Мыекъуапэ самбэмрэ дзюдомрэкIэ ибэнэпIэ еджапIэ лъапсэ фэзышIыгъэу, СССР-м иза­служеннэ тренерэу, я ХХ-рэ лIэшIэгъум Уры­сыем дзюдомкIэ итренер анахь дэгъоу, кIэлэ­егъэджэ шIэныгъэхэмкIэ докторэу, профессо-рэу Кобл Якъубэ ишIушIагъэ зеушъомбгъу.Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэр 2020 — 2021-рэ илъэс еджэгъум фэхьазырэу пэгъокIы. ПэшIорыгъэшъ зэIукIэгъухэр тренер-кIэлэегъаджэхэм яIагъэх, ны-тыхэм, бэнакIохэм пащэхэр адэгущыIагъэх.

Лъапсэр агъэпытэ

— БэнэкIо 500-м нахьыбэ тэ­гъасэ, — къеIуатэ Адыгэ Рес­публикэм дзюдомкIэ испорт еджа­пIэу Кобл Якъубэ ыцIэ зы­хьырэм ипащэу, Адыгеим изаслуженнэ тренерэу Бастэ Сэлымэ. — Илъэси 7 зыныбжьхэм къащегъэжьагъэу кIалэхэри, пшъа­шъэхэри тэгъасэх. Мые­къуапэ щыщхэм ямызакъоу, тирайонхэм ащытиIэ къутамэхэм яныбжьыкIэхэри къытэпхыгъэх. Кобл Якъубэ лъапсэ зыфишIыгъэ бэнэпIэ еджапIэр дунаим шIукIэ щашIэ зэрэхъугъэм тырэгушхо, IофшIагъэу щыIэр лъытэгъэкIуатэ.

АнахьыкIэхэр зыгъасэхэрэр

Урысыем изаслуженнэ тренерхэу Беданыкъо Байзэт, Сергей Шутовым, Адыгэ Республикэм изаслуженнэ тренерхэу Нэпсэу Бислъан, Хьашхъуаныкъо Айвар, анахьыкIэ кIэлэцIыкIухэр дзюдом фагъасэх.

Апшъэрэ категорие зиIэ тренерхэу Мерэм Саидэ, Роман Оробцовым, Хьакурынэ Ларисэ зипэщэ купхэр япчъагъэхэмкIэ анахьыбэх.

Мерэм Саидэ шъэожъыехэри, пшъэшъэжъыехэри дзюдом нахь куоу хищэнхэм пылъ. Ащ зэри­лъытэрэмкIэ, кIэлэеджакIохэм яцIыкIугъом ахэплъхьагъэр на­хьышIоу апкъырэхьэ. ПкIантIэ къяхызэ банэхэ зыхъукIэ, дзюдор зыфэдэ спорт лъэпкъыр, ащ дэхагъэу хэлъыр икъу фэдизэу къагурыIонымкIэ яамалхэм ахэхъо.

Тренер ныбжьыкIэхэу КIубэ Хьамедэ, ЛIэхъусэжъ Владлен, ШъэоцIыкIу зэшхэу Рустам ыкIи Айдэмыр апэрэ лъэбэкъухэр сэ­нэхьатэу къыхахыгъэм щашIых.

ШъэоцIыкIухэр спортышхом щашIэх. Урысыем ихэшыпыкIыгъэ командэхэм ахэтхэу зэнэ­къокъухэм ахэлэжьагъэх, ме­дальхэр къахьыгъэх. Псауныгъэм игъэпытэн фэгъэхьыгъэ зэха­хьэ­хэу республикэм физкультурэмкIэ ыкIи спортымкIэ и Комитет зэхищэхэрэм «IэпэIасэм ­иеджапI» зыфиIорэ Iофтхьабзэм пэщэныгъэ дызэрахьэ, псауныгъэр зыгъэпытэрэ едзыгъохэр къаща­гъэ­лъагъох.

Зэшхэр къоджэ спортым къы­хэкIыгъэх, яцIыкIугъом Джыра­къые щыпсэухэзэ, дзюдом ишъэф­хэр зэрагъэшIагъэх. Урысыем изэнэкъокъу дышъэр къыщыдэзыхыгъэ ШъэоцIыкIу Рустам къызэрэтиIуагъэу, тренер цIэрыIоу Беданыкъо Рэмэзан лъэшэу фэраз. Тренерымрэ бэнакIомрэ псынкIэу зэгурыIуагъэх, ягуа­пэу Iоф зэдашIагъ.

Алырэгъум ущыбэнэнымрэ ныбжьыкIэхэр бгъэсэнхэмрэ зэ­рэзэтекIыхэрэр ШъэоцIыкIу Рус­там къытфиIуатэзэ, пэщэныгъэ зыдызэрихьэрэ кIэлэеджакIохэр шIу зэрилъэгъухэрэм тыщигъэ­гъозагъ.

— КIэлэцIыкIур тренерым щэ­гугъы, спортым гъэхъагъэ щишIы шIоигъу. Цыхьэу къыпфи­шIырэр къэбгъэшъыпкъэжьын фаеу сэлъытэ, — къытиIуагъ ШъэоцIыкIу Рустам.

Пчэдыжьым рагъажьэшъ, пчы­хьэм нэс кIэлэеджакIохэр бэ­нэпIэ алырэгъум щагъасэх. Тренерхэм охътэ хэхыгъэ яI, алырэгъур зыкIи нэкIы хъурэп. Еджэ­кIо купхэм зэкIэлъыкIуакIэу яIэр тренер-кIэлэегъаджэхэм къыдалъытэзэ, пэрыохъу зэ­фэмыхъухэу яIофшIэн зэхащэ.

Нахьыжъхэм якуп

Урысыем изаслуженнэ тренерэу Беданыкъо Байзэт, Адыгэ Республикэм изаслуженнэ тренерхэу Беданыкъо Рэмэзан, Нэ­псэу Бислъан, Хьакурынэ Да­мир бэнэкIо нахьыжъхэм якупхэм пэщэныгъэ адызэрахьэ.

— КIэлэеджакIом гурыт еджапIэр къызиухыкIэ, спортым екIо­лIакIэу фишIыхэрэм зэхъокIы­ныгъэхэр афэхъух, — къытиIуагъ Беданыкъо Рэмэзан. — Сэнэхьатэу къыхихыщтым, зыщеджэщт къалэм, фэшъхьафхэм ягупшысэ. Спортышхор IэкIыб ымышIыным фэшI хэкIыпIэхэр къызэдэтэгъотых.

Къоджэ спортым Iоф щызы­шIэрэ тренерхэм зэпхыныгъэу адыряIэр агъэпытэным респуб­ликэм испорт бэнэпIэ еджапIэ ипащэхэр пылъых. Тренерхэу Шъынэхъо Мурат, Нэджыкъо Руслъан, ХьакIэмыз Мурат, ХьакIмэфэ Алый районхэм ащэпсэух. ИлъэсыкIэ еджэгъум фэхьазырых.

Къуаджэмрэ къалэмрэ

Iоныгъом и 1-м илъэсыкIэ еджэгъур рагъэжьэжьыщт. Мерэм Саидэ, Нэпсэу Бислъан, нэмыкIхэу кIэлэеджакIохэм Iоф адэзышIэхэрэм щыIэныгъэм изэ­хъокIыныгъэхэр къыдалъытэх. Къуаджэм къикIыгъэ кIалэу къа­лэм щыпсэущтым гукIи, псэкIи гъусэ узэрэфэхъущт шIыкIэм егупшысэрэ тренерым иIофхэр нахьышIоу лъэкIуатэх.

Ордэн Андзаур Пщыжъхьаблэ, Мерэм Дамир Джыракъые щыщых. Урысыем дзюдомкIэ ихэшыпыкIыгъэ командэ хэтых, унагъохэр яIэх. ЩыIэныгъэм зыкъыщагъотынымкIэ тренерхэр IэпыIэгъу къафэхъугъэхэу алъытэ. Къуаджэмрэ къалэмрэ язэпхыныгъэ нахьышIу зыщыхъущт уахътэм тыхэтэу тренерхэм къы­таIуагъ.

ЗэIукIэгъухэр

Мыекъопэ бэнэпIэ еджапIэм щапIугъэхэу дунаим цIэрыIо щы­хъугъэхэм еджапIэм зыщызы­гъасэхэрэр аIокIэх. Урысыем дзю­домкIэ ихэшыпыкIыгъэ командэ итренер шъхьаIэу Тао Хьасанбый, Олимпиадэ джэгунхэм дышъэр къащызыхьыгъэхэ Арсен Галстян, Мудрэнэ Бислъан, спортым иветеранхэу Владимир Невзоровым, Емыж Арамбый, Лъэцэр Хьазрэт, фэшъхьаф­хэм зэIукIэгъу гъэшIэгъонхэр ады­ряIагъэх.

Олимпиадэ джэгунхэм дышъэр къащыдэзыхыгъэ Владимир Невзоровым ышнахьыкIэу Виктор Москва щэпсэу, тренерэу Iоф ешIэ. Мыекъуапэ къызыкIокIэ еджапIэм зыщызыгъасэхэрэм аIукIэныр шэнышIу фэхъугъ.

Дышъэр зэкIэми къахьыщтэп

БэнэпIэ еджапIэм зыщызыгъэ­сэрэ спортсменхэм юристхэр, экономикэм пыщагъэхэр, шIэны­гъэ­лэжьхэр, нэмыкIхэри къахэкIых.

— Андар Хьазрэт, ПIатIыкъо Ренат, Руслан Шевченкэм, нэмыкIхэм янэ-ятэхэр тиIофшIапIэ къакIохи, «Тхьашъуегъэпсэу, тикIалэхэр щыIэныгъэм дэгъоу фэжъугъэсагъэх», — къытаIуагъ, — тизэдэгущыIэгъу лъегъэкIуатэ Бастэ Сэлымэ. — Спортышхом зэкIэми дышъэр къызэрэщамыхьыщтыр тэшIэ. ЦIыфышIу хъунхэу, хэгъэгум шIуагъэ къыфахьызэ псэунхэу тэпIух.