«АГУ-Адыиф» Мыекъуапэ – «Динамо» Волгоград – 25:22 (13:15). ШышъхьэIум и 27-м Адыгэ Республикэм испорт Унэшхоу «Ошъутенэм» щызэдешIагъэх.«АГУ-Адыиф», къэлэпчъэIутхэр: Кожубекова, Баскакова, ешIа­кIохэр: Клименко – 3, Краснокутская, Никулина – 3, Серадская, Морозова – 3, Богданова – 4, Куцевалова, Измайлова – 1, Казиханова, Кобл – 10, Стрельцова – 1.

Гандбол клубэу «Динамо-Синара» Волгоград итренер шъхьа­Iэу Любовь Федоричевар Урысыем ихэшыпыкIыгъэ ныбжьыкIэ командэ итренер шъхьаIэу щыт. Сэнаущыгъэ зыхэлъ ешIакIохэр «Динамэм» хэтых, текIоныгъэр ахьын ямурадэу Мыекъуапэ къэ­кIуагъэх.

ЗэIукIэгъум иапэрэ едзыгъо «Динамэр» 15:13-у «Адыифым» текIуагъ. Волгоград икомандэ гугъэр чIимынэу ятIонэрэ едзыгъор ригъэжьагъ, бэрэ ыпэкIэ илъыщтыгъ.

«Динамэм» икапитанэу Екатерина Литвиновар иIэпэIэсэныгъэкIэ къахэщыщтыгъ. Анжелика Лебедевам гъогогъуи 5, Анастасия Старшовам 4 «Адыифым» икъэлапчъэ Iэгуаор дадзагъ, арэу щытми, текIоныгъэм екIурэ гъогур аIэкIэкIыгъ.

«Адыифым» изэ­хъокIыныгъэхэр

Ирина Клименкэм ухъумэн Iофыгъохэр дэгъоу ыгъэцакIэхэзэ, ыпэкIэ илъэу, хъагъэм Iэгуа­ор ридзэнэу игъо ифэщтыгъ. Ана­стасия Серадскаяр зэхэщэн Iофыгъохэм чанэу ахэлажьэзэ, типшъашъэхэм щысэ афэхъу­щтыгъ.

«Астраханочкэм» къыхащыгъэ Дарья Богдановам къэлапчъэм Iэгуаор бэрэ дедзэ. Ащ фэдэ ешIакIохэр «Адыифым» ищыкIагъэх. Тикомандэ иешIакIэ зэхъо­кIыныгъэу фэхъугъэхэм яшIуагъэ­кIэ текIоныгъэм фэбэнэн ылъэкIы хъугъэ.

«ЗэIукIэгъур зэрэтшIуахьыщтыр тшIэзэ, ешIапIэм техьэ, зэнэкъо­къур етэгъажьэ», – «Адыифым» хэт пшъашъэхэм арэущтэу къы­таIоу бэрэ къыхэкIыщтыгъ.

Ары, ауж къинэрэ командэм ухэт зыхъукIэ, ащ фэдэ гупшысэхэр пшIыщтых. Уахътэр лъэкIуатэ, «Адыифым» иешIэкIэ-гупшысакIэ нахьышIум ылъэныкъокIэ зэхъо­кIыныгъэхэр фэхъух.

Зэгъэпшэнхэр

– Волгоград икомандэ тыIукIэным ыпэкIэ «Адыифым» иешIа­кIохэм гущыIэгъу тафэхъугъ, – къытиIуагъ клубым ипресс-къулыкъу ипащэу Бзаго Рустам. – Нэбгырэ пэпчъ текIоныгъэм икъы­дэхын елъытыгъэу зэрэщытыр «Адыифым» иешIакIохэм къагурыIуагъэу тэлъытэ. «Динамо-Синарэм» итренер шъхьаIэу Любовь Федоричевам зэрилъы­тэрэмкIэ, тикомандэ ешIэкIо «чъэпхъыгъэу» хэтыр зэрэмакIэм, Никита Голуб опыт ин зэримыIэм афэшI зэIукIэгъум текIоныгъэр къыщыдихынымкIэ гугъэу иIэр макIэ…

– Тикомандэ иешIакIэ къыгъо­тыгъ, – къытиIуагъ клубэу «Ады­ифым» ипащэу Къудайнэт Мэджыдэ. – ЗэгурыIоныгъэ ахэлъэу текIоныгъэм фэбэнэгъэ пшъашъэ­хэм тафэраз. Анахьэу къахэсэгъэщых къэлэпчъэIутэу Светлана Кожубековар, ешIакIохэу Ирина Клименкэр, Анастасия Серадскаяр, Дарья Богдановар, Елена Стрельцовар, Кобл Зурыет.

– Ухъумэн Iофыгъохэр нахьыпэкIэ тиешIакIохэм дэгъоу агъэцакIэщтыгъэхэп. Командэм икъэ­лапчъэ къыухъумэным фэшI иешIакIэ къыгъотыгъэу сэлъытэ. «Адыифыр» ыпэкIэ зилъыкIэ ешIакIэу къыгъэлъэгъон фаер хэушъхьафыкIыгъэу щытын фае. ЗэIукIэгъур 13:15-у тшIуахьызэ, текIоныгъэр къызэрэдэтхыгъэм фэшI типшъашъэхэм гъэзетымкIи «тхьашъуегъэпсэу» ясIожьы сшIоигъу, – иеплъыкIэхэм тащигъэгъозагъ «Адыифым» итренер шъхьаIэу Никита Голуб.

ЕшIэгъухэм якIэуххэр

«Уфа-Алиса» – ЦСКА – 22:34, «Лада» – «Звезда» – 21:22, «Ростов-Дон» – «Ставрополье» – 38:28.

ЧIыпIэхэр зэтэгъапшэх

ЧIыпIэу зыдэщытхэр, очко пчъагъэу командэхэм яIэр зэтэгъапшэх.

1. ЦСКА – 4 2. «Ростов-Дон» – 4 3. «Астраханочка» – 2 4. «Адыиф» – 2 5. «Кубань» – 2 6. «Звезда» – 2 7. «Лада» – 0 8, «Луч» – 0 9. «Ставрополье» – 0 10. «Динамо» – 0 11. «Уфа-Алиса» – 0 12. «Университет» – 0

Мыекъопэ гандбол клубэу «Адыифым» зичэзыу ешIэгъу­хэр Iоныгъо мазэм иIэщтых. И 5-м «АГУ-Адыифыр» Краснодар щыIукIэщт чIыпIэ командэу «Кубань». И 11-м Адыгэ Респуб­ликэм испорт Унэшхоу Кобл Якъубэ ыцIэ зыхьырэм «Уфа-Али­сэмрэ» «АГУ-Адыифымрэ» щызэдешIэщтых.

Гандболыр зышIогъэшIэгъонхэр зэIукIэгъум еплъынхэу спорт Унэшхом чIагъэхьащтхэми тшIэ­рэп. ЗэхэщакIохэм и 10-м ехъу­лIэу макъэ къагъэIущтэу тяжэ.