Ыгу къытпэблагъэу Барселонэ щэпсэу
Испанием икъалэу Барселонэ щыпсэурэ Хъупэ Мурат искусствэм щызэлъашIэ. Гум къыхихырэ сэнэхьатыр шIукIэ къыотэжьыщтэу елъытэ.
Адыгэ Республикэм искусствэхэмкIэ изаслуженнэ IофышIэшхоу, Урысыем икомпозиторхэм я Союз хэтэу Хъупэ Мурат Кощхьаблэ къыщыхъугъ. ИцIыкIугъом къыщегъэжьагъэу музыкэм фэщагъ.
— Музыкальнэ училищым Мыекъуапэ тыщызэдеджагъ, тызэныбджэгъу, — къеIуатэ Урысыем, Адыгеим искусствэхэмкIэ язаслуженнэ IофышIэшхоу Сулейманов Юныс. — Музыкэр дэгъоу зэхихыщтыгъ. Зэфэхьысыжьхэр тшIыхэ зыхъукIэ упчIэжьэгъу тшIыщтыгъэ. ИшIэныгъэ хигъахъозэ, цIэрыIо зэрэхъугъэм тырэгушхо.
Ростов къэралыгъо консерваториеу С. Рахманиновым ыцIэ зыхьырэм хоровой дирижированиемкIэ факультетыр тхылъ плъыжьыкIэ къыухыгъ. Ащ къыщымыуцоу композитор сэнэхьатыр зыщызэрагъэгъотырэ факультетыми щеджагъ.
М. Хъупэм Мыекъуапэ къызегъэзэжьым, республикэм и Камернэ музыкальнэ театрэу А. Хьанэхъум ыцIэ зыхьырэм идирижер шъхьаIэу, Адыгэ Республикэм ихоровой капеллэ ихудожественнэ пащэу Iоф ышIагъ.
Адыгэ Республикэм и Къэралыгъо филармоние икъэралыгъо симфоническэ оркестрэ ихудожественнэ пащэу ыкIи идирижер шъхьаIэу загъэнафэм, Адыгеим имузыкальнэ искусствэ хэхъоныгъэ инхэр ышIыгъэх. Дунэе классикэм хэхьэгъэ произведениехэм адакIоу республикэм икомпозиторхэм аусыгъэхэр концерт- хэм нахьыбэрэ ащызэхэтхыхэ хъугъэх.
Лъэпкъ шIэжьыр
Тикомпозиторхэу Тхьабысымэ Умарэ, Нэхэе Аслъан, Тыкъо Къэплъан, КIыкI Хьисэ, Андзэрэкъо Чеслав, Гъот Аслъан, Хъупэ Мурат, нэмыкIхэм аусыгъэхэм лъэпкъ музыкальнэ искусствэр къагъэбаигъ. Адыгэмэ тарихъ гъогоу къакIугъэр композиторхэм япроизведениехэм къыраIотыкIы, неущрэ мафэм диштэу уагъэгупшысэ.
Мафэ горэм Израиль, Тыркуем, нэмыкIхэм къарыкIыгъэхэ тилъэпкъэгъухэр филармонием къэкIуагъэх. Симфоническэ оркестрэм концертым зыфигъэхьазырзэ, Хъупэ Мурат музыкантхэм Iоф адишIэщтыгъ. Лъэпкъ зэфэшъхьафхэр зыхэт оркестрэм адыгэ орэдхэр зэригъэжъынчыхэрэр, оркестрэм адыгэ хъулъфыгъэр пащэ зэрэфашIыгъэр IэкIыб къэралхэм къарыкIыгъэхэм ашIогъэшIэгъоныгъ.
Испанием къыщыхахыгъ
Испан динлэжьхэм ячылыс ипащэ Барселонэ къызэрэкIощтым икъэбар хэбзэ IофышIэхэм зызэхахым, зэрэпэгъокIыщтхэм егупшысагъэх. Хоровой капеллэм дирижер шъхьаIэу иIэщтым икъыхэхын зыфежьэхэм, нэбгырэ 300 фэдизмэ яIофшIакIэ кIырыплъыгъэх.
Къалэм иадминистрацие зэфэхьысыжьхэр ышIыгъэх, Хъупэ Мурат ыцIэ къыриIуагъ. Барселонэ зэхэхьэшхоу щыкIуагъэм М. Хъупэр япащэу артистхэр хэлэжьагъэх, орэдхэр къаIуагъэх. Iэшъхьэтетхэр, динлэжьхэр, искусствэр зышIогъэшIэгъонхэр къазэрэщытхъугъэхэм Адыгеим щыщхэри ыгъэгушIуагъэх.
Ыусыгъэхэм тядэIу
Симфоническэ оркестрэм пае ыусыгъэ произведениехэр пчыхьэзэхахьэхэм, мэфэкI концерт хэхыгъэхэм, фестиваль-зэнэкъокъухэм ащызэхэтэхых. Лъэпкъ шIэжьыр игупшысэхэм ащыпхырещы. ЧIыгум, Саусэрыкъо афэгъэхьыгъэхэр кIэлэеджакIохэм язэхахьэхэм нахьыбэрэ ащэIух.
Къэралыгъо Камернэ музыкальнэ театрэу А. Хьанэхъум ыцIэ зыхьырэм испектаклэу «Угощэ дэгъумэ, урихьылIагъ» зыфиIорэм орэдышъор Хъупэ Мурат ары фэзыусыгъэр.
— Искусствэм ыбзэкIэ узэдэгущыIэныр зымыуасэ щыIэп, — къытиIуагъ Адыгэ Республикэм икомпозиторхэм я Союз итхьаматэу, Урысыем, Адыгеим янароднэ артистэу Нэхэе Аслъан. — Илъэсыбэ хъугъэу Хъупэ Мурат Испанием щэпсэуми творческэ зэпхыныгъэхэр зэдытиIэх. Республикэм икомпозитормэ я Союз хэт. КIэу ытхыгъэ произведениехэм бэмышIэу тядэIугъ. Тимузыкальнэ искусствэ хэхъоныгъэ ышIыным Хъупэ Мурат хэлажьэ, тизэпхыныгъэхэр дгъэпытэщтых.
ЩытхъуцIэр
Урысыем идирижерхэм язэнэкъокъоу 1990-рэ илъэсым зэхащагъэм Хъупэ Мурат лауреат щыхъугъ. Испанием щыIэу хорым пэщэныгъэ дызэрехьэ, произведениехэр еусых. — Сэнэхьатэу къыхэсхыгъэр сшIогъэшIэгъон. Адыгеим сыпэчыжьэу сэпсэуми, сыгукIэ сыпэблагъ. СиIахьылхэм, ныбджэгъухэм адэжь сыкъызыкIокIэ сигушIогъошху.
М. Хъупэм къызэрэтиIуагъэу, искусствэм фэгъэхьыгъэ зэхахьэхэм ахэлажьэ, концертхэм яплъы. Испанием щыпсэухэрэм футболым мэхьанэшхо раты. Барселонэ икомандэ дунаим щыцIэрыIу, ау ащ иешIэгъухэм яплъынэу М. Хъупэр игъо ифэрэп. Политикэшхом фэгъэхьыгъэ Iофыгъохэм ахэлэжьэнэу ыгу къыриIорэп. Искусствэм ыбзэ зэкIэми къахегъэщы, гурыIогъошIоу елъытэ.
Лъэхъанэу зыхэтым елъытыгъэу мэгупшысэ, имурадхэр шIум, дэхагъэм япхыгъэх. Икъоджэ гупсэу Кощхьаблэ, Адыгеир гум икIыхэрэп. Мыекъуапэ къызыкIокIэ, «Адыгэ макъэм» иредакцие къычIэмыхьэу, гущыIэгъу тызэфэмыхъоу зыкIи къыхэкIырэп. Искусствэр ищыIэныгъэ щыщ зэрэхъугъэм емызэщэу къытегущыIэным фэхьазыр.
Хъупэ Мурат имэфэкI мы мафэхэм хегъэунэфыкIы. Культурэм, искусствэм яIофышIэхэм, тигъэзетеджэхэм ацIэкIэ тыпфэгушIо, Мурат! Тхьэм нарт бэгъашIэ, насыпышIо уешI. Опсэу!