Урысые Федерацием кушъхьэфэчъэ спортымкIэ изэнэкъокъоу Ижевскэ, Самарэ ащыкIуагъэм Адыгеим испортсменхэм медальхэр къыщыдахыгъэх.

Республикэм кушъхьэфэчъэ спортымкIэ иеджапIэ хэгъэгум изэнэкъокъу гъэхъагъэ щызышIыгъэ спортсменхэр къырагъэблагъэхи, афэгушIуагъэх.

Адыгеим испортсмен цIэрыIоу, Урысыем ихэшыпыкIыгъэ командэ хэтэу, спортымкIэ дунэе класс зиIэ мастерэу СтIашъу Мамыр критериумым дышъэр къыщи­хьыгъ.

— Ижевскэ щыкIогъэ зэIукIэгъухэм дэгъоу зафэзгъэхьазырыным фэшI тренерхэм, зэкIэ Iэпы­Iэгъу къысфэхъугъэхэм «тхьашъуе­гъэпсэу» ясIожьы сшIоигъу, — игупшысэхэм тащегъэгъуазэ СтIашъу Мамыр. – Сятэ имэфэкI мафэ хэгъэгу зэнэкъокъум сыхэ­лажьи, апэрэ чIыпIэр къыдэсхыгъ. ТекIоныгъэр ащ фэсэгъэхьы.

Урысыем ихэшыпыкIыгъэ командэ хэтэу Олимпиадэ джэгунхэм Елизавета Ошурковам зафегъэхьазыры. Самарэ щызэхащэгъэ хэгъэгу зэнэкъокъум апэрэ чIыпIэр къыщыдихыгъ.

— Илъэс 11 сыныбжьэу кушъхьэ­фэчъэ спортым зыфэзгъа­сэу езгъэжьагъ, — къыщиIуагъ зэхахьэм Е. Ошурковам. — СызэрэцIыкIум къыхэкIэу апэрэ мафэхэм кушъхьэфачъэ къысатыгъагъэп. Сыгу сымыгъэкIодэу спортым сыпылъыгъ, зэнэкъокъу­хэм сахэлажьэу езгъэжьагъ. Спорт зэIукIэгъухэм дэгъоу зафэбгъэхьазыры зыхъукIэ, текIоныгъэр къыдэпхыщт.

Командэм хэтхэу Елизавета Арчибасовам, Ольга Дейко, Алена Рацевам Урысыем изэнэкъо­къоу Ижевскэ щыкIуагъэм тыжьыныр къыщыдахыгъ.

А. Куликовскэмрэ В. Исламовымрэ джэрз медальхэр Самарэ къыщахьыгъэх.

Зэхахьэм къыщыгущыIагъэх Адыгэ Республикэм изаслуженнэ тренерэу, СССР-м спортымкIэ имастерэу Владимир Бородавкиныр, республикэм кушъхьэфэчъэ спортымкIэ иеджапIэ ипащэ игуадзэу Николай Аркатовыр, 2019-рэ илъэсым Адыгеим итренер анахь дэгъухэм ащыщэу Алексей Войновыр, нэмыкIхэри.

ЕджапIэм зыщызыгъасэхэрэм, спортыр зышIогъэшIэгъонхэм яупчIэхэм джэуапхэр къязыты­жьыгъэхэ спортсменхэм къэбарэу къаIотагъэр макIэп. Спортым щыцIэрыIохэр кIэлэеджакIохэм, тренерхэм ахэтхэу нэпэеплъ сурэтхэр атырахыгъэх.