Европэм футболымкIэ ичемпионхэм я Кубок къыдэхыгъэным фэгъэхьыгъэ зэIукIэгъухэр гъэшIэгъонэу макIох.

ЕшIэгъухэм якIэуххэр зэд­гъапшэхэзэ «Бавариер» «Барселонэм» 8:2-у зэрэтекIуагъэр къыхэтэгъэщы. Пчъагъэр 4:2-у «Баварием» текIоныгъэр ыхьызэ, «Барселонэм» ешIэгъум зэ­хъокIыныгъэ фишIынэу гугъэ иIагъ.

Арэу щытыгъэми, Германием икомандэу «Баварием» текIоныгъэр зыIэкIигъэкIыгъэп. Я 84-рэ такъикъым 6:2 пчъагъэр хъугъэ, я 85-рэ ыкIи я 89-рэ такъикъхэм «Баварием» пчъагъэм хигъэ­хъуагъ — 8:2.

Испанием икомандэ цIэрыIоу «Барселонэм» ащ фэдэ пчъа­гъэкIэ къытекIохэу зыкIи къы­хэкIыгъэп. «Баварием» иешIэкIо дэгъоу Роберт Левандовскэм зэрилъытэрэмкIэ, Германием икомандэ текIоныгъэм нахь фэхьазырыгъ.

Дунаим щызэлъашIэрэ Леонель Месси «Барселонэм» щешIагъ. Ащ къызэриIуагъэмкIэ, ешIэгъум кIэухэу фэхъугъэм лъэшэу ыгъэ­гумэкIыгъ. «Барселонэм» зэ­хъокIыныгъэ инхэр зыфамы­шIыхэкIэ, Л. Месси клубэу илъэ­сыбэрэ зыхэтыгъэм хэ­кIыжьын имурад.

Англием, Италием якомандэхэм Л. Месси арагъэблагъэ. Урысыем икомандэхэу «Зенит», «Краснодар», нэмыкIхэм аще­шIэнэу ар зэрэфэмыем тыщы­гъуаз.

Сыд фэдэ футбол клуб Л. Месси къыхихыщтми, ешIэкIэ дахэ къыгъэлъэгъонэу тежэ. Футболым бгъэшIэгъонэу макIэп хэхъухьэрэр. Италием икомандэу «Интер» зыфиIорэр 5:0-у Украинэм икомандэу «Шахтерым» текIуагъ. Европэм икубокхэр зыхьыщтхэр шIэхэу къэнэфэщтых.