ШIум фэлэжьагъ

Акъылыр гупшысэу, Амалыр еусэу, Сэгъэпсы сиусэ — Гум сыфэупсэу.

ЦIыфыгу къабзэр — Жъыгъом мэузы. Банэзэ пшъыгъэ, ГуIэзэ пагъэ.

ГушIозэ чъагъэ, Гугъэзэ плъагъэ. Гугъэм кIэмыхьэу — Къинри къыхахьэу.

Зэм мэгузажъо, Зыгорэм мэгужъо. Зэм бэгъорыжъо — Зыгорэм егъэжъу.

Илъэсым — имазэхэр, Мазэм — имафэхэр, Мэфэ — сыхьатхэр, Сыхьат — такъикъхэр.

Хэт къыIошъун — Гу цIыкIум къыкIугъэр?! Хэт къышIэшъун — Гу цIыкIум илъыгъэр?!

Ау къэсIошъущт сэ — «Гу цIыкIур пшъыгъае, Ем езэуагъэшъ, Ишъэф щэIэгъуае, ШIум фэлэжьагъэшъ».

КъэкIорэ мафэри ошIу

Сабыеу укъэхъуи, Iэтахъо ухъугъ. НыбжьыкIэ дахэуи Пшъашъэмэ уахад.

Уахади — умыдэхъугъ, Уахатхъуи — сыупхъотагъ. Уиунэ сыщыхъупхъагъ, УиIанэ сыщыбгъэтхъагъ.

Псэогъу хьалэл усфэхъуи, ШIулъэгъуи, гукIэгъуи къыстепхъуи, Гу мэхэ закъоу сиIагъэр — Гъэрэу сигъашIэм сIыпхыгъ.

Хэта нахьыбэ зыштагъэр, Хэта нахьыбэ зытыгъэр? ГушIухэм зэдырагъаштэу, ГушIохэу зэфэхыягъэхэмэ?

Синэпэеплъхэр сэгъашIох, Гупшысэ сакъхэр сэгъазэх, СигукъэкIыжьхэр сиIэшIух. КъэкIорэ мафэри ошIу.

Мэкъэ джэуапыр къызыкъохыжьба!

Сабыигъо уахътэр Гупшысэ кIэкI, НыбжьыкIэгъу дахэр ХэткIи кIэракI.

ЦIыф чъэпхъыгъэм Игъогу зэикI, Жъыгъо илъэсхэр Сэ сшIомынэкI.

ЦIыфэу къэхъугъэм Акъыл ерэI! Сабыйри жъыгъори Зэферэгъад!

Сабый гу цIыкIур ГушIом дэхьарзэ. Жъы гурымышIум ШIугъэр Iэпэзы.

Жъыгъо илъэсхэр Сабый гумах. Ар шъхьэкIоштэпхэу Сабый гухый.

ГукIэгъу зэхашIэм Жъыгъор егъашIо, Гу фэбэ IэшIум Жъыгъор дэгушIо.

Гу псынкIэ нэкIым Жъыр реутэкIы. Гу мэкIэ-пIуакIэм Жъыгъор IэкIэкIы.

Сабыеу зэгорэм Хэт щымытыгъ? ГъэшIобзэ макъэр Хэт емыIугъ?

Мэкъэ джэуапыр Къызыкъохыжьба! Мэкъэ гукIэгъур — Уижъ пэгъохыжьба!

О узыпIугъэм — ГукIэгъу фэшIыжьба! О узикIасэм — Ыпсэ гъэшIожьба!

УIэпыкIыщтэп а жъыгъо — мыгъом! Уигъэфэбэщтэп гу чъыIэ — мыгъом! УзыгъэшIуагъэр — умыгъэшIожьымэ, Ижъыгъо илъэсхэр зэхэмышIэжьмэ!

Хъут Сар. къу. Адэмый