А. Дзюба, С. Азмун, Е. Луценко
Къэлапчъэм Iэгуаор дэзыдзэхэрэр футбол ешIэгъухэм сыдигъуи къащыхагъэщых, щытхъур афаIо.
2019 — 2020-рэ илъэс зэнэкъокъоу Урысыем футболымкIэ иапшъэрэ куп щыкIуагъэм къэлапчъэм Iэгуаор анахьыбэрэ дэзыдзагъэхэр къыщыхагъэщыгъэх. Дышъэр къыдэзыхыгъэ «Зенит» Санкт-Петербург иешIакIохэу Артем Дзюба ыкIи Сердар Азмун апэрэ чIыпIитIур ахьыгъ.
А. Дзюбэ гъогогъу 17 хъагъэм Iэгуаор дидзагъ. С. Азмуни гъогогъу 17 къэлапчъэм Iэгуаор дидзагъ. Зэнэкъокъум изэхэщакIохэм А. Дзюбэ апэрэ чIыпIэм агъэуцугъ. КъызэралъытагъэмкIэ, 17-м щыщэу 6-р пенальтикIэ Артем Дзюбэ къэлапчъэм Iэгуаор дидзагъ.
Европэм ифутбол командэхэм зэфэхьысыжьхэр ашIыхэ зыхъукIэ, пенальтикIэ Iэгуаор дэзыдзагъэр апэрэ чIыпIэм агъэуцурэп. Арэу щытми, Урысыем футбо- лымкIэ изэнэкъокъу изэхэщакIо- хэм хэушъхьафыкIыгъэ унашъо ашIи, А. Дзюбэ апэрэ хъугъэ.
— Апэрэ чIыпIитIур «Зенит» иешIакIохэм зэрахьыгъэр тигуапэ, — къыIуагъ трененр шъхьаIэу Сергей Семак. — Тэ анахьэу къыхэдгъэщыгъэр «Зенит» Урысыем изэнэкъокъу апэрэ чIыпIэр къызэрэщыдихыгъэр ары.
«Арсенал» Тула иешIакIоу Евгений Луценкэм гъогогъу 15 къэлапчъэм Iэгуаор дидзагъ, ащ ящэнэрэ чIыпIэр ыхьыгъ.
Зэгъэпшэнхэр
Апшъэрэ купым хэт командэу «Рубин» Казань илъэс ешIэгъум зэкIэмкIи къэлапчъэм Iэгуаор зэрэдидзагъэр 18, «Уфа» Уфа — 22-рэ, «Ахмат» Грозный — 27-рэ, «Оренбург» Оренбург — 28-рэ, «Крылья Советов» Самара — 33-рэ.
«Зенит» иешIакIохэу Артем Дзюбэрэ Сердар Азмунрэ гъогогъу 34-рэ хъагъэм Iэгуаор дадзагъ. «Зенит» — 65-рэ.
Мыекъопэ «Зэкъошныгъэм» иешIакIэ къыхэдгъэщырэр ящэнэрэ чIыпIэр ятIонэрэ купэу «Къыблэм» къызэрэщыдихыгъэр ары.
Къэлапчъэм анахьыбэрэ Iэгуаор дэзыдзэгъэ командэр «Аланиер» ары — 54-рэ. «Волгарь» — 45-рэ, «Зэкъошныгъэм» гъогогъу 29-рэ къэлапчъэм Iэгуаор зэрэдидзагъэр — ар бэп. ЕшIэгъу 19 тикомандэ 2019 — 2020-рэ илъэс зэнэкъокъум иIагъэр. Ризван Ахмедхановым, Къонэ Амир, Делэкъо Аскэр, Антон Мамоновым, Тофик Кадимовым, нэмыкIхэм къэлапчъэм Iэгуаор дадзагъ.
2020 — 2021-рэ илъэс зэнэкъокъур шышъхьэIум и 9-м рагъэжьэщт. ТиешIакIохэм къэлапчъэм нахьыбэрэ Iэгуаор дадзэнэу, бэрэ тагъэгушIонэу афэтэIо.