Хэгъэгум футболымкIэ иапшъэрэ куп хэт командэхэм бэдзэогъум и 11 – 12-м я 28-рэ ешIэгъухэр яIагъэх.

КIэуххэр зэтэгъапшэх

«Арсенал» — «Тамбов» — 2:1, «Ахмат» — «Зенит» — 1:1, «Шъачэ» — «Спартак» — 1:0, «Оренбург» — «Ростов» — 0:0, «Локомотив» — «Уфа» — 1:1, ЦСКА – «Рубин» — 1:1, «Динамо» — «Крылья Советов» — 2:0, «Краснодар» — «Урал» — 3:0.

Зэфэдэ пшъэрылъхэр зиIэ командэхэм язэIукIэгъухэр гъэшIэгъонэу кIуагъэх. «Арсенал» иешIакIоу Пантелеевым «Тамбов» икъэлапчъэ Iэгуаор дидзагъ. Костюковым хъагъэм Iэгуаор ридзи, 1:1 пчъагъэр хъугъэ. Зэнэкъокъур арэущтэу аухыщтэу къытщыхъущтыгъ. Я 84-рэ такъи­къым ошIэ-дэмышIэу Ткачевыр ыпэкIэ илъыгъ, ухъумакIом IэкIэкIыгъ. Iэгуаоу ащ къытыгъэм Луценкэр лъычъи, къэлапчъэм дидзагъ — 2:1.

«Спартак» иешIакIоу Масловым ыгу ихъыкIыгъэр макIэп: «Шъачэ» «Спартак» зыIокIэм Масловым «Спартак» икъэлапчъэ Iэгуаор дахэу дидзагъ, «Шъачэ» текIоныгъэр 1:0-у къыдихи, ап­шъэ­рэ купым къыхэнэжьынымкIэ гугъэ пытэ иIэ хъугъэ.

«Ахмат» «Зенит» зыIокIэм, Ивановым ешIэгъум пчъагъэр къыщызэIуихыгъ. «Зенит» иешIэ­кIо анахь дэгъухэр зэнэкъокъум а мафэм хэлэжьагъэхэп. Арэу щытми, Дриусси хъагъэм Iэгуаор ридзи, 1:1-у зэIукIэгъур аухыгъ.

«Уфа» текIоныгъэр къыдихыным пэблэгъагъ. Д. Фоминым пенальтикIэ хъагъэм Iэгуаор дидзагъ. ЗэIукIэгъур зыщаухыщт уахътэм «Локомотив» инасып къыхьыгъ. Фарфан къэлапчъэм Iэгуаор дидзи, 1:1-у ешIэгъур аухыгъ.

ЦСКА-р «Рубин» текIон ылъэ­кIыщтыгъэу тэлъытэ. Ф. Чаловыр ухъумакIохэм къадзыхьагъэу Iэгуаор къызыIэкIахьэм, ошIэ-дэмышIэу къэлапчъэм дауи, хъа­гъэм ридзагъ. ЗэIукIэгъур кIэухым фэкIуагъэу «Рубин» пенальтикIэ пчъагъэр зэфэдиз ышIыгъ.

«Краснодар» дэгъоу ешIагъ, 3:0-у «Урал» текIуагъ. Берг ыкIи Фернандеш пчъагъэр 2:0-м нагъэсыгъ, пенальтир дахэу Кабеллэ хъагъэм ридзагъ.

КIэуххэр зэдгъапшэхэзэ ана­хьэу къыхэдгъэщырэр медальхэр зыхьыщтхэри, апшъэрэ купым къыхэзыщтхэри къэшIэгъуае зэрэхъугъэхэр ары.

В. Карпиным къыIорэр

Зэнэкъокъур зэрэзэхащэгъэ шIыкIэр тренер шъхьаIэу В. Карпиным ыгу римыхьэу журналистхэм къариIуагъ. «Ростов» медальхэм афэбэнэщтми тшIэрэп, ау «Локомотив», «Краснодар», ЦСКА-р тыжьыным, джэрзым апэблагъэх.

Гугъэр зиIэ командэхэу ауж къинагъэхэр бэ мэхъух, ау къы­хэзыщтыр Тхьэм нэмыкI ымы­шIэу къытщэхъу.

Я 29-рэ ешIэгъухэр бэдзэогъум и 15-м аублэщтых. «Крылья Советовыр» апшъэрэ купым къыхэнэжьы шIоигъу, ары шъхьаем, «Краснодар» текIоныгъэр жьым фэдэу ищыкIагъ. Ащ фэдэ зэIукIэгъухэм зэнэкъокъур къагъэдэхэщт.