Зэнэкъокъур Ижевскэ щыкIощт
Урысыем кушъхьэфэчъэ спортымкIэ изэнэкъокъу шышъхьэIум и 20-м къалэу Ижевскэ щырагъэжьэщт.
Адыгэ Республикэм кушъхьэфэчъэ спортымкIэ иеджапIэ зыщызыгъасэхэрэр хэгъэгум изэIукIэгъухэм ахэлэжьэщтых.
Елизавета Ошурковар, Елизавета Артибасовар, Ольга Дейко, Тамара Рицевар Ижевскэ кIуагъэхэм ащыщых. Урысыем кушъхьэфэчъэ спортымкIэ ихэшыпыкIыгъэ командэ хэтэу Елизавета Ошурковам къызэриIуагъэу, Ижевскэ щызэхащэрэ зэнэкъокъур спортсменкэхэм уплъэкIун дэгъу афэхъущт.
Типшъашъэхэр купым хэтхэу, нэбгырэ тIурытIу хъухэу хэгъэгум изэнэкъокъу хэлэжьэщтых. Елизавета Ошурковам джырэблагъэ дышъэр Урысыем изэнэкъокъу къыщихьыгъ, Олимпиадэ джэгунхэм зафегъэхьазыры.