Адыгэ Республикэм щыпсэурэ къэндзалхэм культурэмкIэ яобществэу «Дуслыкым» ипащэу хадзыгъ предпринимателэу Алим Ильясовыр. Мы организацием илъэс пчъагъэхэм ипэщагъэу, бэ­дзэогъум и 9-м зидунай зыхъожьыгъэ Алям Илья­совым ычIыпIэ ар иуцуагъ. Мыщ фэдэ унашъо щашIыгъ организацием изэ­фэ­хьысыжь-хэдзын конференциеу зэхащагъэм.

Адыгеим и ЛIышъхьэу КъумпIыл Мурат ыцIэкIэ конференцием илIыкIохэм шIуфэс гущыIэхэмкIэ за­къыфигъэзагъ АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамал­хэмкIэ и Комитет итхьама­тэу Шъхьэлэхъо Аскэр. Къэ­ралыгъо ыкIи муниципальнэ программэхэр гъэцэкIэгъэнхэмкIэ, лъэныкъо зэфэшъхьафхэмкIэ Iоф зэ­дэшIэгъэнымкIэ, нэмыкIхэмкIи республикэм ихэбзэ къулыкъухэмрэ общественнэ организациехэмрэ зэпхыныгъэ зэрэзэдыряIэр ащ къыхигъэщыгъ.

— Общественностым илIы­кIохэр хэбзэ къулы­къу­хэм яIофшIэн къыхэла­жьэх, комиссиехэм ыкIи советхэм ахэтых, хэбзэгъэуцу ыкIи общественнэ уплъэкIуным епхыгъэ пшъэрылъхэм ягъэ­цэкIэн къыхэлажьэх, — къы­Iуагъ Шъхьэлэхъо Аскэр.

Комитетым итхьаматэ къы­зэриIуагъэмкIэ, респуб­ли­кэм иобщественнэ щыIакIэ чанэу къыхэлажьэхэрэм ащыщ къэндзалхэм яобщест­вэу «Дуслыкыр». Ащ илIыкIохэр Адыгеим и Общест­веннэ палатэ хэтых, лъэпкъ зэфыщытыкIэхэр гъэпытэгъэным фэгъэзэгъэ Iоф­шIэ­кIо купым, экстремиз­мэм ыкIи терроризмэм алъэ­ны­къокIэ пэшIорыгъэшъ Iоф­тхьабзэхэр зэхэщэгъэнхэм иэкспертнэ совет ахэхьэх.

Обществэм Iофэу ыгъэцакIэрэм идоклад конференцием къыщашIыгъ. Мыр зызэхащагъэм щыублагъэу зэшIуахын алъэкIыгъэр бэ: къэндзал культурэм имузей республикэм къыщызэIуа­хыгъ, бзэм изэгъэшIэн фы­тегъэпсыхьэгъэ еджапIэм Iоф ешIэ. Шъолъырым щызэхащэрэ Iофтхьабзэхэм зэкIэми къэндзалхэр ахэла­жьэх, лъэпкъ зэгурыIоны­гъэр гъэпытэгъэным яIа­хьышIу хэлъ. Адыгеим ипащэхэр IэпыIэгъу къазэрэ­фэхъухэрэм ишIуагъэкIэ къэндзалхэм я Дунэе конгрессхэм ыкIи къэндзал бзылъфыгъэхэм яфорумхэм ахэлажьэх.

Алим Ильясовым апшъэ­рэ юридическэ гъэсэныгъэ иI, бизнесым пылъ. Илъэси­пшIым ехъугъэу обществэу «Дуслыкым» иIофшIэн хэлажьэ.