Адыгеим исурэттеххэм нэмыкI искусствэ лъэпкъхэм ялIыкIохэр ягъусэхэу ятворчествэ зэрэлъагъэкIотэщтым Iоф дашIэ. ЗекIоныр зэрагъэмэкIагъэр къыдыхилъытэзэ, сурэттеххэм я Союз фотоклубэу «Лэгъо-Накъэ» ягъусэу онлайн-зэнэкъокъуи 10 зэхащагъ. Ахэр: «Мы дома», «Мое окно», «Домашний натюрморт» зыфиIохэрэр, нэмыкIхэри.

Мыхэм ахэлэжьэгъэ сурэттехи 100-м ехъурэмэ IофшIэгъэ 700 фэдиз къагъэлъэгъуагъ. Джащ фэдэу онлайн шIыкIэм тетэу IофшIагъэхэм атегущыIагъэх ыкIи анахь дэгъухэр агъэ­нэфагъэх. ТапэкIэ къэгъэлъэгъон­хэу Адыгеим ыкIи нэмыкI шъо­лъырхэм ащыкIощтхэм а IофшIэгъэ дэгъухэр арагъэхьыщтых.

— Коронавирусым ыпкъ къи­кIыкIэ искусствэм идунай къиныгъохэр зэпечых. Анахь шъхьа­Iэр мы охътэ къиным творчествэм пэIапчъэ мыхъунхэр ары. Карантиныр — карантин, ау творчествэр лъыкIотэнэу щыт. Гупшысэу зыдаIыгъхэр пхыращышъунхэр, искусствэм иобъект­хэр аIэкIэлъхэмкIэ агъэпсышъун­хэр, гуетыныгъэ зыхагъотэжьыныр пшъэрылъ шъхьаIэх, — къы­щаIуагъ Адыгэ Республикэм культурэмкIэ и Министерствэ.