Адыгэ чIыгум къычIахыгъэ пкъыгъо хьалэмэтхэр
Адыгэ чIыгум археологием ылъэныкъокIэ шIухьафтын хьалэмэтхэр пIэлъэ-пIалъэкIэ къызкъуехых.
Джащ фэдэу гъэмафэу итым Красногвардейскэ районым щыкIогъэ ухъумэн-къэгъэнэжьын IофшIэнхэр зэшIозыхыгъэхэр Саратов къикIыгъэ археологхэр арых. Купым ипащэу Игорь Тищенкэм дэтшIыгъэ зэзэгъыныгъэмкIэ, псэупIэу Садовэм пэIулъ Iуашъхьэм къыщычIахыгъэ пкъыгъо зэфэшъхьафхэр Къэралыгъо телерадиокомпаниеу «Адыгеим» истудие къырищэлIагъэх.
Археологэу, АР-м и Лъэпкъ музей инаучнэ IофышIэ шъхьаIэу Тэу Аслъан пкъыгъохэм тарихъ уасэу, ныбжьэу, археологическэ хьалэмэтыгъэу ахэлъыр къедгъэIуатэмэ тшIоигъоу зэIукIэгъум къедгъэблэгъагъ. Пкъыгъо пэпчъ къызэритхыхьагъэм, зэфэхьысыжь еплъыкIэу къафишIыгъэхэм хэз афэтымышIэу къэттхыжьыгъэх: «Мы пкъыгъо хьалэмэтхэу тапашъхьэ илъхэр ижъырэ адыгэхэм яIэпэщысагъэхэу Iуашъхьэм къыщычIахыгъэх. Пкъыгъохэр зэфэшъхьафых, ау зэкIэми къэбар гъэшIэгъон апылъ. Мары мы къошынышхор дэхэдэд. Сыдэущтэу агъэфедэщтыгъ пIомэ, мыр — гогон, адыгэ пшъашъэхэр псыхьэ зыкIохэкIэ, псыхъом рыхэIабэхэти, атамэ тетэу псыр къырахьыжьыщтыгъэ. ЗэхагъэпкIэжьыгъ, илъэс мин пчъагъэрэ чIыгум хэлъыгъ, ыцIыцIыгъ, ау мыр етIэ дэгъум хэшIыкIыгъагъ, гъэжъэжьыгъагъ, арышъ, къошын къутафэхэр зыптхьакIыжькIэ, зыбгъэгъушъыжькIэ, дэгъоу зэхэуцожьых. Зэрэпсаоу зэхагъэуцожьыгъэ. Я 8 — 9-рэ лIэшIэгъу, илъэс минрэ шъэрэ — минрэ шъитIурэ фэдиз ыныбжьыщт мы къошын дэхэшхом.
Къошын цIыкIуитIурэ тасымрэ зы къэхалъ къызхэкIыгъэхэр. ЯшIыкIэкIи, зэрагъэфедэщтыгъэхэмкIи зэтекIых. Зы къошыныр — пси, сани ибгъэхъон плъэкIыщт, ятIонэрэр — лъэчIабгъо. Ар ебэджыни, игъэхъуагъэр икIутыни ылъэкIыщтэп, етIани итыр къибгъэчъын хъумэ, ипкIутахьыщтэп. Тасым ыпшъэ дэжь иуфэнагъэ иIэшъ, къошынэу къытщэхъу, тэ тызэресагъэу зэикIэп, ау щытми, ащ фэдэ шIыкIэхэр щыIэу ашIыщтыгъэх. ЗэкIэмэ анахь гъэшIэгъоныр мы къошынэу ыбгъухэмкIэ къопсиплI зыпытыр ары. Зы къопсыр ыбгъукIэ пыутыгъ, ау мыр фэIо-фашIэмэ ащагъэфедэщтыгъэ къошыных. ТхьэмаДэмэ, урысыбзэкIэ къэпIон хъумэ, «жрецмэ» агъэфедэщтыгъ. Адыгэ Тхьэхэр бэ хъущтыгъэх, тхьэмаДэмэ фэIо-фашIэу агъэцакIэщтыгъэмэ гъунэ яIагъэп. Нарт къэбархэм ахэт — бжыхьэ кIахэм, санэм игъо зыхъукIэ, сэнэхашъо ашIыщтыгъ. Ащ фэдэу сэнэхашъо арыми, хэгъашъо горэ ашIыгъэми агъэфедэщтыгъ мыщ фэдэу къопсиплI зыпыт къошынхэр. Мыщ, гущыIэм пае, зы шъон горэ итмэ, зым къыштэти къопситIур ыIыгъэу, исэмэгукIэ къыготым зыфигъазэкIэ, адрэ къопситIумкIэ къыготым Iэпихыщтыгъ, къошыныр джащ фэдэу зэIэпахыщтыгъ, итыр рамыкIутэу ыкIи аIэпымызэу. ЫIу псыгъо дэдэу зэрэзэфэщагъэмкIэ итыщтыгъэр е санэ, е бахъсымэ. Итыщтыгъэр псэп ыкIи щэп, нахь мэхьанэ зэратыщтыгъэ шъон гор, фэIо-фашIэхэм ащагъэфедэщтыгъэмэ ащыщ, ары уасэ фэозгъэшIырэр. Мыщ нахь пасэу щыIагъэхэм, мыутIэмэ ялъэхъан епхыгъэу, илъэс минитIу — минитIум къехъу зыныбжь къошынхэр къэзгъотыгъагъэх, ау ахэм къопс тIурытIу зытет къахэкIыгъэп зыкIи. Мыр нэужырэ лъэхъаным къежьэгъэ къошын лъэпкъ. Сэ къэзгъотыгъагъэ къошын заулэмэ, къопиплIымэ къопс зырыз атетыгъ, Iубгъохэу. Мыдрэм фэдэу аIупэхэр псыгъуагъэхэп. Къошын ныбэм хъурэе цIыкIоу тетыр — а лъэхъаным къошынмэ атрашIыхьэщтыгъэ тамыгъ. ТIу зытетым — чэмыщэ, зы зытетым — пчэныщэ рагъахъощтыгъэнкIи хъун мэзахэм къошыным зытеIабэхэкIэ, итыр къырашIэнэу. Тамыгъэмэ мэхьанэ яIагъ. Ари сэнаущыгъэу лъэпкъым хэлъыгъэмэ ащыщ. Лъэхъэнэ гъэшIэгъон дэд мыхэр зэпхыгъэр. Зы чIыпIэп, чIыпIэ зэфэшъхьафмэ къащагъотых. ГущыIэм пае, Геленджик, Краснодар краим ичIыпIэ зэфэшъхьафхэм къащагъотых, ахэр зэкIэ адыгэ чIыгужъых. Пкъыгъохэр — адыгэ IэшIэгъэ шъыпкъэх, зыгорэм къыращыгъэу, къырахыгъэу щытхэп — тятэжъ-тянэжъ пIашъэхэм ашIыщтыгъэх ыкIи агъэфедэщтыгъэх. Мы пкъыгъохэр тилъэпкъ икIэныжъых.
Адыгэмэ ижъым къыщегъэжьагъэу шэн-хабзэ яIагъ — хъулъфыгъэ хьадэм къамэ е шъэжъые дычIалъхьажьыщтыгъ. Непэ къызнэсыгъэм хъулъфыгъэ хьадэм къамэ тыралъхьэ. Бзылъфыгъэхэм лэныстэ адычIалъхьажьыщтыгъ. Чъыр лэныстэу (из стали — Т. З.) пкъыгъомэ къахэкIыгъэр бзылъфыгъэ Iэпэщысэу щытыгъ. Илъэс минрэ шъитIурэ фэдиз ыныбжь. Къызэрэзэтенагъэр гъэшIэгъоны. Ижъырэ гъукIэхэм IэпэIэсэныгъэшхо ахэлъыгъ — гъучIым дэгъу дэдэу Iоф дашIэщтыгъ. Лъэпшъ, Хъудымыжъ, Дэбэч, Сэт-зэшхэр — ахэр нарт къэбархэм гъукIэ Iазэу ахэтых. ГъучIэу ашIыщтыгъэхэр — гъучI къэбзагъэх. Ау чIыгоу пкъыгъор зыхэлъыгъэм елъытыгъ къызэрэзэтенэрэри. Мы лэныстэр — бзылъфыгъэ ныбжьыкIэ цIыкIу зиIэпэщысагъэр нахь, бзылъфыгъэп, тIурысэп ыкIи нахьыжъэп. ЕтIани къычIэкIыгъэ пкъыгъохэу зызэригъэдахэщтыгъэ щыгъхэр мыжъо зэфэшъхьафхэм ахэшIыкIыгъэх, мыжъо лъапIэм ахэшIыкIыгъэхэри къахэкIыгъ, апч зэмышъогъумэ ахэшIыкIыгъэхэри ахэт. ПышIэ цIыкIоу ахэтым къопси иI, енэгуягъо дышъэ пкъыгъокIэ. Бзылъфыгъэу мы пкъыгъохэр зыфычIалъхьажьыгъэхэр — бзылъфыгъэ ныбжьыкIэу, кIэракIэу щытыгъ.
Адыгэ тхыдэмэ, нарт къэбармэ ахэт «жъгъырыу» аIошъ. Мыхэр пкъыгъо гъэшIэгъонэу, цIыф бзаджэхэр рагъащтэу щытыгъэх. Зыпамылъэщтыгъэ щыIэп — шы IапIэми, шъуашэми, Iашэми, арышъ, мыр адыгэмэ якультурэ чIыпIэшхо щызыубытырэ пкъыгъомэ ащыщ. Нарт къэбархэр ащкIэ шыхьатых. Зы лъэхъан горэм нарт Саусэрыкъорэ Iэпшъабгъорэ къаигъэ зэфэхъухи, IошъхьэпIалъэ (место встречи — Т. З.) зэдагъэунэфыгъэ — мафэ горэм щызэIукIэнхэу, нахь лъэшыр агъэунэфынэу. Саусэрыкъо къэкIожьыгъ шъхьае, чэщым чъыешъурэп, арти, иш Тхъожъые къеупчIыгъ: «Сыд узфэмычъыерэр?» — ыIуи. Саусэрыкъо еIо: «Ярэби, сычъыена, пыеу къысфэтэджыгъэм сыфримыкъункIэ сэщынэ, кIочIэшху, бэлахь.» Тхъожъые джэуап къыритыжьыгъ: «Лъэпшъ дэжь кIори, жъгъырыу шъих ягъэшI, сэкуми, шыкIэми, онэIапIэми къапышI. ЕтIанэ зэрэхъурэм теплъыщт, Iуашъхьэм тызнэсыкIэ.» Саусэрыкъо Тхъожъые къызэрэриIуагъэм фэдэу, Лъэпшъ жъгъырыу шъих къыригъэшIи шым пишIагъэх, Хьарам Iуашъхьэ екIолIагъ. Iэпшъабгъори къэкIуагъэу Iошъхьэ шыгум тетэу къежэ. Саусэрыкъо шым елъэдэкъауи, шыр Iуашъхьэм жъгъы-жъгъыжъгъ макъэ пыIукIэу зыдэчъаем, Iэпшъабгъо иш къыкIащти, ар къыридзыхыгъ. Саусэрыкъо ащ шъхьарылъади, чатэр къырихи, ышъхьэ пиупкIыгъ. Ащ тетэу текIоныгъэ къыдихыгъ. Арышъ, жъгъырыухэм гъэшIэгъонэу ямэхьанэ къахафэ. Музеими токъмакъ чIэлъ жъгъырыухэр пышIагъэу, бзылъфыгъэ шъуашэхэми, хъулъфыгъэ шъуашэхэми ахэр ападэщтыгъэх.
Къэхэлъэжъэу атIыгъэм бзылъфыгъэм имызакъоу зэолIым ихьэдэ къупшъхьэхэри къычIахыгъэх. Ащ игъусагъэх — пчыпыджыныпэр, токъмакъыр, щэбзапэхэр. Токъмакъыр онтэгъу дэд, щылыч зыхэшIыкIыгъэр, шъо псыгъо пылъэу, къызэпхьакIэу узырыокIэ цIыфыри, псэушъхьэри рыуукIын плъэкIыщт. Щэбзапэхэр лъабжъэ яIэу щэбзэпкъым пагъэпытыхьэщтыгъэх, щэбзапэхэр щэнэбзэу гъэпсыгъэх. Мыхэр зышIыщтыгъэхэр инженерыгъэхэп, ау гъукIэу щыIагъэхэм ясэнаущы- гъэ къаушыхьаты.
Мы гъучI улъыигъэ къутафэхэр къызэрэзэтенагъэхэр гъэшIэгъоны, сыда пIомэ мыхэми аныбжь илъэс минрэ шъитIурэ фэдиз. Мыхэр шхыншIэщым (кухня — З. Т.) щагъэфедэрэ бысымгощэ Iэмэ-псымэх. Мыр — лэгъупым щыщэу къызэтенагъэр ары, лэгъуп иныгъэн фае, лэгъуп къопсыри къыголъ. Анахь шъхьаIэу къэнагъэр лъхъончыр ары, зэрэпшъэхъур хэолъэгъукIы дэгъоу. Мыщ фэдэ лъхъончхэри тимузей бэу чIэлъых. ГъэшIэгъон дэдэу чIэлъыр Псэкъупсэ къэхэлъэжъым ЛэупэкIэ Нурбый къыщигъотыгъэр ары. Нурбый къыгъотыгъэри мыщ фэд. Къашыкъ мыщи игъус, лы-цацэ пэпцIэ къэгъэщыгъэ иIэу, лыр лэпсым къызэрэхэпхыщтым тегъэпсыхьагъэу. Мы пкъыгъохэр тимузей мыгъэ ихэхъоныгъэу плъытэн плъэкIыщт. Мыхэр зэкIэ адыгэ Iэпэщысэх, мыщ щашIыгъэх, лъэпкъым ыгъэфедагъэх. Тарихъым изы хэхъоныгъэу непэ къыддэхъугъэхэм ащыщ!
Къэзытхыжьыгъэр Тэу Замир.