Адыгэ Республикэм и Къэралыгъо орэдыIо-къэшъокIо ансамблэу «Ислъамыем» онлайн-концертхэр къетых, пчыхьэзэхахьэхэр зэхищэнхэ имурад.

— МэфэкIхэм, хъугъэ-шIагъэ­хэм афэгъэхьыгъэ зэIукIэгъухэр цIыфхэм ашIогъэшIэгъоных, — къытиIуагъ «Ислъамыем» ихудожественнэ пащэу, Урысыем, Адыгеим, Къэрэщэе-Щэрджэсым янароднэ артистэу, композиторэу, Дмитрий Шостакович ыцIэкIэ агъэнэфэгъэ шIухьафтыныр къызыфагъэшъошагъэу Нэхэе Аслъан. — Тилъэпкъэгъухэу Iэ­кIыб къэралхэм ащыпсэурэмэ тиорэдхэр къафэтэIох, адыгэ къашъохэр къафэтэгъэлъагъох. Искусствэм цIыфхэр зэрэзэфищэхэрэм тыкъыпкъырыкIызэ, дгъэ­цэкIэщт Iофыгъохэм тягу­пшысэ.

Мин 60 еплъыгъ

Хэкужъым къэзыгъэзэжьыгъэм и Мафэ ехьылIэгъэ концертым Иорданием, Сирием, США-м, Из­раиль, Тыркуем, Норвегием, Германием, фэшъхьафхэм ащы­псэухэрэр еплъыгъэх.

— ИнтернетымкIэ «Ислъамыем» инэкIубгъо нэбгырэ мин 60 къыщытэплъыгъ, — тизэдэгущы­Iэгъу къыхэлажьэ «Ислъамыем» иоркестрэ ипщынаоу, Адыгэ Республикэм инароднэ артистэу Мышъэ Андзаур. — ТелефонкIэ къытфытеох, «тхьашъуегъэпсэу» къытаIожьы. Дунаим тет адыгэхэр тиконцерт зэреплъыгъэхэр Иорданием щыщхэм ашIогъэ­шIэгъон, якIэсэ орэдхэм къакIэлъэIугъэх.

МэкъумэщышIэхэм апае шы­шъхьэIум и 20-м онлайн-концертэу «Ислъамыем» къытыгъэм гуфэбэныгъэу хэлъыр дунэе къэбар хъугъэ.

Композиторэу Нэхэе Аслъан къашъом фэгъэхьыгъэ произ­ведениеу ыусыгъэм уедэIузэ, лъэпкъ гупшысэхэр уегъэшIых. Къашъом гушIуагъоу хэплъагъо­рэм, искусствэм купкIэу иIэм Нэхэе Аслъан иорэдышъокIэ къыреIотыкIых.

Коцыр зэрэIуахыжьырэм, колхозым зэрэщылажьэхэрэм, къо­джэ щыIакIэм, нэмыкIхэм яхьы­лIэгъэ орэдхэр «Ислъамыем» къыIуагъэх. Дзыбэ Руслъан «Мэкъуаомэ яорэд» къыхидзи, артистхэр дежъыугъэх.

ХъокIо Сусан, Агъыржьэнэкъо Саныет, Къумыкъу Щамсудин, МэщбэшIэ Саидэ лъэпкъ орэдхэр къаIуагъэх. Тыгъужъ Асыет, Нэгъой Азэ мэкъэ IэтыгъэкIэ адыгэ орэдхэр къыхадзагъэх, тигуапэу тядэIугъ.

Къашъоу «Ислъамыер» Зе­кIогъу Бислъанрэ Лъэустэнджэл Рузанэрэ гум рихьэу къагъэ­лъэгъуагъ, адыгэ шъуашэм идэхагъи къыхагъэщыгъ. Лъэустэнджэл Рузанэ илъэс 15-м къе­хъугъэу «Ислъамыер» къызэри­шIырэр искусствэм пыщагъэхэм ашIогъэшIэгъон. Ижъырэ лъэпкъ къашъоу «ЗэфакIор» ЗекIогъу Бислъанрэ Ахътао Светланэрэ къашIыгъ.

Оркестрэм хэтыхэу Лъэцэр Свет­ланэ, Мышъэ Андзаур, Мы­шъэ Азэмат япщынэхэр агъэбзэ­рабзэзэ, Нэхэе Аслъан ансамблэм пае зэригъэфэгъэ произведениехэр агъэжъынчыгъэх.

Бжыхьэм мэфэкI концертхэу, нэмыкI Iофтхьабзэхэу Адыгэ Республикэм щыкIощтхэм «Ислъамыем» зафегъэхьазыры, орэ­дыкIэхэр артистхэм зэра­гъашIэх.

Сурэтым итхэр: «Ислъамыер» концертхэм ахэлажьэ.