Матвей Сафоновыр тищысэшIу
Урысыем футболымкIэ иныбжьыкIэ хэшыпыкIыгъэ командэ Европэм ипэшIорыгъэшъ зэIукIэгъухэм ахэлажьэ.
Урысыер – Болгариер – 2:0.
Къэлапчъэм Iэгуаор дэзыдзагъэхэр: Глушенков – 1, Дивеев – 65.
Джырэ уахътэ пэшIорыгъэшъ зэIукIэгъухэр купхэм ащэкIох. Апэрэ чIыпIэхэр къыдэзыхыхэрэр Европэм икIэух зэнэкъокъу занкIэу хэхьащтых. Урысыер Болгарием, Польшэм, фэшъхьафхэм апэ ишъыгъ, купым текIоны- гъэр къыщыдихыным пэблагъэ хъугъэ.
Хэгъэгум иныбжьыкIэ хэшыпыкIыгъэ командэ щешIэхэрэм ащыщых Краснодар икомандэ щапIугъэхэ М. Сулеймановыр, И. Игнатьевыр, А. Голубевыр, М. Сафоновыр.
ЗыцIэ къетIуагъэхэм Матвей Сафоновыр нахь къахэдгъэщы тшIоигъу, ар къэлэпчъэIут. Матвей ятэ Мыекъопэ баскетбол командэу «Динамо- МГТУ-м» щешIэщтыгъ. СССР-м спортымкIэ имастерэу Сергей Золотцевым къызэриIотэжьэу, Матвей икIэлэцIыкIугъом къыщегъэжьагъэу футболым пыщагъ, къэлэпчъэIутэу зигъасэ шIоигъуагъ.
Илъэс 21-рэ зыныбжь Матвей Сафоновыр клубэу «Краснодар» икъэлэпчъэIут, апшъэрэ купым щыкIорэ хэгъэгу зэнэкъокъум хэлажьэ, спортым щыцIэрыIохэр къыщэтхъух.
Адыгеим щапIугъэ кIалэхэр нахьыбэ хъухэу Мыекъопэ «Зэкъошныгъэм» аштэхэу 2020-рэ илъэсым рагъэжьагъ, ащ тегъэгушIо. Республикэм икIэлэцIыкIу-ныбжьыкIэ спорт еджапIэхэм ащагъэсагъэхэр «Зэкъошныгъэм», хэгъэгум икомандэ цIэрыIохэм ащешIэхэу нахьыбэрэ тлъэгъухэ тшIоигъу. ТиIэх сэнаущыгъэ зыхэлъ кIэлэцIыкIу- хэр, ныбжьыкIэхэр. Миранчук зэшхэр Краснодар краим щыщых, Европэм цIэрыIо щыхъугъэх. Адыгеим щапIугъэхэри дунаим щызэлъашIэнхэ алъэкIыщтхэу тэгугъэ.
Урысыем ихэшыпыкIыгъэ ныбжьыкIэ командэ Iоныгъом и 8-м Польшэм иешIакIохэм аIукIэщт. ТекIоныгъэр тиныбжьыкIэхэм къызыдахыкIэ, Европэм икIэух зэнэкъокъу хэлэжьэнхэу фитыныгъэ яIэщт.
Сурэтым итыр: Матвей Сафоновыр.