Музеим тарихъыр еугъои
Краснодар краим и Северскэ район ипсэупIэу Убинскэм (къушъхьэу Пэпай дэжь) къыщагъотыгъэ мыжъосыныр Адыгэ Республикэм и Лъэпкъ музей къыратыжьыгъ. Республикэм ижурналистхэр зыхэлэжьэгъэхэ зэIукIэм мыжъосыным икъэбар щытегущыIагъэх.
ЕгъэжьапIэ фэхъугъэр
Северскэ районым иадминистрацие ипащэу Джарымэ Адамэ мыжъосыныр къызэрагъотыгъэр къызыфаIуатэм, Адыгэ Республикэм культурэмкIэ иминистрэу илъэсыбэрэ Iоф зышIэгъэ, фондэу «КIэн» зыфиIорэм игъэцэкIэкIо пащэу Чэмышъо Гъазый инэIосэшIоу зэрэщытыр къыдилъыти, телефонкIэ макъэ къыригъэIугъ мыжъосыныр къызэрагъотыгъэр. Тарихъ мэхьанэ зиIэ пкъыгъом хэбзэ шапхъэу фашIыщтыр пэшIорыгъэшъэу агъэунэфыгъ.
Убынышъхьэ ихьанэ-гъунэхэм мыжъосыныр къызыщагъотыгъэр илъэс 35 — 40 мэхъу. Ащ фэдизым ар унагъохэм ащыщ горэм ищагу дэлъыгъ.
Тетхагъэм зеджэхэм
ПсэолъэшI пкъыгъохэм ахэлъэу Азовскэм дэс Вадим Фроловым ипсэупIэ мыжъосыныр къызащэм, ащ зыгорэхэр зэрэтетхагъэхэр ылъэгъугъ. Иныбджэгъоу, адыгэ кIалэу Сэхъутэ Къэплъан къэбарыр фиIотагъ. ЗэныбджэгъуитIум тыраубытагъ мы пкъыгъом ичIыпIэр адыгэ музеир арэу зэрэщытыр.
Къэплъан ишъхьэгъусэу Фатимэ мыжъосыным зеплъым, ШэрэлIыкъу ыцIэу зэрэтетха-гъэр къыхигъэщыгъ. Укъеджэныр псынкIэп
Чэмышъо Гъазый осмэныбзэкIэ тхыгъэм къеджэн зылъэкIыщтэу Нэгъой Яшар игъусэу Азовскэ кIуагъэх.
— Сигуапэу Iофым изэгъэфэн сыхэлэжьагъ, — къытиIуагъ Нэгъой Яшар. — Мыжъосыным тетхагъэм сыкъеджэшъуми, имэхьанэ къэсымыубытымэ сIуи, Тыркуем щыпсэурэ шIэныгъэлэжьэу, профессорэу, осмэныбзэмкIэ специалистэу Нэгор Фетхи гущыIэгъу сыфэхъугъ, къызэридзэкIынэу текстыр фэзгъэхьыгъ. Ащ къызэриIуагъэмкIэ, сыным тетхагъэр мары:
«(Тхьэм) гукIэгъу фишIынэу, игунахь фигъэгъунэу пщэу, тхьэматэмэ ащыщэу Бэкир ШэрэлIыкъо ыкъоу (ыцIэ тетхагъэп). Фатихьэ. (КъурIаным щыщ сур), 1186-рэ илъэс быслъымэн лъытакIэмкIэ. 1772-рэ илъэс.
Пащэм иеплъыкIэхэр
Адыгэ Республикэм и Лъэпкъ музей ипащэу Джыгунэ Фатимэ къызэрэтиIуагъэу, ащ фэдэ зэхахьэхэм пIуныгъэ мэхьанэ яI. НыбжьыкIэхэр, кIэлэегъаджэхэр, лъэпкъ шIэжьым изэгъэшIэн пылъхэр къырагъэблагъэхэзэ, рагъэжьэгъэ Iофыр лъагъэкIотэщт. Краеведхэм адыряIэ зэпхыныгъэхэр агъэпытэщтых.
Мыжъосынэм лъыкIохи, Мыекъуапэ къэзыщэжьыгъэхэр Чэмышъо Гъазыйрэ Нэгъой Яшаррэ. Мыжъобгъум тетхагъэр адыгабзэкIэ, урысыбзэкIэ, лъэхъаным диштэрэ тыркубзэкIэ тхыжьыгъэным ехьылIэгъэ Iофыгъохэри зэрагъэфагъэх.
Северскэ районым иадминистрацие ипащэу Джарымэ Адамэ, Краснодар щыпсэухэрэ Вадим Фроловым, Сэхъут Къэплъан, ащ ишъхьэгъусэу Фатимэ, фэшъхьафхэу мыжъосыныр музеим къэщэжьыгъэным дэлэжьагъэхэм Джыгунэ Фатимэ гъэзетымкIи «тхьашъуегъэпсэу» ариIожьы зэрэшIоигъом тыщигъэгъозагъ.
Тарихъ пкъыгъохэр тилъапIэх
Республикэм и Лъэпкъ музей шIэныгъэмкIэ иIофышIэ шъхьаIэу, Адыгеим культурэмкIэ изаслуженнэ IофышIэу, зэлъашIэрэ археологэу Тэу Аслъан зэIукIэм гущыIэгъу тыщыфэхъугъ.
Мы Iофтхьабзэм хэлэжьагъэхэм зэдаштагъ адыгэхэм япсэупIагъэхэм ялъэужэу къэнагъэхэр зэрэщыIэр къыдалъытэнышъ, джыри лъыхъон IофшIэнхэр зэдызэхащэнхэу.
ЕмтIылъ Нурбый. Сурэтхэр Адыгэ Республикэм и Лъэпкъ музей къыщытетхыгъэх.