ЕгъэзыгъэкIэ икIыжьыгъэхэм IэпыIэгъу афэхъу­гъэнымкIэ Дунэе черкес организациемрэ (Канада) гуманитар ушэтынхэм апылъ Адыгэ республикэ институтымрэ стипендие зэраратыщт программакIэ пхыращы. Ар Адыгеим истудентхэм ащыщэу лъэпкъ культурэм фэгъэхьыгъэ эссе анахь дэгъу зытхырэм зэтыгъо стипендиеу доллар 1000 зэрэфагъэшъошэщтым епхыгъ. Республикэм иапшъэрэ учреждение пстэуми ащеджэхэрэр мыщ икъыдэхынкIэ зэнэкъокъум хэлэжьэнхэ амал яI. IофшIэным итемэр – «Мыекъопэ культурэр: ащ итарихъ ыкIи имэхьан». Ащ дакIоу агъэнэфэгъэ темэр къизыIотыкIырэ такъикъи 5-м телъытэгъэ видео ятхыгъэ рагъэгъусэмэ хъущт. IофшIагъэхэр шышъхьэIум и 30-м нэс аштэщтых. Программэм мурадитIу иI: еджэгъу уахътэм студентым IэпыIэгъу фэхъугъэныр ыкIи адыгэхэм яижъырэ лъэпкъ культурэ ныбжьыкIэхэм ашIогъэшIэгъон хъуныр. Iэшъынэ Сусан.