Хэгъэгум кушъхьэфэчъэ спортымкIэ изэнэкъокъу Самарэ щэкIо. Хъулъфыгъэхэри, бзылъфыгъэхэри зэIукIэгъухэм ахэлажьэх.

Зэнэкъокъум иапэрэ мафэ бзылъфыгъэхэм километрэ 27-рэ хъурэ гъогум яIэпэIэсэныгъэ къыщагъэлъэгъуагъ. Адыгэ Республикэм кушъхьэфэчъэ спортымкIэ иеджапIэ зыщызыгъэсэрэ Елизавета Ошурковам такъикъ 36.48-кIэ километрэ 27-р къыкIуи, Урысыем апэрэ чIыпIэр къыщыдихыгъ.

Санкт-Петербург испортсменкэ цIэрыIоу Мария Новолодцкаям ятIонэрэ чIыпIэр ыхьыгъ. Москва щыщэу Тамара Дроновам джэрзыр фагъэшъошагъ.

Адыгэ Республикэм кушъхьэфэчъэ спортымкIэ и Федерацие ипащэу Анатолий Лелюк къызэрэтиIуагъэу, Елизавета Ошурковар Урысыем ихэшыпыкIыгъэ командэ хэт, Олимпиадэ джэгунхэм зафегъэхьазыры.

Урысыем кушъхьэфэчъэ спортымкIэ изэнэкъокъу лъэкIуа­тэ. ШышъхьэIум и 15-м хъулъфыгъэхэм километри 180-рэ хъурэ гъогум яухьазырыныгъэ щауплъэкIущт. Хэгъэгум ихэшыпыкIыгъэ командэ хэтэу, спортымкIэ дунэе класс зиIэ СтIашъу Мамыр зэIукIэгъухэм ахэлэжьэщт.

Бзылъфыгъэхэр километри 130-рэ хъурэ гъогум щызэнэкъо­къущтых. Елизавета Ошурковар хагъэунэфыкIырэ чIыпIэхэм афэбэнэщтхэм ащыщ.