Урысыер – Сербиер – 3:1. Iоныгъом и 3-м Москва щызэдешIагъэх. ТиешIакIохэу къэлапчъэм Iэгуаор дэзыдзагъэхэр: Дзюба – тIогъогогъо, Караваев.

Урысыем футболымкIэ ихэшыпыкIыгъэ командэ итренер шъхьа­Iэу Станислав Черчесовым изэфэхьысыжьхэм къащыхигъэщыгъ тиешIакIохэр шIыкIэшIухэм алъыхъухэзэ, гуетыныгъэ ахэ­лъэу текIоныгъэм зэрэфэкIуагъэхэр. Зэпахырэ узым къыхэкIэу футбо­лыр зышIогъэшIэгъонхэр стадионым дагъэхьагъэхэп. Арэу щытми, спортым пыщагъэхэм ягуфэбэныгъэ тиешIакIохэм алъыIэсы­гъэу С. Черчесовым ылъытагъ.

ЗэIукIэгъум нэбгырабэ еплъы зыхъукIэ, зэнэкъокъур нахь гъэшIэгъонэу стадионым щэкIо. Ащ фэдэ мэфэ гушIуагъохэр шIэхэу къытэкIущтхэу тэгугъэ.

Европэм ихэгъэгухэм яхэшыпыкIыгъэ командэхэр куп хэхыгъэхэм ахэтхэу пэшIорыгъэшъ зэIукIэгъухэм ахэлэжьагъэх.

КIэуххэр

Исландиер – Англиер – 0:1, Даниер – Бельгиер – 0:2, Португалиер – Хорватиер – 4:1, Швециер – Франциер – 0:1, Азербайджан – Люксембург – 1:2, Македониер – Армениер – 2:1, Эстониер – Грузиер – 0:1.

К. Рональдо ешIагъэп

Македониемрэ Португалиемрэ ары ныIэп ястадионхэм текIоныгъэр къащызыхьыгъэр.

ЕшIэкIо цIэрыIоу К. Рональдо Португалием икомандэ хэтэу зэнэкъокъум хэлэжьэн ылъэкIыгъэп. Бжьэр ылъакъо къызэ­рецэкъагъэм къыхэкIэу зэIукIэгъум зыфигъэхьазырынэу фэгъэ­хъугъэп. Стадионым дэсэу зэнэкъокъум еплъыгъ.

УхъумакIор зыхэукъокIэ…

Венгриер – Урысыер – 2:3

Iоныгъом и 6-м Будапешт щызэдешIагъэх.

ЗэIукIэгъур тиешIакIохэм дэгъоу аублагъ. Венгрием икомандэ иухъумакIо хэукъоныгъэ зэришIырэм Антон Миранчук псынкIэу гу лъитагъ. Iэгуаор къыIэкIихи, хъагъэм дидзагъ. Магомед Оздоевым пчъагъэм хигъэхъоным фэшI IэпэIэсэныгъэ ин къызыхигъэфагъ.

ЕшIэгъум ипычыгъо чанэу хэлэжьагъэх Антон Миранчукрэ Артем Дзюбэрэ. УхъумакIохэм Iэгуаор къаIэкIахыгъ, къэлапчъэм благъэу екIугъэх. А. Дзюбэ ыпэкIэ лъымыкIуатэу Iэгуаор къызэкIидзэжьыгъ. Марио Фернандес чIыпIэр дэгъоу къызэрэхихыгъэм ишIуагъэкIэ къэлап­чъэм псынкIэу дэонэу игъо ифагъ, пчъагъэр 3:0.

ТиухъумакIохэм яхэукъоны­гъэхэр Венгрием иешIакIохэм агъэфедэзэ, гъогогъуитIо тикомандэ икъэлапчъэ Iэгуаор къыдадзагъ, пчъагъэр 2:3. Урысыем иешIакIохэм зичэзыу зэIукIэгъухэм зафагъэхьазыры. Очкоуи 6 тикомандэ иI, апэрэ чIыпIэм щыI.