Теуцожь районым икомандэу «ПкIашъэр» Мыекъопэ «Зэкъошныгъ-2-м» дешIагъ. Мыекъуапэ щыщхэм пчъагъэр 2:1-у текIоныгъэр къыдахыгъ.

Красногвардейскэ районымрэ Адыгэкъалэрэ яешIакIохэм язэнэ­къокъу кIэухэу фэхъугъэр футболым пыщагъэхэм агъэшIэгъуагъ. Адыгэкъалэ икомандэ 6:2-у текIоныгъэр ыхьыгъ.

Мыекъуапэ икомандэу «Арсеналыр» Кощхьэблэ районым иешIакIохэм заIокIэм, къуаджэм къикIыгъэхэр 2:1-у зэнэкъокъум щытекIуагъэх.

Республикэм футболымкIэ и Федерацие ипащэу Николай Походенкэм къытиIуагъ къоджэ спортым зыкъегъэIэтыгъэнымкIэ, физкультурэм зырагъэушъомбгъунымкIэ зэнэкъокъур нахь гъэшIэгъон зэрэхъущтым зэрэпылъхэр. Спортсмен цIэрыIохэр ешIэгъухэм къарагъэблэгъэщтых. СамбэмкIэ, дзюдомкIэ банэхэрэр, нэмыкI спорт лъэпкъхэм апылъхэу спортышхом гъэхъагъэ щызышIыхэрэр ныбжьыкIэхэм аIуагъэкIэщтых, зэдэгущыIэгъухэр афызэхащэщтых.

Зичэзыу футбол ешIэгъухэр зыгъэпсэфыгъо мафэхэм командэхэм яIэщтых. Зэнэкъокъур Адыгэ Республикэм и Мафэ ехъулIэу аухыщт.