Исэнэхьат фэшъыпкъ
ШъхьэкIумыдэ Нурыет ищыIэныгъэ хъугъэ-шIагъэхэм къагъэбаигъ. ЛIэужхэр зэзыпхырэ къэбарэу къыIуатэрэр икъоу зэрэтымытхыгъэм тигъэгумэкIызэ, зэфэхьысыжьхэр тэшIых.
Хьащтыку, Псэйтыку, Афыпсыпэ, Пэнэхэс ацIэхэр къетIохэ зыхъукIэ, зэпэгъунэгъу къуаджэхэм ащапIугъэ артистхэм, тхакIохэм, орэдыIохэм гуфэбэныгъэ зыхэлъ гущыIэхэмкIэ талъыIэсы тшIоигъу: Жэнэ Къырымыз, Сэмэгу Гощнагъу, Лъэцэрыкъо Ким, Хъурмэ Марыет… Къоджэ цIыкIоу Хьащтыку къыщыхъугъэ ШъхьэкIумыдэ Нурыет хэгъэгум щызэлъашIэрэ цIыфышхо зэрэхъугъэр гум иорэд фэтэгъадэ.
Апэрэхэм ащыщ
Адыгеим щыщхэу Москва ГИТИС-р апэу къыщызыухыгъэхэм Н. ШъхьэкIумыдэр ахэтыгъ. Лъэхъаныр къызэрыкIоу щытыгъэп. 1936 — 1941-рэ илъэс еджэгъухэм ауж мамыр IофшIэнэу агъэцэкIэщтым театрэм иинститут къэзыухыгъэхэр егупшысэхэзэ, Хэгъэгу зэошхор къежьагъ.
Урыс къэралыгъо драматическэ театрэу А. Пушкиным ыцIэ зыхьырэм спектаклэу къыщагъэлъэгъощтхэм ахэлэжьэнхэу артист ныбжьыкIэхэм загъэхьазырыщтыгъ. Москва щезыгъэджагъэхэм ащыщэу К. Тупоноговыри ягъусагъ.
— Фашист техакIохэр тихэгъэгу къызэрэтебэнагъэхэм къыхэкIэу хъулъфыгъэу къытхэтхэр театрэм чIэкIыхи, заом имашIо пэIухьагъэх, — къеIуатэ ШъхьэкIумыдэ Нурыет. — Апэрэ артистхэр сщыгъупшэхэрэп. Заом лIыхъужъныгъэ щызэрахьагъ, Адыгеим къызагъэзэжьым литературэм, искусствэм цIэрыIо ащыхъугъэх.
Заом ыкIыб
Артистэу Анатолий Гариным къызэритхыжьыгъэу, 1941-рэ илъэсым заом къыщауIагъэхэр Мыекъуапэ къащэхэзэ щяIазэщтыгъэх. Офицер, дзэкIолI пчъагъэ тикъалэ щагъэхъужьыхи, икIэрыкIэу пыйхэм апэуцужьыгъэх. Киев театральнэ институтыр къыщызыухыгъэ Сергей Самульчик Мыекъуапэ дэт театрэм блэкIызэ мэкъэгъэIоу тетхагъэр ылъэгъугъ. «Сэ сыартист, сыкъауIагъ, госпиталым сыщыIэщт», — тыритхагъ мэкъэгъэIу пхъэмбгъум С. Самульчик.
Къэбарыр артистхэу ШъхьэкIумыдэ Нурыетрэ ЛIыбзыу Софэрэ алъагъэIэсыгъ. Зэпшъэшъэгъухэм госпиталыр къагъотыгъ, артист уIагъэм IукIагъэх. Гъомылапхъэр фахьызэ, ифэIо-фашIэхэр фагъэцакIэхэзэ, С. Самульчик ипсауныгъэ зыпкъ иуцожьыгъ.
1959-рэ илъэсым Сергей Самульчик Киев иконцертнэ ансамбль ипащэу Iоф ышIэзэ, ШъхьэкIумыдэ Нурыетрэ ЛIыбзыу Софэрэ адэжь къакIуи, «тхьашъуегъэпсэу» къариIожьыгъагъ.
ЕплъыкIэхэр
— Москва щеджи, Адыгеим итеатральнэ искусствэ апэрэ лъагъохэр фэзышIыгъэхэм ШъхьэкIумыдэ Нурыет ащыщ. Илъэс 50 нахьыбэрэ исэнэхьаткIэ Iоф ышIагъ. Спектаклэхэм роль 200-м нахьыбэ къащишIыгъ. ЦIыфыгъэу, Iэдэбэу хэлъыр изекIокIэ-шIыкIэхэм къахэщы. Урысыем итеатрэхэм яIофышIэхэм я Союз ипащэу Александр Калягиным къызэрэтиIуагъэу, ШъхьэкIумыдэ Нурыет шIушIагъэу иIэмкIэ лIэуж пчъагъэхэм щысэ афэхъу, — иеплъыкIэхэм тащегъэгъуазэ Адыгеим итеатрэхэм яIофышIэхэм я Союз ипащэу, Урысыем изаслуженнэ артистэу, Адыгэ Республикэм инароднэ артистэу Зыхьэ Заурбый. — ТиунагъохэмкIэ ныбджэгъуныгъэ зэдытиI…
Н. ШъхьэкIумыдэм ишъхьэгъусэу Къуныжъ Мыхьамэт литературэм щыцIэрыIу, Адыгэ къэралыгъо университетым илъэсыбэрэ щыригъэджагъэх. Искусствэм, спорт къэбархэм защигъэгъозэныр шэнышIу фэхъугъ.
— Адыгеим и Урыс къэралыгъо театрэ икъэгъэлъэгъонэу шъонтырпаом ехьылIагъэм сеплъызэ, Нурыет сынаIэ тесыдзагъ. Артистхэм янэшанэхэр гурыIогъошIоу ыгъэпсыщтыгъэх. Ролэу къышIырэм псэ къыпигъакIэзэ, шIыкIэу къыгъотыгъэр зыми фэмыдэу слъытагъэ, — тизэдэгущыIэгъу лъегъэкIуатэ Урысыем изаслуженнэ артисткэу, Адыгеим инароднэ артисткэу Зыхьэ Мэлайчэт. — Шъэбагъэ хэлъэу, гум лъыIэсырэ цIыфэу, образэу къыгъэлъагъорэм залым чIэсхэр хищэнхэ ылъэкIэу зэрэщытыр спектаклэхэм ащызгъэунэфыгъ.
Къэралыгъо телерадиокомпаниеу «Адыгеим» Зыхьэ Мэлайчэт Iоф щишIэзэ Н. ШъхьэкIумыдэм зэдэгущыIэгъухэу дыриIагъэхэр непи щыгъупшэхэрэп. УпчIэм джэуапэу къыритыжьырэмкIэ цIыфыр ыгъэгъозэн зэрилъэкIырэр бэмэ агъэшIагъощтыгъ. Гушъхьэ кIуачIэу къыпхилъхьэрэр зыгъэпытэрэр шъыпкъэр занкIэу къыуиIозэ, зэфэхьысыжьхэр зэрэуигъэшIыхэрэр ары.
— ЦIыфым щыIэныгъэм еплъыкIэу фыриIэр иIофшIагъэ къегъэлъагъо, — къеIуатэ Адыгэ Республикэм искусствэхэмкIэ изаслуженнэ IофышIэшхоу, режиссерэу, Лъэпкъ театрэу И. Цэим ыцIэ зыхьырэм иартистэу Хьакъуй Аслъан. — Типчыхьэзэхахьэхэм Нурыет ахэлажьэ, нэрылъэгъу IэпыIэгъухэу театрэм чIэтхэм яплъы зыхъукIэ, артистхэм, режиссерхэм яIофшIагъэ уасэ зэрэфишIырэр тшIогъэшIэгъон. Сурэтхэм яплъызэ, спектаклэхэм IупкIэу, зэгъэфагъэу къатегущыIэ. ЦIыфым щытхъоу фиIорэм зэгъэпшэнхэр уегъэшIых. Нурыет сиупчIэжьэгъу цIыфхэм ащыщ.
— ШъхьэкIумыдэ Нурыет сымыпшъэу бэрэ сыкъытегущыIэн слъэкIыщт, — игупшысэхэм тащегъэгъуазэ республикэм и Урыс театрэу А. Пушкиным ыцIэ зыхьырэм иартистэу, Адыгеим инароднэ артистэу Александр Конюховым. — 1981-рэ илъэсым театрэм Iоф щысшIэнэу зесэгъажьэм ШъхьэкIумыдэ Нурыет нахь благъэу нэIуасэ сыфэхъугъ. КъыбдэгущыIэзэ уепIу. Театрэм и мэлаIичэу ар сэлъытэ. Артистым ролыр къышIызэ, сэнаущыгъэу хэлъыр къызэрэзэIуихырэм Нурыет сыдигъуи лъыплъэщтыгъ. Образым узэрэхэхьащт шIыкIэм уфагъасэзэ, ыгу зэIухыгъэу къыуатэ, ролым псэ къыпегъакIэ.
УзэплъэкIыжьмэ плъэгъурэр
Журналист Iофхэр згъэцакIэхэзэ, Нурыетрэ Мыхьамэтрэ адэжь пчъагъэрэ сыкIуагъ. Мыхьамэт литературэмкIэ сыригъэджагъэшъ, спортыри икIасэшъ, упчIэу къыситыщтым бэрэ лъыхъурэп.
— Хэгъэгу зэошхом илъэхъан сщыгъупшэрэп, — къеIуатэ ШъхьэкIумыдэ Нурыет. — Хъугъэ-шIагъэхэм сафызэплъэкIыжьы. Творчествэм пылъхэм, артистхэм ТекIоныгъэм и Мафэ къызэрагъэблагъэщтыгъэр нахьыбэрэ журналистхэм къатхын фаеу сэлъытэ…
Зэо илъэсхэм фронтым иконцерт купхэм Нурыет ахэтэу тидзэкIолIхэм зэхахьэхэр афызэхащэщтыгъэх. Хьылъэу уIэгъэ цIыфхэм ыгу къызэраIэтыщтыгъэр артисткэ цIэрыIом щыгъупшэрэп.
1959-рэ илъэсым РСФСР-м изаслуженнэ артисткэ хъугъэ, Адыгэ Республикэм инароднэ артистк, медальхэр къыфагъэшъошагъэх. Краснодар краим идепутатхэм я Совет гъогогъуитIо хадзыгъ, театрэм ипартийнэ организацие илъэс 15 ипэщагъ. Мамырныгъэм икъэухъумэнкIэ Адыгэ хэку комитетым хэтыгъ, Мыекъуапэ икъэлэ Совет идепутатэу щытыгъ.
Классикэм хэхьагъэхэ произведениехэу Н. Гогол, Ф. Шил- лер, К. Симоновым, М. Светловым, нэмыкIхэм атхыгъэхэм атехыгъэ къэгъэлъэгъонхэм рольхэр къащишIыгъ. Адыгеим итхакIохэу А. Еутыхым, Ю. Лъэустэным, фэшъхьафхэм ятворчествэ яхьылIэгъэ къэгъэлъэгъонхэм ахэлэжьагъ.
Муслим Магомаевыр яхьэкIагъ
1998-рэ илъэсым дунаим щыцIэрыIо орэдыIоу Муслим Магомаевым Мыекъуапэ концертэу къыщитыгъэм ШъхьэкIумыдэ Нурыетрэ Къуныжъ Мыхьамэтрэ артистым ригъэблэгъагъэх. Муслим янэу Къэнджал Айщэтрэ Нурыетрэ театрэм Iоф щызэдашIагъ. Айщэт Щынджые щыщ. М. Магомаевыр Нурыет ыдэжь зэкIом къэбарэу къызэфаIотагъэр шъхьафэу къыхэтыуты тшIоигъу. ТекIоныгъэм ия 75-рэ илъэс фэгъэхьыгъэ гукъэкIыжьхэри бэмэ ашIогъэшIэгъон хъущтэу тэлъытэ.
ШъхьэкIумыдэ Нурыет ыныбжь илъэс 99-рэ зэрэхъугъэм фэгъэхьыгъэу артисткэ цIэрыIом, унагъом тафэгушIуагъ.
Нурыет, театрэм и МэлаIи- чэу узэралъытэрэм тегъэгушхо. УишIушIагъэ, цIыфхэм гуфэбэныгъэу афыуиIэр Тхьэм къыуигъэтэжьыхэзэ гъашIэр къэохьы. УимэфэкI фэгъэхьыгъэу искусствэм иIофышIэхэм, тигъэзетеджэхэм ацIэкIэ тыпфэгушIо. Опсэу, Нурыет!
ЕмтIылъ Нурбый.