Лирическэ этюдхэр
Сичэщхэр
Сичэщхэм гупшысэ хъагъэ къяхъухыгъ: мафэмрэ чэщымрэ акIыб зызэфагъазэу, шIункIыр гъэшIэ блынкIым къызыдэуцорэм, сэ ахэр гупшысэ Iапэхэу къысфэкIох.
КъысфэкIох мафэм къысфихьыгъэ пстэур — гухахъуи, гупсэфи, гушIуагъуи, гумэкIи, гукIаи зэрагъэзэфэжьэу, къысфэкIох щэчэлъэ гъэнэфагъэхэу, сиблэкIыгъэ уахътэ ишIушIэ азыжьэу, сидунэететыкIэрэ сигъэпсыкIэ-шIыкIэрэ зыщагъэгъуазэу, къысфэкIох рэхьат IотэжьыпIэхэу.
Джащ пае сикIас чэщхэр! Мэзэ нэфыпс ткIопсым гур зэкIиуIапIэу, гупшысэ хьалэлэу къысэзытэкъулIэхэрэр.
ПIэ шыгъэ гупсэфым пкъынэ-лынэ пстэумкIэ зыщысыушхоу, мэфэ хъэрен къечъэкIым щыулэугъэ шъхьэ пшъыгъэм шъхьантэ шъабэр зигъотыжьырэм, гумрэ псэмрэ къэзэрэшIэжьых, зэпэгушIожьых, зэIушъэшъэжьых, шъэфэгъу зэфэхъух.
Чэщхэм яжьыкъэщэ тынч, ядунэе зэгъокI гур щэгупсэфы, гупшысэ пцэкъэнтфыр фаблэу еубыты.
Чэщхэр сакъых, гукIэгъух, псэпашIэх, яI гупыкIи, яI шIулъэгъуи. Дунэешхом ыгу рашIыкIэу жъуагъохэр чъыехэрэп, янэфыпс хьалэлэу огум раутхэ; цIыф бгъэгум щызэтырихьэгъэ зэхашIэхэр ыпщыжьэу мазэри гумыпсэф зекIо шыоу гъогу тет. Чэщхэм якIым-сым нэхъой гуминхэм блыпкъ пытэ афэхъу, цIыф цIыкIум кIочIакIэр нэфылъым диштэу къеблэжьы.
КъадэкIо ахэм чъые охътэ IэшIури, дахэри, Iужъури, пIуакIэри, пкIыхьэпIэ къолэныбэу итхыгъэ мафэм иидэжьынхэри. ШIункIым илъэмэкъэ дэгуи, псэ цIыкIужъыем игуIэ-гузэжъогъуи чэщхэм бэрэ къащекIокIых, умышIэмэ псэпашIэ ежьагъэхэу.
ТхьэлъэIу макъэр лъэоишхоу огум кIэо — тимэлэIичхэм лъыхъохэзэ тыкъагъотыжьы. Тижьыкъащэ кIэдэIукIхэзэ, тIуагъи тшIагъи зэхадзыжьы, шъыпкъэм тетэу тын къыпфашIы. Уягыини, уялъэIуни, уяшIушIэни пфэлъэкIыщтэп — нэф зэрэшъэу, ахэр чэщым дэкIодыжьых.
Ауми шIагъох чэщ нэжгъурхэр!
КъысэкIу сэри уахътэ, мэзэ лъэпэнэфым гукIэ дахэу зыкъызэIуихэу, сиорэд тамэ зиIэтэу.
КъысэкIух чэщхэр мы дунэешхор къысфыраIотыкIэу, къысфагъэлъапIэу. КъысфэкIох ахэр акъыл зэгъэблэу, къысфэкIох ахэр сызэрагъэплъыжьэу, щыIэныгъэ шъэфыбэм яIункIыбзэ къысфащэеу, къысэтэх хьалэл шъабэхэу. Джа пстэумэ къахэкIэу, сикIасэх чэщхэр!
Сигупшысэхэри ахэм ащырэхьатых, ащэшэсых, ялъэрыгъи ланлэп — гупсэф. Сигупшысэ нал пIонышъ, сипчъэ пышIагъ — пытэ, къабзэ, мэшIэты; тхьалъэIу папкIхэу сиI — сеухъумэ, сегъэгугъэ, сыгу еIэты, сегъэнасыпышIо.
Сичэщхэр — сипчъэIулъых, сигупшысэ ащэгупсэфы! — Нэфых, фабэх, шъабэх, зафэх, гохьых, шъо пкIырапкIынэх, гущыкIох, Iордэгъазэх, дэхэIуалэх, гужьдэкIыгъох, пщэлъэ дэгъух, къысфэплъызхэу ренэу къыскIэрытых, янэфи яфаби псэм игъомылэх.
Псыхъом дэжь
ТичIыопс ихьалэмэтыгъэ нэм фэплъырэп: губгъохэр къэтэбэ шхъуантIэх, чъыгхэр шъхьабырэбэ Iэтыгъэх, огур къаргъо, чIыгур рэхьат — сыхьатымаф!
Къушъхьэ мэзыр гоIу: жьыр уигъэшхэкIэу шъабэ, IашIу; гопэгъур птырехы, пщыщ мэхъу — зыкъыпфыкIэрычырэп. Гуфаплъэу уплъэмэ, нэплъэгъум къыридзэрэ пстэури гум хэпкIэ. ЦIыфхэм афэдэ хьазырых къэкIырэ лъэпкъхэри: ищыгъэх, пагэх, пкъы пытэ ушъагъэх, зэичъ цIыкIухэри зэрэныбжьыкIэхэр мыгъуащэу къаготых…
Псыхъоу псышкуашком инэпцэпкъ закIэх къэкIырэ лъэпкъхэри: ахэри цIыфхэм афэдэх, ежь-ежьырэу зыфэдэр алъэгъужьымэ ашIоигъоу уфэупцIэ дэдэхэу чъыгхэм псыхъомкIэ защэизэ, ащ игъунджэ зызэрэралъагъорэм егъатхъэх; атхьапэ зэмышъогъухэмкIэ — шхъуантIэхэмкIэ, плъыжьышъо чIапцIэхэмкIэ псы къаргъом ышъо зэблахъу; мы чIыпIэм псым нэ чанкIэ хаплъэрэм, ахэм яныбжьыкъухэм псыхъор къызэрэраIэрэр зэхешIэ. Псыхъом къищырэ чъыг уцышъошъо- щайуцышъохэр сурэтшIыгъэ дахэм фэдэх; бзыу орэд макъэм гулъачIэр егъэбырысыры, псэ зыпытыр зэкIэ тэ нэбгыритIум къытпэгушIуатэм фэд — гум зыкъырагъэпхъуатэ. Фабэ, шъабэ, гоIу тидунае. ЦIыфыпсэр игуапэу акIэдэIукIы, агъэIасэ, агъэгупсэфы, а зэкIэм къаукъэбзы.
Гум, шъхьэм загъэпсэфыгъэу, къахэхъуагъэу, кIочIакIэ егъотыжьы, шIу горэ пшIэмэ пшIоигъоу укъызхэшхъожьы, тамэ къыбгокIэ. ШIулъэгъур кIочIэшхоба?! Ар зызэкIаблэкIэ, хэти мэкIэжьы, быбыщтым фэдэу, псынкIэ цIыфыр мэхъу. ТыщэрэмыкI насып Iахьым.
Зыгорэ къаIо
Чэщыр мэзагъо, жъуагъохэр зэлэгъух, кIымафэми умышIэнэу дунаир фабэ, тыгъэгъазэм ыкI. ТитIо тызэтIуазэм фэдэу ренэу тызэгъус, тилъагъо гупсэф, гуитIур зэфэкIо, уахътэр алъытэрэп.
Чэщыр тынчыпI — рэхьатыр щэкIуашъэ, гуитIур, зэрэшIэ, зэнэсы. Мы такъикъхэм дунаир зэтекъэ, къэуцу ыбгъэгу тычIифызэу, тигъэразэу, пкъынэ- лынэр зэкIэ мэчэлъао…
Тыгъэгъазэм ыпсэ къытIуилъхьэу, осыцэ хъырахъишъэхэр къыретэкъохых, нэгушъуи, шъхьаци, IупшIи къяпкIылIэу, плъыр-жъэр гопэгъур атыри- хэу.
Къесы, къесы! Къэбзагъэм пситIур еукъэбзы, егъэлъэшы. Апэрэ осыр, апэрэ гукIэгъур, апэрэ гушIогъо пшысэр…
Дунаир зэрэдахэр! Осыцэхэр щыгъыжъые шIэтхэу, гушIубзыу чэфхэу етIупщыгъэу къехых. ТызэфэгушIо, тызэфэхьалэл; гущыIэнчъэу псэхэр зэгурэIох, нэплъэгъу-гукIэгъукIэ пситIур тэгъэфабэ. Апэрэ осыр, апэрэ зэхашIэр, апэрэ шIулъэгъур… — такъикъып. ЗэкIэ — кIымафэм икъэхъукIи, гушIуагъом икъежьакIи, шIулъэгъум ижьыкъэщэ лъэши, гъашIэм игъашIуи чэщыр япщыпI.
* * *
Зыгорэ къаIо, сыолъэIу, къаIо пшIоигъор гум дэмыгъэшъухьэу.
Сэры а зэкIэ
Нэфылъэ жъуагъоу, гугъэ Iэтыгъэу узыIыгъыр сэры. Пчэдыжьыпэ тыгъэу къыппэгушIуатэрэр сэры. Мэфэ IофшIэгъум гупсэф рэхьатыр къыозытэкъулIэрэр сэры. Жьы къэбзэ IэшIоу пIупэ къепкIылIэрэр сэры. Гупшысэ нэфэу птамэ темыкIырэр сэры. Фэбэ чэфыбзэу уидунай зэIузыхырэр сэры. УиошIу дахэри, уиощх шъабэри, уиосыцэ фыжьхэри сэры. УигушIо пщэсри, уигумэкI макIэри сэры.
Уипчыхьэ хьалэмэтыр сэры. Уищхыпэ гуапэр сэры. УигущыIэ IэшIур сэры. Уитхыпхъэ гъэчъыгъэр сэры. Уимэзэгъо чэщыр сэры. УипкIыхь-гушIуагъор сэры. Уишъэф тхъагъор сэры. Уинэхъой гупсэфыр сэры. Уипшысэ къолэн мыухыжьыр сэры. Уиостыгъэ мыкIуасэр, сIэпэ нэфыпсхэу, уилъэгъо зэныбжьхэр — зэкIэ сэры!
— Адэ «сэрыр» хэта, мо пстэумэ зэхахэу пцIэ къепIона?! — убзэ Iупэ джэмакъэу жьым къылъэсыгъэр къысэпкIылIэ. Джэуапыр мэкъэ шъхьафит гуапэкIэ зэфэдэу дунаишхом тесэгуащэ.
— Сыгъэтхэ нэф – сыгугъэ Iап, сышIошъхъуныгъэ ин, сышIоигъоныгъэ лъэш, сышIулъэгъу дах, сыкъэрар заф, сынасып лъаг!!!
НэкIубгъор зыгъэхьазырыгъэр Мамырыкъо Нуриет.