Мыекъопэ гандбол командэу «Адыиф-2-м» 2020 — 2021-рэ илъэс зэнэкъокъур непэ регъажьэ.

— Ставрополь икомандэу «Ставрополье-2-м» тыдешIэщт, — къытиIуагъ «Адыиф-2-м» итренер шъхьаIэу, Урысыем изаслуженнэ тренерэу Александр Реввэ. — Аужырэ уплъэкIунхэр зэхэтщагъэх, зэIукIэгъум хэлэжьэщтхэр къыхэтхыгъэх.

КъэлэпчъэIутэу Юлиана Скнарь, ешIакIохэу Мария Кучеренкэм, Юлия Кожубековам, Ангелина Куцеваловам, Ольга Гороховам, Кобж Заремэ, нэ­мыкIхэм Ставрополь щыкIощт ешIэгъум зыфагъэхьазыры.

Суперлигэм щешIэрэ «Адыифыр» Волгоград икомандэу «Динамэм» Мыекъуапэ зыщыIокIэм, «Адыиф-2-м» иешIакIохэр зэнэкъо­къум ашIогъэшIэгъонэу еплъы­гъэх. ЕшIэкIо ныбжьыкIэхэм яIэпэIэсэныгъэ хагъэхъонымкIэ ащ фэдэ зэIукIэгъухэр еджапIэ афэхъухэу елъытэ Александр Реввэ.