Хэгъэгу футболымкIэ ихэшыпыкIыгъэ командэ Европэм изэнэкъокъу хэхьэрэ ешIэгъухэм Iоныгъо мазэм ахэлэжьэщт.Урысыем ихэшыпыкIыгъэ командэ итренер шъхьаIэу Станислав Черчесовым ешIэкIо 25-мэ ацIэ къыриIуагъ. Хэта анахьэу къахэдгъэщыщтыр? Тренер шъхьаIэм зэрилъытэрэмкIэ, зэIукIэгъу мафэхэм яхъулIэу анахь дэгъоу зызыгъэхьазырыгъэхэр арых ешIапIэм къи­хьащтхэр.

Артем Дзюбэрэ Александр Соболевымрэ телефонкIэ гущыIэгъу зэфэхъухи, зэгурыIуагъэх. Зэгъусэхэу зы командэм щызэдешIэнхэ алъэкIыщтэу къаIуагъ.

Станислав Черчесовым пэшIорыгъэшъэу къыхихыгъэ ешIакIохэм ащыщэу Александр Головин, фэшъхьафхэм шъобж къатыращагъ. Ащ къыхэкIэу А. Соболевыр хэгъэгум икомандэ шъхьаIэ щешIэн ылъэ­кIыщт.

Урысыем ихэшыпыкIыгъэ командэ Iоныгъом и 3-м Сербием, и 6-м Венгрием адешIэщт.