Тикъэгъэлъэгъонхэр Налщык щыкIощтых
Адыгэ Республикэм и Къэралыгъо камернэ музыкальнэ театрэу Хьанэхъу Адамэ ыцIэ зыхьырэм спектаклэхэр егъэуцух, Къэбэртэе-Бэлъкъарым кIонэу зегъэхьазыры.
— Урысые федеральнэ Iофтхьабзэу «Гастроль инхэр» зыфиIорэм тыхэлажьэ, — къытиIуагъ Камернэ музыкальнэ театрэу А. Хьанэхъум ыцIэ зыхьырэм ихудожественнэ пащэу, Урысыем, Адыгеим искусствэ- хэмкIэ изаслуженнэ IофышIэшхоу Сулейманов Юрыс. — Хэгъэгум икъэралыгъо Iофыгъохэм тиспектаклэхэр къащыдгъэлъэгъоным мэхьэнэ ин етэты. Ткъош Къэбэртэе-Бэлъкъарым тырагъэблэгъагъ.
Iоныгъом и 9-м Къуекъо Налбый ытхыгъэм техыгъэу «Рыу, сибэщыр!» урысыбзэкIэ театрэм Налщык къыщигъэлъэгъощт. Андрей Семеновым икъэлэмыпэ къычIэкIыгъэ «Ослепленнэхэр» искусствэр зышIогъэшIэгъонхэм лъэшэу агу рехьы.
ЛъэкI ин зиIэмрэ IофшIэн зымыгъотырэ цIыфэу гъогу пхэндж тыращагъэмрэ щыIэныгъэм еплъыкIэу фыряIэр зэрэзэпэчыжьэр, цIыфыгъэ зепхьаным имэхьанэ артистхэм узыIэпащэу къагъэлъагъо. ЯтIонэрэ спектаклэр Iоныгъом и 2-м Къэбэртэе- Бэлъкъарым щыкIонэу щыт.
Театрэм Мыекъуапэ къызигъэзэжьыкIэ Оффенбах ытхыгъэу Италием щыщхэм япчыхьэзэха- хьэ фэгъэхьыгъэр режиссерэу Ю. Сулеймановым ыгъэуцущт.
АдыгабзэкIэ агъэуцу
«Угощэ дэгъумэ, урихьылIагъ» зыфиIоу Цэй Ерстэм ипьесэ техыгъэр икIэрыкIэу камернэ музыкальнэ театрэм щагъэуцужьы. Композиторэу, Адыгеим искусствэхэмкIэ изаслуженнэ IофышIэшхоу Хъупэ Мурат орэдышъор ыусыгъ.
Рольхэр къэзышIыхэрэм ащыщэу ЛIый Бэллэ къызэриIуагъэу, къэгъэлъэгъоныр щыIэныгъэм къыхэхыгъэу гъэпсыгъэ, шIогъэшIэгъонэу хэлэжьэщт.
Адыгэ шэн-хабзэхэм къэшIыныр афэгъэхьыгъ. Унагъом нысэу къыфащагъэр гуащэм езэгъырэп. КIэракIэу зыфэпэныр ыгу рехьы. Къоджэ щыIакIэм адыгэ унагъом чIыпIэу щыриIэм, узэдэIужьмэ узэгурыIон зэрэплъэкIыщтым, нахьыжъым шъхьэкIафэ фэпшIын зэрэфаем яхьылIэгъэ къэгъэлъэгъоныр Мыекъуапэ, районхэм ащыкIощт.