ШышъхьэIум и 25 — 26-м хэгъэгум футболымкIэ иапшъэрэ куп щыкIорэ зэнэкъокъум командэхэм ешIэкIэ дэгъу къыщагъэлъэгъуагъ. ТекIоныгъэр ошIэ-дэмышIэу къыдэзыхыгъэхэм зэIукIэгъухэр къагъэдэхэн алъэкIыгъ.

ЕшIэгъухэр

«Тамбов» — «Шъачэ» — 0:1, «Арсенал» — «Химки» — 1:1, «Локомотив» — «Ахмат» — 2:3, «Ротор» — «Спартак» — 0:1, «Рубин» — «Уфа» — 3:0, «Краснодар» — ЦСКА – 1:1, «Ростов» — «Урал» — 1:0, «Динамо» — «Зенит» — 1:0.

Адыгэмэ ятарихъ къалэу Шъа­чэ икомандэ зэIукIэгъу пэпчъ текIоныгъэр къыщыдихэу ригъэ­жьагъ. ЕшIакIоу Нобоа къэлап­чъэм Iэгуаор димыдзэу зэIукIэгъу къыхэкIырэп.

— Нобоа иIэпэIэсэныгъэ очкоуи 3 къытфихьыгъ, икIэрыкIэу тигъэгушIуагъ, — къыIуагъ «Шъа­чэ» итренер шъхьаIэу Владимир Федотовым.

«Шъачэ» Александр Кокориныр, нэмыкI ешIэкIо дэгъухэр хэкIыжьыгъэх нахь мышIэми, апэ итхэм ащыщ.

«Арсенал» «Химки» зыIокIэм, къэлапчъэм Iэгуаор анахьыбэрэ дэзыдзэрэмэ ащыщэу Е. Луценкэм шъобж къытыращи, зэблахъун фаеу хъугъэ. Урысыем ихэшыпыкIыгъэ командэ щешIэнэу Е. Луценкэм зигъэхьазырыщтыгъ, ау игухэлъхэр къыдэхъущтмэ къэшIэгъуае. Джэуапыр медицинэм иIофышIэхэм къаIощт.

«Химки» иешIакIоу Алиевым я 30-рэ такъикъым «Арсенал» икъэлапчъэ Iэгуаор дидзагъ. Я 76-рэ такъикъым Кангвэ хъагъэм Iэгуаор дидзи, зэнэкъокъур 1:1-у аухыгъ. «Ахмат» лъэкIуатэ, «Локомотив»…

Хэта зышIэщтыгъэр «Ахмат» текIоныгъэр къыдихыщтмэ? Ильин ыкIи Тимофеевым зырызэ «Локомотив» икъэлапчъэ Iэгуаор дадзагъ. ЗэIукIэгъум иятIонэрэ едзыгъо аублэгъэ къодыеу Антон Миранчук пенальтикIэ хъагъэм Iэгуаор дидзагъ — 1:2. Беришэ ухъумакIохэм янэплъэгъу зэ­римытыр къызыфигъэфеди, Iэгуа­ор къызыратым изакъоу къэлэпчъэIутым екIуи, я 60-рэ такъикъым Iэгуаор хъагъэм дидзагъ — 1:3.

Я 63-рэ такъикъым «Ахмат» хэтэу Быстровым шапхъэр зэриукъуагъэм фэшI судьям ешIапIэм ригъэкIыгъ. «Локомотив» нахьыбэрэ ыпэкIэ къилъэу фе­жьагъ. Крыховяк шъхьэкIэ къэлапчъэм Iэгуаор дидзагъ 2:3. Ащ ыуж такъикъ 15 къэнагъэу щытыгъ. «Локомотив» гуIэзэ ешIэщтыгъ, «Ахмат» ухъумэн Iофыгъохэр цыхьэшIэгъоу ыгъэцэкIагъэх. «Локомотив» Алексей Миранчукрэ Дмитрий Бариновымрэ щешIагъэхэп зэрэсымаджэхэм къыхэкIэу. Командэм ар къе­гоуагъ.

«Рубин» текIоныгъэр 3:0-у «Уфа» къышIуихьыгъ. Макаровым гъогогъуи 2 хъагъэм Iэгуаор дидзагъ. «Рубин» итренер шъхьа­Iэу Леонид Слуцкэм къызэриIуа­гъэу, ешIакIохэм къэлапчъэм Iэгуаор дадзэнымкIэ амалхэр агъэфедагъэх.

«Уфа» иухъумакIохэм хэукъоныгъэ бащэ ашIыгъэу тренер шъхьаIэу Вадим Евсеевым ылъы­тагъ.

Матвей Сафоновыр къахэщы

«Краснодар» ЦСКА-м зэрэдешIагъэм уигъэрэзэнэу щыт. Кучаевым игъом ухъумакIохэр пэуцугъэхэп, Мартынович гу­жъуа­гъэ. Кучаевым «Краснодар» икъэлапчъэ Iэгуаор дидзагъ.

«Краснодар» ЦСКА-м икъэлапчъэ благъэу бэрэ екIугъ, хъагъэм Iэгуаор дидзэнэу амалышIухэр иIагъэх. Къэлэпчъэ­пкъым Iэгуаор къыгъэлъэтэжьэуи къыхэкIыгъ. КъэлэпчъэIут цIэры­Iоу Акинфеевыр цыхьэшIэгъоу ешIагъ.

Матвей Сафоновыр «Краснодар» икъэлэпчъэIут, илъэс 21-рэ ыныбжь. Матвей ятэ Мыекъопэ баскетбол командэу «Динамо- МГТУ-м» щешIэщтыгъ. Матвей баскетболыр шIогъэшIэгъоныгъ, ау футбол ешIэ шIоигъуагъ. ИкIэ­лэцIыкIугъом къыщегъэжьагъэу къэлэпчъэIутэу футболыр къыхихыгъагъ.

М. Сафоновыр ЦСКА-м дэ­гъоу дешIагъ, пчъагъэрэ Iэгуаор къызэкIидзэжьыгъ. Урысыем ихэшыпыкIыгъэ ныбжьыкIэ командэ ар рагъэблэгъагъ. Хэгъэгум футболымкIэ ихэшыпыкIыгъэ командэ итренер шъхьаIэу Станислав Черчесовыр къылъэплъэ. «Краснодар» «Локомотив» зыIокIэм М. Сафоновыр цыхьэшIэгъоу ешIагъ, спортым хэшIыкI фызиIэхэр къы­щытхъугъэх.

«Спартак» лъыкIотэщта?

ЯтIонэрэ чIыпIэм «Спартак» щыI. «Командэр бэрэ апэ итыщта?» зыфэпIощт упчIэр футболым пыщагъэхэм къаIоу зэхэтэхы. «Спартак» 1:0-у «Ротор» текIуагъ. Зичэзыу ешIэгъухэм ишъыпкъэу зафегъэхьазыры.

«Локомотив», ЦСКА, «Краснодар», «Ростов», «Шъачэ» апэ ишъыщтхэм ахалъытэх. «Ахмат» зэкIэлъыкIоу текIоныгъи 3 къыдихыгъ. Арышъ, апэрэ чIыпIэхэр зыхьыщтхэр къэшIэгъуае.

«Динамэр» «Зенит» 1:0-у зэрэтекIуагъэри бгъэшIэгъонэу щыт. Ухъумэн Iофыгъохэр «Динамэм» дэгъоу ыгъэцэкIагъэх. «Зенит» итренер шъхьаIэу Сергей Семак къызэриIуагъэу, зэIукIэгъум икIэух «Зенит» нахь псынкIэу ешIэу фежьагъ, ыпэкIэ илъыщтыгъ, ау пчъагъэм зэхъ­о­­­кIыныгъэ фишIын ылъэкIыгъэп.

Зэгъэпшэнхэр

ЕшIэгъухэм якIэуххэр зэд­гъапшэхэзэ, судьяхэм язекIо­кIэ-шIыкIэхэм тагъэгумэкIы. Пенальтир агъэунэфы зыхъукIэ, уна­шъор зэрэрахъухьэрэр къэшIэгъуае. Шапхъэхэр зэраукъохэрэр зэ­фэдэх, гущыIэм пае, тазыр ешIапIэм ихьагъэм IэкIэ зэрэнэсы­хэрэр, ау зым зэрэфагъэгъурэр, ятIонэрэр гурыIогъуаеу щыт. ВАР-р яIэпыIэгъу шъхьае, судьяхэр зафэу сыдигъуи зекIонхэ алъэкIырэп.

Хэта бгъэмысэщтыр?

«Зенит» ыкIи «Спартак» зэдешIэхэзэ, Артем Дзюбэрэ Александр Соболевымрэ зэфилъы­гъэх. ТIури ешIэкIо дэгъухэу тэлъытэх. Арэу щытми, Урысыем ихэшыпыкIыгъэ командэ итренер шъхьа­Iэу С. Черчесовым къыIуагъ А. Дзюбэрэ А. Соболевымрэ зы командэм щызэдешIэнхэ амы­лъэкIыщтэу.

А. Дзюбэ нахь шъабэу зекIон фэягъэу тэ тэлъытэ. ЕшIапIэм ащ фэдэ бырсыр спортым щыцIэрыIом къыIэтыныр тэрэзэп, ыгъэдахэрэп.

Хэт, тыдэ щыIа?

1. «Зенит» — 12 2. «Спартак» — 11 3. «Шъачэ» — 11 4. «Динамо» — 10 5. «Ахмат» — 10 6. «Ростов» — 9 7. «Краснодар» — 7 8. «Рубин» — 7 9. ЦСКА – 7 10. «Локомотив» — 7 11. «Арсенал» — 5 12. «Урал» — 5 13. «Уфа» — 4 14. «Тамбов» — 3 15. «Химки» — 2 16. «Ротор» — 1.

Зичэзыу зэIукIэгъухэр

29.08. «Рубин» — «Тамбов» «Спартак» — «Арсенал» «Химки» — «Ротор» 30.08. «Уфа» — «Динамо» «Локомотив» — «Зенит» «Ахмат» — ЦСКА «Краснодар» — «Ростов» «Шъачэ» — «Урал».

ЗэIукIэгъухэр гъэшIэгъонэу кIощтых. «Зенит», «Локомотив», «Краснодар», «Спартак», нэмыкI­хэри текIоныгъэм фэбэнэщтых.

ЕмтIылъ Нурбый.