэным, сабыймэ шIу алъэгъуным дэлажьэрэ музеим ипащэу Тхьэркъохъо Юрэ медалэу «Теуцожь Цыгъу» зыфиIорэр къыфагъэшъошагъ.
Юрэ иIофшIакIэ щыщ пычыгъу. Музеим икъэлапчъэ узэрэIухьэу нэгушIоу, хьалэлэу къыппэгъокIы. Пкъыгъо зэфэшъхьафэу музеим чIэлъхэм яхэгъэхъон, экскурсиехэм язэхэщэн Iоф дешIэ. Музеим къеблагъэрэ пэпчъ ижъырэ лъэхъэнэ чыжьэ дэдэм къыщегъэжьагъэу непэрэ мафэм нэсэу лъэпкъым игушъхьэлэжьыгъэ культурэ изехьакIоу ахэр зэрэщытхэр агурегъаIо.
Теуцожь Цыгъо итворчестви ищыIэныгъэ гъогуи куоу зэришIэрэр хэолъэгъукIы. Музеим узэрэчIахьэу Цыгъо иунэжъ цIыкIу, ищагу зэрэщытыгъэм техыгъэ макет щыт, дэпкъым исурэт пылъагъ. Зыщыусэщтыгъэм ыкIоцI техыгъэ зы унэ хэхыгъи чIэт. УзIэпищэу Юрэ къеIуатэ Цыгъо ищыIэкIагъэр. КъыIуатэрэм къекIоу ащ ытхыгъэмэ ащыщхэр къыдеIох:
— А жьыбгъ! Бэрэ угу хэзгъэкIыгъ. Бгъэнышъхьэр къэпIэт зэпытыщтыгъэшъ, ЧIэплъхьагъэ щыIэмэ чIэхыжь. Унэжъыр осэтыжьыпэ:
ЯтIонэрэ дэпкъым кIэрытэу Юрэ къеIуатэ: «Цыгъо къызэхъум пщы-оркъ заор загъэхьазырыщтыгъэ охътагъ. ИцIыкIугъом щегъэжьагъэу мэкъумэщышIэхэмрэ пщы-оркъхэмрэ язэпыйныгъэ щыгъозагъ. ГъэпщылIакIохэр алъэгъу хъущтыгъэхэп, шъхьафитныгъэм фэбанэщтыгъэх. Ахэм яжъалымагъэ Цыгъо къащыриIотыкIыгъ поэмэхэу «Пщы-оркъ зау», «Мафэкъо Урысбый», «Родинэр». Мы дэпкъым пылъэгъэ сурэтхэр зышIыгъэр художник цIэрыIоу Къат Теуцожь. Сыдэу тыбай дэд! Ти Цыгъо — поэт хэхыгъ, шъошIэ Iэзагъ, шыкIэпщынэуагъ».
КъыкIэлъыкIорэ унэм ит мэкIаймэ Хэгъэгу зэошхоу блэкIыгъэм (1941 — 1945-рэ илъэсхэр) псэемыблэжьэу щызэуагъэхэм яIахьылхэу къэнагъэхэм къафатхыгъэ письмэхэр, ясурэтхэр ащыолъэгъу.
Колхозэу Лениным ыцIэ зыхьыщтыгъэм щыпэрытыгъэхэм ясурэтхэри дэпкъым пылъагъэх.
— Къэшъо орэд дахэхэр, пхъэкIычэ жъынч мэкъамэр икIэсагъэх Цыгъо,— еIо Юрэ. — Илъэс тIокI ыныбжьэу ащ ишыкIэпщынэуакIэ зэлъашIагъ, агъэлъэпIагъ.
«Укъызщыхъугъэм нахь чIыпIэшIу улъымыхъоу дэгъоу лажьи, унагъо ухъущт», — ыIощтыгъэ Цыгъо. Юрэ иунагъо ащ фэд. Ишъхьэгъусэу Хъарет культурэм и Унэ хэт музеим ипащ.
Хъарет IофшIэнэу хихыгъэм хьалэлэу фэлажьэ, ыIапэ зынэмысырэ пкъыгъо музеим чIэлъэп. Iэдэбныгъэшхо хэлъ, игулъытэ чаны.
Япшъашъэу Аминэти гъэхъэгъэшIухэр иIэх. Мыекъопэ къэралыгъо технологическэ университетыр диплом плъыжькIэ къыухыгъ. Аминэт иныбжьыкIагъэ, идэхагъэ нэм къыкIегъэуцо Къат Теуцожь исурэтэу «Пщыщ» зыфиIорэм, Цыгъо игущыIэхэри угу къеIукIых:
— Нэпкъы тамэм къыдэкIэу, Пшъэшъэ ныбжьыкIэ алъэгъу. ИIуплъэ пщэпэ маз, Бзылъфыгъэ къабзэшъ, нэр пIэпех, Хы шIуцIэ къаргъор ынитIу, Ышъхьац цэцакIэу гъэщыгъ, Бгы псыгъо-пкъышIоу ищыгъ.
— Си Гъобэкъуае щысэтехыпIэу, дэгъоу еджагъэу, шъыпкъагъэ хэлъэу, лIыбланэу, щыIэныгъэм чIыпIэ гъэнэфагъэ щызыубытыгъэу къыдэкIыгъэр бэ. Цыгъо зэращыгугъыгъэу къычIэкIыжьыгъэх,— еIо Юрэ.
Ахэр ежь Цыгъо зыпылъыгъэ Iофыр лъызгъэкIотагъэхэу Iэшъынэ Хьазрэт, Къат Теуцожь, ГъукIэлI Нурбый, Тхьэркъохъо Теуцожь, Iэшъынэ Юныс, Теуцожь Гъэзэуат, Бэрэтэрэ ТIалий, Теуцожь Рай, СтIашъу Юр.
МэфэкIым фэгъэхьыгъэ зэнэкъокъум нахь къащыхэщыгъэхэм дипломхэр ыкIи шIухьафтын цIыкIухэр аратыгъэх.
Гъобэкъое къоджэ псэупIэм ипащэу Теуцожь Бислъан район администрацием ыцIэкIэ адыгабзэмкIэ кIэлэегъаджэхэм щытхъу тхылъхэр аритыжьыгъэх.
Цушъхьэ (Уджыхъу) Гощэхъурай.
Си Гъобэкъуай
Сыдэу удаха, си Гъобэкъуай! Сыдэу убая, сичылэ кIас! ПэсшIын темыт мы дунаим. Тыдэ сыщыIэми усигъусэн. Си Пщыщэ инэпкъ кIэракIэ Пцелы дэхабэ щыIушъэшъагъ, ПсынэкIэчъ къаргъохэр дэупэбжьагъ. МыжъокIэ жъгъэеу ритэкъуахьагъэр ГукIэ зэпэсэплъыхьэ сигъатхъэу. УкъибыжъукIэу, тхъурбэр къыпIузэу, Нэпкъыр къыIуутэу, Уехьыжьагъэу, зиптэкъухьэу Бэри къыхэкIыгъ… Бзэ пшIыкIутIу сIулъыгъэми Уищытхъу арысIотэни. Сыдэу убая, си Гъобэкъуай! Зыбзэ псыхьагъэу Теуцожь Цыгъу, Зисурэт семыплъэкIырэр Къат Теуцожь, Семызэщэу кIэсыджыкIыжьрэр Iэшъынэ Хьазрэт, ГъукIэлI Нурбый. УилэжьэкIо хьалэлхэр Къысфэпчъынэп, къысфэтхынэп. Сыдэу убая, сичылэ гупс! Сыпсэм уфэдэу, си Гъобэкъуай.