Адыгэ тхакIохэу Iоныгъо мазэм къэхъугъэхэр
Илъэс зэфэшъхьафхэм, ау а зы мазэм — Iоныгъом къэхъугъэх Адыгэ Республикэм инароднэ тхакIохэу Еутых Аскэр, ХьэдэгъэлIэ Аскэр ыкIи ныбжьымкIэ ахэм анахьыжъыIоу Шэуджэн Аюб. Мы нэбгырищыри зэфэдэу, зафэу литературэм щылэжьагъэх, Хэгъэгу зэошхом хэлэжьагъэх.
Еутыхымрэ ХьэдэгъалIэмрэ зэкъоджэгъугъэх ыкIи зэцIэджэгъугъэх, ау нэмыкI лъэныкъуабэмкIэ зэтекIыщтыгъэх. Хэти Тхьэм къыритыгъэ акъылым елъытыгъэу щыIагъ, гупшысагъэ, шъхьадж ифэшъошэ творческэ гъогур щыIэныгъэм щыпхырищыгъ.
Еутых Аскэр (1915 — 1999)
Еутых Аскэр Къадырбэч ыкъор Красногвардейскэ районым ит къуаджэу Хьатикъуае Iоныгъом и 25-м 1915-рэ илъэсым къыщыхъугъ. Еджэгъэ-гъэсэгъагъ. Педтехникумыр, Краснодар дэт кIэлэегъэджэ институтыр къыухыгъэх. Хэку гъэзетым, Адыгэ научнэ-ушэтын институтым Iоф ащишIагъ. 1939 — 1941-рэ илъэсхэм искусствэмкIэ театрэм и Къэралыгъо институтэу А. В. Луначарскэм ыцIэ зыхьырэм и Адыгэ студие икIэлэегъэджэ-упчIэжьэгъугъ.
Хэгъэгу зэошхом Аскэр хэлэжьагъ, орденхэр ыкIи медальхэр къыфагъэшъошагъэх.
Еутых Аскэр ытхыхэрэр 1934-рэ илъэсым щыублагъэу хеутых. Ихудожественнэ тхылъхэр 1939-рэ илъэсым щегъэжьагъэу къыдэкIыхэу рагъэжьагъ. Илъэс 60 Iэпэ-цыпэм литературэм щылэжьагъ. Усэхэр, поэмэхэр, рассказхэр, повестхэр, пьесэхэр, романхэр зыдэт тхылъхэр бэу ытхыгъэх. Аскэр ипьесэхэу «Ася», «Бзылъфыгъэ цIыкIу», «Зэпытхъыгъэ пшъэхъухэр» зыфиIохэрэр Адыгэ драмтеатрэм щагъэуцугъэх.
Еутыхым зэдзэкIыгъэ IофшIагъэхэри иIэх.
Еутых Аскэр АР-м инародэнэ тхакIу, УФ-м итхакIохэм я Союз 1938-рэ илъэсым къыщегъэжьагъэу хэтыгъ.
ХьэдэгъэлIэ Аскэр (1922 — 2009) ХьэдэгъэлIэ Аскэр Махьмудэ ыкъор къуаджэу Хьатикъуае Iоныгъом и 20-м 1920-рэ илъэсым къыщыхъугъ. 1942 — 1946-рэ илъэсхэм Дзэ Плъыжьым къулыкъур щихьыгъ. Еджэгъэ-гъэсэгъагъ, филологие шIэныгъэхэмкIэ докторыгъ.
1946-рэ илъэсым къыщегъэжьагъэу, опсауфэ, Адыгэ шIэныгъэ-ушэтын институтым щылэжьагъ. ШIэныгъэ IофышIэ шъхьаIэу ыкIи литературэмрэ фольклорымрэкIэ секторым ипащэу, нартоведениемкIэ отделым итхьаматэу щытыгъ. 1940-рэ илъэсым щегъэжьагъэу ытхыхэрэр хиутыщтыгъэх. Усэхэмрэ поэмэхэмрэ зыдэт хэшыпыкIыгъэ сборникхэр адыгабзэкIи урысыбзэкIи къыдигъэкIыгъэх. Ахэр Мыекъуапэ, Москва, Краснодар къащыхаутыгъэх.
Лъэпкъ лIыхъужъ эпосэу «Нартхэм» иугъоижьын, изэхэфын, изэгъэкIун ыкIи икъыдэгъэкIыгъэн илъэсыбэрэ Iофышхо дишIагъ. ХьэдэгъэлIэ Аскэр Адыгеим илъэпкъ тхакIу, шIэныгъэлэжь-академик цIэрыIу. 1959-рэ илъэсым къыщыублагъэу Урысыем итхакIохэм я Союз хэтыгъ.
Шэуджэн Аюб (1904 — 1985)
Iоныгъом и 14-м 1904-рэ илъэсым Теуцожь районым ит къуаджэу Аскъэлае къыщыхъугъ. Мыекъопэ кIэлэегъэджэ институтыр 1947-рэм ыкIи 1949-рэ илъэсым — Всесоюзнэ юридическэ заочнэ институтыр (ВЮЗИ) къыухыгъэх.
1941 — 1944-рэ илъэсхэм дзэм хэтыгъ, полкым икомиссарыгъ, Кавказыр, Дон, Украинэр, Къырым пыим къыIэкIэхыжьыгъэнхэмкIэ зэошхоу кIуагъэхэм ахэтыгъ, подполковникэу дзэм къыхэкIыжьыгъ, орденхэу «Боевого Красного Знамени», «Красная Звезда», «Отечественной войны I-й степени» зыфиIохэрэр, медальхэр къыфагъэшъошагъэх.
Зэо ужым адвокатэу, юристэу чIыпIэ зэфэшъхьафхэм Iоф ащишIагъ. 1955-рэ илъэсым щегъэжьагъэу ытхыхэрэр хиутыщтыгъэх. УрысыбзэкIэ (гъусэ иIэу) «Мос Шовгенов» (очерк-тхылъ), художественнэ-документальнэ повестхэу «Не забудьте!», «Над Псекупсом» ытхыгъэх. А. И. Шэуджэныр Урысыем ижурналистхэм я Союз хэтыгъ.