«СегъэгумэкIы уахътэу къэкIощтым»
Тхылъеджэм ыгу екIурэ гъогур къэзыгъотын, игурышэ-гупшысэхэмрэ игузэхашIэхэмрэ гущыIэ щэрыохэмкIэ къэзыгъэлъэгъонхэ зылъэкIыгъэ усэкIо-тхакIохэм ащыщ Хъурмэ Хъусен.
Адрэ цIыф пстэумэ ялъытыгъэмэ, творчествэм пылъхэм, анахьэу тхакIохэр, къакIугъэ илъэсхэм афызэплъэкIыжьхэзэ, зэфэхьысыжь гъэнэфагъэхэр ашIых. Сыда пIомэ ахэм ящыIэныгъэ уахътэм икIо тегъэпсыкIыгъэ зэпытэу щытышъ, игъорыгъоу зылъэплъэжьых, якъэлэмыпэхэр «аутхыпкIыхэзэ», произведениякIэхэм ятхын зыфытырагъэпсыхьэ. Ахэр зыми ригъэзыхэрэп IофшIэгъу ужым яунэхэм ащыпадзэжьынышъ, ячъые сыхьат пчъагъэ къыпачызэ, сатыр-сатырэу ягупшысакIэхэр тхылъыпIэм щызэрагъэкIухэу нэфшъагъо нэс щысынхэу. Ау ягущыIэхэм къяжэхэрэр мымакIэу зэрэщыIэр ашIэшъ, цIыфхэм гурыгъуазэ афэхъурэ а гущыIэхэм купкIэу акIоцIалъхьэрэмэ ямэхьанэ къагурыIоу, ежьхэм зыфагъэшъошэжьыгъэ тхэкIо IэнэтIэ мыпсынкIэм Iутхэу япшъэрылъ агъэцакIэ. Шъэф хэлъэп, цIыфхэм агукIэ нахь аштэхэрэр ежьхэм ядунай, ащ щыхъурэ-щышIэрэ пстэури IупкIэу къэзыгъэлъэгъонхэ зылъэкIыхэрэ тхакIохэр арэу зэрэщытым.
Ащ фэдэ усакIоу, тхакIоу, драматургэу тиIэхэм Хъурмэ Хъусен ащыщ. Ар усэхэу, поэмэхэу, пьесэхэу, повестэу, романхэу, рассказхэу ытхыгъэхэмкIэ шIукIае шIагъэу къыушыхьатыгъэу щыт. Ащ пае уицыхьэ телъэу къэпIон плъэкIыщт а пстэур иуахътэ пкIэнчъэу римытэкъухьэу, ыгуи, ыкIуачIи зэдиштэхэу зэригъэфедэхэрэм къызэрэкIэкIуагъэр. Ау ар чIыпIэ нэкI къыщежьагъэп, чъыгэу гъомылэ тэрэз зыIэкIахьэзэ лъэпсэшIу зыдзыгъэм фэдэу Хъурмэ Хъусенэ Шэуджэн районымкIэ къуаджэу Хьатыгъужъыкъуае щыщ адыгэ лэжьэкIо-псэокIо унагъоу IофшIэныр шIу зыщалъэгъоу, зыкIуачIэкIэ псэужьрэм къихъухьагъ, щапIугъ, цIыкIу дэдэзэ, «Улажьэмэ лыжъ зэрэпшхыщтыр» къыщыгурыIуагъ. Иапэрэ кIэлэегъаджэхэу тхэкIэ-еджакIэ езыгъэшIагъэхэм ащыщэу Хьасанэкъо Нурет Хъурмэр итворчествэкIэ зынэсыгъэ лъэгапIэм рыгушхоу ыгу къэкIыжьыщтыгъэ ащ ятэу Хьаджмосэрэ янэу Кырыщрэ сабыиблэу яIагъэр зэкIэ цIыф тэрэзэу, Iофыр шIу алъэгъоу апIунхэм яшъыпкъэу зэрэпылъыгъэхэр. Ежьхэр лэжьэкIо чанхэу, шъыпкъагъэр акъолъэу, шIугъэм фэпсэухэу щытыгъэх. Хьаджмосэ къуаджэм щалъытэрэ, бэрэ зэупчIыжьыхэрэ зы лIэу щытыгъ, гущыIэгъу узыфэхъурэм акъылыгъэ сыдигъокIи кIэрыпхыщтыгъ. Ар ишъаоу Хъусенэ фэгумэкIэу, ишэн зэтеубытэгъащэу, гущыIэныр зэриджэгъуагъэм пае ащ хэкIыщтым ыгъэгумэкIыщтыгъ.
УсакIо хъущтыр еджапIэм щыIэ зыхъукIэ сыхьатхэм азыфагу къыдэфэрэ зыгъэпсэфыгъо уахътэхэм джэгуныр шIомыIофэу, изакъоу классым къычIанэти, тхылъ горэм еджэу, сурэт ышIэу е усэ зэхилъхьэу щысыщтыгъ. Ар гурыт еджапIэм чIэсыфэкIэ дэпкъ гъэзетым икъыдэгъэкIын хэлажьэщтыгъ, сурэтхэм яшIынкIэ IэпыIэгъушIущтыгъ, мэфэкIхэм ащагъэфедэхэрэ плакатхэр ыгъэкIэракIэщтыгъэх, лозунгхэр ытхыщтыгъэх.
Гъэмэфэ зыгъэпсэфыгъо лъэхъанхэм чIыпIэ колхозым ишъоф шахъоу итыгъ, механизаторхэм агодзагъэу игубгъо щыжъоу, щыулъэшъуаоу, щыпхъэу, етIанэ комбайнерхэм акIыгъоу лэжьыгъэр къадиIожьэу щытыгъ. Я 7-рэ классым ар ихьэгъагъ гъэреным зэлажьэм кIэкозэпылъ дахэу ежь къызыфищэфыжьыгъагъэр щыгъэу еджапIэм зычIэхьажьым. Ащыгъум ар IэшIэхыгъэп, ау Iофыр шIу зэрагъэлъэгъугъэ кIэлэцIыкIум ыпшъэ ифагъэр янэ-ятэхэм агъэшIэгъуагъэп. Ахэм алъэгъущтыгъ, къагурыIощтыгъ IофшIэным фаблэу, нахьыжъмэ акIырыплъызэ зыгорэ хъу шIоигъоу къызэрэтэджырэр...
Джы ар игъэшIэ шапхъэ хъугъэу зыфэпсэурэр ышIэнэу фызэшIокIыгъэмкIи, джыри ащ хигъахъорэмкIи нэрылъэгъоу щыт. Ащ итхыгъэхэр 1965-рэ илъэсым къыщегъэжьагъэу къыхеутых.
Нарт эпосым къыхэхыгъэхэ образхэмрэ мотивхэмрэ усакIом ипоэзие игъэкIотыгъэу ащегъэфедэ. Лъэпкъым ижэрыIо поэтическэ творчествэ Хъурмэм дэгъоу зэришIэрэр ащ къеушыхьаты. «Гугъэм ытам» зыфиIорэ сборникым дэт усэу «Апэрэхэр» зыфиIорэм гъуазэхэр нарт зэолIхэм ащыфегъадэх. Нарт лIыхъужъ цIэрыIохэу Саусырыкъорэ Шэбатныкъорэ афэдэхэу ахэри кIочIэшхох, гупытэх ыкIи агу раубытэрэр агъэцэкIэным пае апсэ еблэжьхэрэп.
Хъ. Хъурмэм илирическэ лIыхъужъ ыгукIэ зэхешIэ зэкIэ дунаим щыхъурэ-щышIэхэрэр, ичIыгу щапIугъэ цIыфэу ыкIи ащ фэшъыпкъэу зэрэщытым елъытыгъэу ащ икъукIэ къыгурэIо дунаим изытеткIэ ежьми пшъэдэкIыжь зэрихьырэр.
ГъашIэм симафэ гугъэр къыретышъ Бгъэгуихыгъэу шIум сыпэгъокIы. Дунаир сыпсэу цIыфэу сытетышъ Щыхъурэ пстэуми сагъэгумэкIы. СегъэгумэкIы уахътэу къэкIощтым, СшIэмэ сшIоигъу упчIэу къыхьыщтым. СегъэгумэкIы жьыбгъэу къилъыгъэм, СегъэгумэкIы жъуагъоу кIосагъэм, Инэфы фабэу сыгу къытепсагъэм. («Гугъэм ытам»)
Хъурмэ Хъусен итворчествэкIэ хэдгъэунэфыкIы тшIоигъу иаужырэ пьесэхэм ащыщэу «Гощэмыдэ инысэхэдакI» зыфиIоу адыгэ лъэпкъ театрэм режиссер ныбжьыкIэу ЕмкIужь Анзор щигъэуцугъэри ягопэ дэдэу цIыфмэ зэраштагъэр, тыди ащагъэу къагъэлъагъо къэси еплъырэм ибагъэ къызэрэкIимычырэр. АщкIэ теубытагъэ хэлъэу къэпIон плъэкIыщт Хъурмэм ипроизведениехэм тищыIэныгъэ щыхъурэ-щышIэрэ шъыпкъэхэр зэрялъапсэр. Ау ахэр нэкIэ ылъэгъухэрэ къодыемэ рагъэшIырэ шIошIхэмкIэ къымытхэу, ямышIыкIэ художественнэ амалхэр иIэубытыпIэхэу, лъэныкъо зэфэшъхьафхэмкIэ къякIуалIэзэ образ пэпчъ псэ къыпегъакIэ, гухэлъ шъхьаIэр IупкIэу икIыхьагъэкIэ пхырещы. ЗэкIэми анахь зигъо хъугъэхэ непэрэ Iофыгъохэр псынкIэу зыщыуушэтынхэ плъэкIыщт драмэр къызыфигъэфедэзэ Хъурмэ Хъусенэ ытхыгъэ драматургическэ произведениехэу «КIымафэм имэфэ жъоркъхэр» (1998-рэ), «ЧIыфэ» (2000-рэ), «ЗэманыкIэм ицIыфхэр» (2001-рэ), «Дышъэ чъыг» (2002-рэ) зыфиIохэрэри, нэмыкI пьесищэу ыужкIэ ытхыгъэхэри итхылъыкIэу ихэшыпыкIыгъэхэ тхыгъэхэр зыдэтхэу 2016-рэ илъэсым къыдигъэкIыгъэхэм дигъэхьагъэх. ЗыцIэ къетIуагъэхэ пьесэхэм агупчэ итыр тилъэхъанэ щыпсэурэ цIыфыр ары. Зы лъэныкъомкIэ, тоталитарнэ хабзэу щагъэпсыгъагъэм тхьамыкIэгъо хъугъэ— шIагъэхэр ежь ышъхьэкIэ зыщэчыгъэ цIыфэу ащ нахьи нахь мымакIэу «перестройкэкIэ» зэджагъэхэм къызыдихьыгъэ щыIэкIэ-псэукIэм инэшэнэ гомыIу хъугъэ— шIагъэхэм зыгу агъэузырэр, адрэ лъэныкъомкIэ — лъэхъаныкIэм илIыхъужъэу ахъщэр нахьыбэу къызыIэкIэгъэхьэгъэным, сыд фэдэ шIыкIэми къыщымыуцоу нахь бай зэрэхъуным, мылъкум иугъоин фэшъхьаф гугъу зимыIэр. Мырэущтэу къапIомэ хъущтмэ, джырэ лъэхъанымкIэ «тыхэмрэ якIалэхэмрэ».
Джырэ тилъэхъан зэмызэгъыныгъэ ыкIи зэшIонэныгъэ пхъашэхэу къыхэхъухьэхэрэм Хъурмэ Хъусенэ ябгъукIорэп. ГущыIэм пае, чэчэн заом е лъэпкъ зэпэуцужьхэм бэба тхьамыкIагъоу цIыфхэм къафихьыгъэр. «ЧIыфэ» зыфиIорэ драмэм илIыхъужъхэр — цIыф лэжьэкIо къызэрыкIохэу къуаджэм щыпсэухэрэр Кавказым щырекIокIырэ заом хэщагъэхэ хъугъэх. ГугъэшIу Борэкъорэ ащ ишъхьагъусэу НэфызакIэрэ ежь къагъэшIагъэм кIэлэегъэджагъэх, къоджэдэсхэу зы лIэужэп ахэм рагъэджагъэр ыкIи апIугъэр. Ахэр арымырмэ, хэта къызгурыIон фаер хымэ тхьамыкIагъо зэрэмыхъурэр? Ягъунэгъухэм якIэлэ закъо Чэчэным щыкIорэ заом хэкIодагъ, а гугъэуз хъугъэ-шIагъэр НэфызакIэ икъоу къызгуригъэIон ылъэкIыгъэп. КIочIадж цIыфыр: тхьамыкIагъор ежь ипчъэ къытеофэкIэ зыгорэм итхьамыкIагъо ыгу екIоу къызгуригъэIон ылъэкIрэп. Ау, зэрэзэлъашIэрэмкIэ, хымэ тхьамыкIагъо хъурэп. НэфызакIэрэ Борэкъорэ ар ашIошъ хъугъэ акъо закъоу Сыбыр къулыкъу щызыхьыщтыгъэ КIэлдахэ Чэчэным къагъакIуи, ащ гъэрэу зыщаубытым.
ТхакIом IофшIэгъэ макIэп адыгэ литературэм щыриIэр. Ахэм тикритикхэмрэ тишIэныгъэлэжьхэмрэ анаIэ атырадзагъэу Iоф адашIэ. Шъыпкъэ, апэрэ IофшIагъи Хъурмэ Хъусен фэгъэхъыгъэу щыI, зыфатIорэр «Адыгэ литературэм итарихъэу» урысыбзэкIэ 2006-рэ илъэсым къыдэкIыгъэм ия III-рэ том къыдэхьагъэр ары. Ащ итворчествэ «изэкIоцIыгъэчэрэзыкIын, изэхэфын, иушэтын» тапэкIи зэрэдэлэжьэщтхэм уеджэнджэшыжьынэу щытэп тхыгъэу иIэхэмкIэ.
Адыгэ Республикэм изаслуженнэ журналистэу Хъурмэ Хъусен лъэпкъ гъэзетэу «Адыгэ макъэм» илитературнэ IофышIэу щыригъажьи, ар отделым ипащэу, пшъэдэкIыжь зыхьырэ секретарэу Iоф зишIэрэр илъэс тIокIитIу зыхъугъэмрэ къызщыхъугъэ бэдзэогъу мазэмрэ афэшI тыфэгушIо, псауныгъэ пытэрэ щыIэкIэшIурэ иунагъокIэ иIэнэу, икъэлэмыпэ къычIэкIырэ тхыгъэхэмкIэ тхылъеджэхэр ыгъэгушIонхэу, иадыгэ лъэпкъ бэрэ фэлэжьэнэу тыфэлъаIо.
ШэкIо Мир.