Бзылъфыгъэ гандбол клубэу «Адыифым» ипа­щэу Къудайнэт Мэджыдэ 2020 — 2021-рэ илъэс ешIэгъур суперлигэм зэрэщырагъажьэрэм фэгъэхьыгъэу гущыIэгъу тыфэхъугъ.

— Мыекъопэ «Адыифым» шышъхьэIум и 23-м илъэс ешIэгъур тикъалэ щырегъажьэ, — къытиIуагъ Къудайнэт Мэджыдэ.

— Хэта «Адыифыр» зыIукIэщтыр?

— Урысыем икомандэ анахь лъэшхэм ащыщэу «Астраханочкэм» «Адыифыр» дешIэщт.

— Республикэм испорт Унэшхоу «Ошъутенэм» зэIукIэгъур щызэхащэщтэу макъэ къытагъэIугъ.

— Адыгэ къэралыгъо университетым испорт Унэшхоу Кобл Якъубэ ыцIэ зыхьырэм ешIэпIэ дэгъу щытиI. Зэпахырэ узым къыхэкIэу зэIукIэгъур «Ошъутенэм» щызэхэтщэщт.

— Спортыр зышIогъэшIэ­гъонхэр ешIэгъум еплъынхэ алъэкIыщта?

— Хьау, залым ахэр чIэдгъэ­хьанхэу тыфитэп. Апэрэ ешIэ­гъуитIур арэущтэу кIощт. Уахътэр лъыкIуатэмэ зэIукIэгъухэр зыщызэхэтщэщтхэм шъхьафэу тытегущыIэ сшIоигъу.

— Дэгъу, ащкIэ тызэзэ­гъыгъэу тэлъытэ. «Адыифым» изэ­хъокIыныгъэхэм татегъэ­гущыI.

— «Астраханочкэм» щешIэщтыгъэхэ Дарья Богдановамрэ Галина Измайловамрэ гандболым хэгъозагъэх, яIэпэIэсэныгъэкIэ тагъэгушIощтэу тагъэгугъэ. Ставрополь икомандэ къыхэтщыгъэ Елена Стрельцовар «Адыифым» дэгъоу щешIэщтэу тэлъытэ.

— «Адыиф-2-м» укъытегущыIагъэп.

— ЕшIэкIо ныбжьыкIэхэм та­лъэплъэ. УплъэкIун ешIэгъухэм IэпэIэсэныгъэ дэгъу къащигъэ­лъэгъуагъ къэлэпчъэIутэу Юлиана Скнарь. «Адыифым» ар тштагъэ.

— «Адыифым» итренер шъхьа­Iэу Никита Голуб иIэнатIэ зыIутыр бэшIагъэп. Егъэ­жьапIэу ышIыгъэхэм сыда къя­пIолIэщтыр?

— Республикэм щапIугъэ пшъа­шъэхэр арых нахьыбэ хъухэу «Адыифым» щешIэщтхэр. Урысыем икIэлэеджакIохэм я Спартакиадэ Адыгеим икомандэ апэрэ чIыпIэр къыщыдихыгъ, пшъашъэхэм Никита Голуб пэщэныгъэ адызэрихьагъ. ЕшIа­кIохэм ясэнаущыгъэ къызэIуа­хынымкIэ тренерым IофшIакIэу ыгъэфедэрэм тегъэразэ.

— Командэр ыпэкIэ лъыкIо­тэным фэшI уахътэ ищыкIагъэу олъытэба?

— Джэнчэтэ СултIанэ Адыгеим игандбол лъэпсэшIу фишIыгъ. Ащ ригъэжьэгъэ Iофыр тренер шъхьаIэу Никита Голуб тыри­гъусэу лъыдгъэкIотэщт.

— 2020 — 2021-рэ илъэс зэнэкъокъум «Адыифым» пшъэ­рылъэу зыфишIыжьыгъэр къытаIоба.

— Суперлигэм командэ 12 хэт, я 7 — 8-рэ чIыпIэхэм та­фэбэнэщт.

— КъызэрэпIорэмкIэ, «Адыи­фыр» ауж къинэрэ командэхэм къахэкIыжьыщт.

— КъызгурэIо, пшъэрылъэу зыфэтшIыжьыгъэр къызэрыкIоп, арэу щытми, амалыкIэхэм та­лъыхъущт, спортым пыщагъэхэу къытфэгумэкIыхэрэр нахьыбэрэ зэрэдгъэгушIощтхэм тыпылъыщт.

— ЕшIэкIо дэгъухэр «Адыифым» хэтых.

— Кобл Зурыет, Ирина Клименкэм, Анастасия Серадскаям, Светлана Кожубековам, нэмыкIхэу гандболым хэгъоза­гъэхэу «Адыифым» хэтхэм, кIэу къедгъэблэгъагъэхэм ешIэкIэ дахэ къагъэлъэгъощтэу тагъэгугъэ.

— ЯтIонэрэ ешIэгъур сыдигъуа зышъуиIэщтыр?

— ШышъхьэIум и 27-м «Адыи­фыр» «Динамэм» «Ошъутенэм» щыIукIэщт.

— Шъуимурадхэр къыжъудэ­хъунхэу шъуфэтэIо.

— Тхьауегъэпсэу.

Сурэтхэм арытхэр: Къудайнэт Мэ­джыд; «Адыифым» иешIэгъу.