Дэим земыгъапш ЛъэпсэшIур уиIэшъ — ШIущэу укошагъ. Укъэгъагъ Iэрамышъ — Сыкъыпфэшъэбагъ. Пшъэшъэ шъырытым — СигъэгумэкIагъ. Шъхьагъышъэу иIэм — ЫгъэкIэрэкIагъ. Нэбзыцы кIыхьэхэр Мэжьэцэ Iужъух. Сыгур зыгъэжъугъэр Итеплъэ шъуашIу. Нэхъой-укIытэм НитIур агъэбылъ. Сыгу зыгъэуалъэрэр УиIэдэб дах. Лъытэныгъэу пхэлъым Гулъытэ сегъэшI. Къэгъагъ Iэрамым Гупшысэ фэсэшI. Укъэгъагъ Iэрамышъ Мэ IэшIур къыппех, УныбжьыкIэ дахэшъ Бэмэ укъыхах. Уитеплъэ лъэгъупхъэр Уищыгъын шъуаш, Шэн-Iэдэбыр ЗиIэ пшъэшъэ Iуш. КIэлэкIэ зэкIужьхэр О къыпфыреплъэкIых, Iаеу зыкIэлъыплъэхэрэр Пшъэшъэ ныкъотIэкI. О упшъэшъэ дэгъумэ Дэим земыгъапш! Адыгэм ишъуашэмэ Уямыхъырэхъыш! Адыгэм ихабзэмэ ШъхьакIо яшъумых! Адыгэм ибзыпхъэхэр Хъупхъэу зэIэпышъух!   СигъэгушIоу къысIугушIожьыгъ Синэплъэгъу къыубытырэр дэхэ закI, Сикъэщэныр анахь кIэракI. Джэнэ пIуакIэр ыкIышъо емыпкI, Цокъэ лъагэм лъакъор кIимыгъэпкI. Шъхьац дэнагъор ПлIэIум елъэлъэ, Шарфы псынкIэр Шъэфэу екIошъэх. Пшъэфы шъабэм Пшъэхъур щымыхъушI, Iэпшъэ фыжьым Iэхъур езэгъып. ЯмышIыкIэшъ сыбзэ регъэубыты, Нэ нэгъуитIур напIэм чIэсэубытэ, СыкъэгуIэу зэ сыIуплъэжьыгъ, СигъэгушIоу къысIугушIожьыгъ.   Фабэшъы фабэ пчыхьэ Iуплъэгъухэр Адыгэ пшъашъэу сишъэбэрыкIу Адыгэ напэм уризехьакIу. Адыгэ пшъашъэу зишъэф зифаб Адыгэ лъэпкъым уриIуфаб. Уидэнэ Iапэ дышъэр хедыкIы, ШэкIыр къулаеу зэхэоупкIы, Уишъошэ дахи гуахьэу зеохьэ, УиныбжьыкIэгъум о узэрехьэ. Тыжьын бгырыпхыр бгым къелыдыкIы, Уидышъэ чыIухэр тыгъэм зэлъепкIэ, Уишарфы цыпэхэм жьыр афыкIэпщы, Нэплъэгъу хъуапсэхэр о зылъыощэ. Адыгэ джэгум о ущэхьарзэ, Утыгу шъыпкъэм зыщыогъазэ. Пщынэм ымакъэ къыпфэбзэрабзэ, КIэлэгу фабэхэр о къыоубзэ. Дахэшъы дахэ пшъэшъэгъу илъэсхэр, Тхъагъошъы тхъагъо гугъэм иуахътэхэр, Нэфылъы-нэфэу мэфэ гушIуагъохэр, Фабэшъы фабэ пчыхьэ Iуплъэгъухэр.   Мелэч дахэм хэти фай Къысэптыгъэр, о Айтэч! ЗэIуплъэгъум имэшIуач. Бгъэм дэфагъэшъ — емылыч. ЗэкIэнагъэшъ — сфэмыщэч. УзикIасэм — еIэсэкI. Къыппэблагъэр — блэмыгъэкI. УзIукIагъэр — МэлэIич. Къыпфэсакърэр — МэлэIич. — Сэ сцIэ шъыпкъэр — Мэлайчэт, Ау къысаIорэр — Мелэч. Мелэч дахэм хэти фай, Ау зыфаер ежь — Айтэч. Хъут (Хьэшхъуанэкъо) Сар. Адэмый.