Искусствэм ицIыфхэм щыIэныгъэм къызыдихьырэ къиныгъохэр къызэранэкIыхэзэ, яIофшIэн лъагъэкIуатэ.

Адыгэ Республикэм и Къэралыгъо филармоние иансамблэу «Ошъутенэм» иорэдыIоу, Адыгеим изаслуженнэ артисткэу Даутэ Сусанэ зыгъэпсэфыгъо уахътэ имыIэм фэд. Дунаир зэлъызыкIугъэ зэпахырэ узым гумэкIыгъоу хэлъыр нахь макIэ шIыгъэным пылъ.

Бзылъфыгъэ ныбжьыкIэ ищыгъэм мэкъэ IэтыгъэкIэ орэдыр къызыхидзэкIэ, нэбгырэ пэпчъ къызэхихы шIоигъу. ЗэлъыIэсыкIэ амалхэр ыгъэфедэхэзэ, нэкIубгъор инстаграмым къыщызэIуихыгъ. Ныбжь зэфэшъхьаф зиIэхэр ащ ягуапэу еплъых.

IэкIыб къэралхэм арыс адыгэмэ апае концертитIу С. Даутэм зэхищагъ. Иорданием щыпсэурэ адыгэхэм хэушъхьафыкIыгъэ концертэу къафитыгъэр лъэпкъ культурэм, адыгабзэм якъэухъу­мэн афэгъэхьыгъагъ.

Зыщыпсэурэ республикэм, хэгъэгум ящытхъу дунаим щыIэтыгъэным артисткэ цIэрыIом мэхьэнэ ин реты. Художественнэ кIуачIэу хэлъыр искусствэм ыбзэкIэ Даутэ Сусанэ къыIотэныр шэнышIу фэхъугъ.

Шэуджэн Инвер иусэхэм Даутэ Сусанэ жьыр кIэтэу къяджагъ. Иорданием, Тыр­куем, Адыгеим ащыпсэурэмэ адыгэхэм яхьылIэгъэ усэр лъэшэу агу рихьыгъ, яеплъыкIэхэр нэкIубгъом къыщатхыгъэх.

2020-рэ илъэсыр шIэжьымрэ щыт­хъумрэ я Илъэс. Хэгъэгу зэошхом илъэхъан Советскэ Союзым идзэхэм лIыхъужъныгъэу зэрахьагъэм фэгъэхьыгъэ орэдхэу С. Даутэм къыIуагъэхэр Интернетым щызэхахыгъэх. Евгений Мартыновымрэ Андрей Дементьевымрэ зэдаусыгъэ орэдэу ным ехьылIагъэр гум къегущыIыкIы.

Советскэ Союзым и ЛIыхъужъэу Андырхъое Хъусен фэгъэхьыгъэ едзыгъор щыIэныгъэм иджэрпэджэжьэу щыт. С. Павлиашвили иорэдэу «Урысыер» Даутэ Сусанэрэ ансамблэу «Ошъутенэм» иартистэу Юрий Конжинымрэ къызэдаIуагъ.

Урысыем и Мафэ фэгъэхьыгъэ концертыр Мыекъуапэ ипсэупIэхэм ащыщ щыкIуагъ. «Ошъутенэм» орэд зэфэшъхьафхэр къыIуагъэх. Къалэм ищагухэм зэхахьэхэр гъэшIэгъонэу ащызэхаща­гъэх.

Гъэмэфэ зыгъэпсэфыгъохэм цIыфхэр купышхо хъухэу зэIукIэнхэ алъэкIыгорэп. Даутэ Сусанэ къызэрэтиIуагъэу, дунаим къыщекIокIырэ узыр къызэтынэкIыщт, тищыIакIи шIэхэу зыпкъ иуцожьыщт. Тызэкъотэу тызэрэпсэурэр дунаим имузыкальнэ Iэмэ-псымэ оркестрэу тэлъытэ.

Даутэ Сусанэ Адыгэ Республикэм щыкIощт мэфэкIхэм ахэлэжьэнэу зегъэ­хьазыры.

Сергей Трутнев. Адыгэ къэралыгъо университетым искусствэхэмкIэ и Институт имагистратурэ щеджэ.