Мэкъэ IэтыгъэкIэ уигущыIэ къэпIоныр, цIыфхэм апашъхьэ къиплъхьаныр къызэрыкIо Iофэп. Ауми, жъи кIи акIоцIылъэу зэхашIэрэм ымыгъэгупсэфхэу, къаIорэ е атхырэ пэпчъ са­тыр зэкIэлъыкIоу, кIыхьэ-лыхьэ зырамыгъэшIэу, тхьапэм къы­те­хьагъэр зэрэхаутыщтым дэгуIэх.Уегупшысэмэ, ягъо кIэхьагъа къаIомэ ашIоигъом, е ацIэ раIоным кIэхъопсыха?!

ЫпэкIэ тхыгъэхэм усэкIо чъэпхъыгъэхэр яшъыпкъэу ямы­джэхэу, ахэм ахэлъыр кIамыгъэтхъыгъэу, яшIошI къырамы­IуалIэу, щыбзэм ар кIэмыкIыгъэу къыхаутыщтыгъэп, джы пчъэхэр зэIухыгъэх. Плъышъо горэ иIахэу, хэутакIохэм зяб­гъаштэмэ, нэрэ-Iэрэм къыдэ­кIыщтых.

Шъыпкъэ, непэ адыгэм яна­хьыбэр абзэкIэ тхэнхэ алъэ­кIырэп, ныдэлъфыбзэр ашIэ­рэпышъ, умыбзэр уиепышъ, IэшIугъакIэу гущыIэм кIэлъым, къапIомэ пшIоигъом щыкIагъэ афэхъу. Мыщ дэжьым къыхэзгъэщымэ сшIоигъу уусэныр, гупшысэм ухэуцоныр зэрэмы­псынкIэр. Ау ащ фэдиз къыпамыгъэкIэу зэкIэ зэхахыгъи, бэшIагъэу къаIуагъэу кIатхыкIыжьыгъи яфэмэ-бжьымэ кIэтэу, ежьхэм къапкъырыкIыгъэу акIоцIылъыр къэшIэгъуаеу, гуIэхэзэ, тхылъ цIыкIу ашIы. Тхэным ишIыкIэ-хабзи, усэм ишапхъи, ыкупкIи пылъхэп, мэгуIэх, зыгорэм къыщенэхэм фэдэу.

Дэгъу, хэт ытхырэми зэри­фэшъуашэу купкI иIэу, шъо ыгъотыгъэу щытымэ… Сыдми, хэти ежь фэлъэкIэу хэлъым фэдиз фэкъудыирэр, арышъ, а тхылъым дэт усэхэм е рассказхэм ягъашIэ зыфэдэщтыр, цIыфхэм зэралъыIэсыщтхэр уахътэм къызэхифыжьыщт, ыгъэу­нэфыщт.

Сэ сшъхьэкIэ апшъэрэ филологическэ шIэныгъэхэр икъоу зэрэсIэкIэлъым, журналист сэнэхьатым илъэс 25-рэ хъугъэу Iоф зэрэрысшIэрэм къысатыгъэ къулай-амалхэм фитыныгъэ къысаты сишIошI-еплъыкIэ къэсIонэу.

Непэ къычIэкIыгъэ тыгъэ фабэм ягуапэ ышIагъэм фэдэу, бзэм, литературэм хэ­шIыкI афызимыIэхэр арых ащ нахь фэкъаигъэхэр. Ащ къизгъэкIырэп, ахэр мытхэнхэу, ау яшIэныгъэ, гъэсэныгъэ, тхэн амал рагъэкъуныр ищыкIагъ, мыгузажъохэу, ахэлъ щыIэмэ, игъо кIагъэхьаныр сэ нахь сшIотэрэз. Нахьыбэм усакIом, тхакIом пшъэрылъ ин дэдэ зэриIэр къы­далъытэрэп, ар ежь фэдабэм иакъылкIэ ашъхьэдэщэу щы­тыныр — гущыIэм ыкIуачIи, ичIыпIи зэхигъэкощыкIышъоу, ащ къикIырэми, зыдэпщэн е зэрэбгъэуцущт шIыкIэми афэIэзэныр ищыкIагъ. УмыгуIэу, гу­пшысэр бгъэунэшкIу­пэныр, еджэ­рэм ыгу нэсэу бгъэпсыныр, хэ­ти тхыгъэу зэджа­гъэм зы IэшIугъэ-фэбагъэ хигъотэныр, къы­шъхьапэныр, шIум къы­фигъэущыныр тхыгъэ дэгъум инэшан. Поэ­зиер ювелир IэшIэгъэ гъэчъыгъэм сэ фэсэгъадэ, джа­ры усэныр къэзгъэхьылъэрэр, шъорэ гурэ хэмылъмэ — пкIэнчъ. О пшъхьэкIэ, угукIэ зызытебгощэрэ усэн-тхэным о ума­къэ, о птешIыкIыгъэу укъырашIэжьэу хэмылъыщтымэ, сыда узкIэтхэщтыр, цIыфхэми сы­дэущтэу уафэкIощта ыкIи зябгъэштэщта?

Ары птхыгъэм пчъагъэрэ уеджэжьынышъ, къикIырэр бгъэу­нэфыжьынышъ, къыIуа­тэрэмкIи, жабзэмкIи, шъуашэмкIи икъугъэу, уигъэразэ зы­хъукIэ, хэуутын зыкIыфаер. Ау гущыIэ зэпэджэ сатыр хъыбэйхэр бэгъашIэ хъухэрэп.

«Изнанка твоей души» Джары Шъэфрыкъо Адам иапэрэ усэ тхылъэу бэмышIэу Адыгэ республикэ тхылъ тедзапIэм къыщыдэкIыгъэм цIэу иIэр. Хэти ащ къикIырэр иамал къы­зэрихьэу къыIон ылъэкIыщт.

Щыгъуазэ тызэрэхъугъэмкIэ, Адам апэрэ усэхэр ытхынхэу зыригъэжьэгъагъэр илъэс 15-р ары. Апэрэхэр журналэу «Литературная Адыгея», альманахэу «Автограф» зыфиIоу Москва Интернациональнэ тхакIохэм я Союз къыди­гъэкIырэм къарыхьагъэх. КIалэр литературэ зэнэкъокъоу «Автографым» хэлэжьагъ, Антуан де Сент-Экзюпери ипремие къыратыгъ.

Адам Адыгэ къэралыгъо ­университетым июридическэ факультет къыухыгъ. Мы уахътэм культурэмкIэ муниципальнэ бюджет учреждениеу «Драматическэ ныбжьыкIэ театрэу М. С. Ахэджагом ыцIэ зыхьырэр» зыфиIоу къуаджэу Тэхъу­тэмыкъуае дэтым ипащ.

Шъэфрыкъо Адам иусэхэм ыгу къызэрэриIорэм тетэу щы­Iэныгъэр, цIыфым ащ чIыпIэу щиубытырэр, уцIыфыным къи­кIырэр «зыIэ щэигъэ лъэIуакIом пIэ фэмыщэеу уемыбгъу­чъэныр» арэу зэрилъытэрэр, чIыопсым, тидунэе дахэ, титарихъ зэрэрилъэгъукIхэу, уасэу аритырэр къащиIуагъ. Итхыгъэ сатырхэм нэшхъэй макIэри, гумэкI-гукIэгъури, гушIогъо ма­къэри, зэхэшIэ иныри, гукъэо мэкъэнчъэри ащызэхэошIэх. НыбжьыкIэми, кIалэм къешIэ­кIыгъэ пстэур ыгукIэ, ыпсэкIэ къегъэгъунэ, зэфагъэр, хьалэлыгъэр, гукъэбзагъэр зэрэшэнышIухэр кIигъэтхъэу исатырхэр зэпегъащэх, шIоигъу гукъэбзагъэкIэ, къэраркIэ, насып дахэкIэ цIыфыпсэр ыфэпэнэу. УгукIэ пшIоигъомэ, къыбдэмы­хъун щыIэп, арышъ, Адам иапэрэ поэтическэ тхылъ цIыкIу къызэрэдэкIыгъэмкIэ тыфэгушIо, творческэ лъэбэкъукIэхэр ышIынхэу, игугъэ лъагэ лъыкIэхьанэу фэтэIо.

Мамырыкъо Нуриет. Сурэтым итыр: УсэкIо ныбжьыкIэу Шъэфрыкъо Адам ыкIи иапэрэ усэ тхылъ итеплъ.