Футбол клубэу «Зэкъошныгъэм» 2020 — 2021-рэ илъэс зэнэкъокъур шышъхьэIум и 9-м ригъэжьэщт.

Урысыем изэнэкъокъоу ятIо­нэрэ купэу «Къыблэм» щыкIощтым «Зэкъошныгъэр» щешIэщт.

«Къыблэм» хэтхэр

«Зэкъошныгъ» Мыекъуапэ «Спартак» Налщык «Алания» Владикавказ «Биолог» Новокубанск «Махачкала» Махачкала «Анжи» Махачкала «Форто» Таганрог «Легион» Махачкала СКА Ростов-на-Дону «Урожай» Краснодар «Есентуки» Есентуки «ТIуапсэ» ТIуапсэ «Мэщыкъу» Пятигорск «Черноморец» Новороссийск «Краснодар-3» Краснодар «Интер» Щэрджэcкъал «Динамо» Ставрополь.

«Зэкъошныгъэм» иешIакIохэр

КъэлэпчъэIутхэр: Гиголаев Давид Ковалев Роман Орехов Валерий

УхъумакIохэр, гупчэм ыкIи ыпэкIэ щешIэхэрэр

Белов Константин Хьагъур Руслъан Бабенко Сергей Делэкъо Аскэр Дыхъу Тимур Делэкъо Мурат Ещенко Олег Мамонов Антон Къонэ Амир Крылов Денис Шъхьэлэхъо Амир Каракоз Станислав Власов Валентин ХьакIэмыз Нарт Хьасаныкъо Амир Гъыщ ТIахьир ХъуакIо Темыр Манченко Юрий Такълый Руслъан

Тренерхэр

Ешыгоо Сэфэрбый — тренер шъхьаI. Тучинский Эдуард — тренер шъхьаIэм игуадз. Футбол клубэу «Зэкъошны­гъэм» ипащэр ХъуакIо Къэплъан.

ЯIэпэIэсэныгъэ хагъэхъощт

Адыгэ Республикэм изаслуженнэ тренерэу Ешыгоо Сэфэрбый тизэдэгущыIэгъу къыщыхигъэщыгъэм тигъэгушIуагъ.

— Республикэм щапIугъэхэ кIалэхэр арых нахьыбэ хъухэу «Зэкъошныгъэм» тштагъэхэр. ЧIыпIэ футболыр къэIэтыгъэным фэшI Адыгеим икIэлэцIыкIу-ныбжьыкIэ спорт еджапIэхэм ащагъэсагъэхэр тикомандэ щедгъэшIэщтых, — къытиIуагъ Ешыгоо Сэфэрбый.

2019 – 2020-рэ илъэс зэнэкъо­къум «Зэкъошныгъэм» хэтыгъэхэ Мурад Омаровыр, Артем Кирьян, Ризван Ахмедхановыр, Тофик Кадимовыр, Денис Замятиныр, фэшъхьафхэри «Зэкъошныгъэм» хэкIыжьыгъэх. Адыгеим щыщ кIалэхэу командэм аштагъэхэм яIэпэIэсэныгъэ хагъэхъонэу, ешIэ­кIэ дэгъу къагъэлъэгъонэу афэтэIо.

Апшъэрэ купыр

Урысыем футболымкIэ изэ­нэкъокъоу апшъэрэ купым щыкIорэм командэ 16 хэт. «Зенит» «Локомотив» «Краснодар» ЦСКА «Ростов» «Дианмо» «Спартак» «Арсенал» «Уфа» «Рубин» «Урал» «Шъачэ» «Ахмат» «Тамбов» «Ротор» «Химки» Илъэс зэнэкъокъур шышъхьэ­Iум и 8-м аублэ.

ЗэхъокIыныгъэхэр

Денис Глушаковыр «Ахмат» хэкIыжьыгъ. Александр Карапетян «Шъачэ» хэтыжьэп. Анахь тшIогъэшIэгъоныр Александр Кокориныр «Шъачэ» зыхэ­кIы­жьым, «Спартак» Москва зэраштагъэр ары. Остон Уруновыри «Спартак» рагъэблэгъагъ.

«Спартак» ипащэхэм къызэраIорэмкIэ, командэр медальхэм, Европэм и Кубок афэбэнэн имурад.

Физкультурникым и Маф

2020 — 2021-рэ илъэс ешIэ­гъур физкультурникым и МафэкIэ аублэ.

Псауныгъэм икъэухъумэн Iофыгъо шъхьаIэхэм ащыщ. Аужырэ илъэсхэм Урысыем физкультурэм, спортым афэгъэхьыгъэ зэнэкъокъухэу щызэхащэхэрэм япчъагъэ нахьыбэ хъугъэ. Адыгэ Республикэр зэIукIэгъухэм чанэу ахэлажьэ.

IофшIэным, хэгъэгум икъэухъу­мэн афэхьазырхэу ГТО-м ишапхъэхэр игъэкъугъэнхэмкIэ физкультурэм пыщагъэхэм гъэхъагъэхэр ашIых. Мыекъуапэ икIэлэеджэкIо купэу «Вертикалым» Урысыем изэнэкъокъу апэрэ чIыпIэхэр къыщыдихыгъэх.

Физкультурэм щырагъажьи спортым цIэрыIо щыхъугъэхэ Александр Евтушенкэр, СтIашъу Мамыр Урысыем кушъхьэфэчъэ спортымкIэ ихэшыпыкIыгъэ командэ хэхьагъэх. ДзюдомкIэ хэгъэгум ихэшыпыкIыгъэ командэ хэтых Ордэн Андзаур, Мерэм Дамир, нэмыкIхэри.

Спорт псэуалъэхэм къахэхъо

Адыгэ Республикэм аужырэ илъэс заулэм республикэ стадионхэу «Зэкъошныгъэр», «Юностыр», спорт Унэшхохэу Кобл Якъубэ ыцIэ зыхьырэр, «Ошъутенэр», фэшъхьафхэри щашIы­гъэх. Теуцожь, нэмыкI районхэм шэпхъэ лъагэхэм адиштэхэу спорт псэуалъэхэр къащызэIуахыгъэх.

Футбол ешIапIэхэм япчъагъи хэпшIыкIэу хэхъуагъ. Адыгеим щапIугъэ кIалэхэр Мыекъопэ «Зэкъошныгъэм» аштэнхэм, футболыр къэIэтыгъэным фэшI Iофыр анахьэу зэлъытыгъэр чIыпIэ пащэхэр арых.

Атлетикэ онтэгъумкIэ, самбэмкIэ, баскетболымкIэ, спорт гимнастикэмкIэ, волейболымкIэ, нэмыкIхэмкIи республикэм щагъэсагъэхэр хэгъэгум изэнэкъо­къухэм ахэлажьэх. Республикэм атлетикэ онтэ­гъумкIэ испорт еджапIэу Чыр­жьын Мухьарбый ыцIэ зыхьырэм щагъэ­сэрэ батырхэр хэгъэгум ихэшыпыкIыгъэ командэхэм ахэтых. Гандбол клубэу «Адыифыр» Урысыем изэнэкъокъоу суперлигэм щыкIорэм щешIэ. Олимпиадэ джэгунхэм, дунаим изэнэкъокъу­хэм тиспортсменкэхэм дышъэ медальхэр къащахьыгъэх.

Псауныгъэм игъэпытэн физкультурэм къыщежьэ. Физкультурэм, спортым апыщагъэхэм ягъэхъагъэхэм ахагъэхъонэу, зэнэкъокъухэм къащахьырэ медальхэмкIэ нахьыбэрэ тагъэгушIонэу афэтэIо. Опсэу, физкультурэр! Опсэу, спортыр! Шъо шъуишIуагъэкIэ спортсмен, тренер цIэрыIохэр тиIэх. Спортым зыщызыгъэсагъэхэу цIыфышIу хъугъэхэр агъэлъапIэх, щысэ атырахы.

ЕмтIылъ Нурбый.