Ясэнаущыгъэ къыщызэIуахы
КIэлэцIыкIухэмрэ ныбжьыкIэхэмрэ я Дунэе фестиваль-зэнэкъокъоу «Адыгеим ижъогъожъыехэр» мэкъуогъум и 27 — 29-м заочнэ шIыкIэм тетэу зэхащагъ.
Фестивалым яIэпэIэсэныгъэ къыщагъэлъагъо ашIоигъоу лъэIу тхылъи 197-рэ зэхэщэкIо купым къыфагъэхьыгъ. ОсэшIхэм пэшIорыгъэшъэу зэгъэпшэнхэр ашIыгъэх, шапхъэхэм адиштэхэрэр къыхахыгъэх.
США-р, Тыркуер, Иорданиер, Израиль, Германиер, Белоруссиер, Румыниер, Молдовэр, Урысыем ишъолъырхэм яныбжьыкIэхэр Дунэе фестивалым щызэнэкъокъугъэх.
Волгоград, Оренбург, Ростов хэкухэм, Краснодар ыкIи Ставрополь крайхэм, Чэчэным, Къэрэщэе-Щэрджэсым, Къэбэртэе-Бэлъкъарым, Адыгеим ащыщхэм художественнэ творчествэм яшIэныгъэ щауплъэкIугъ.
Лъэпкъ ыкIи эстрадэ орэдхэр къаIуагъэх, къэшъуагъэх, музыкальнэ Iэмэ-псымэхэмкIэ орэдышъохэр агъэжъынчыгъэх. Аныбжьхэм ялъытыгъэу зэнэкъокъум хэлэжьагъэхэр купищэу гощыгъагъэх. Илъэси 6 — 9, 10 — 15, 16 — 22-рэ зыныбжьхэм ясэнаущыгъэ къагъэлъэгъуагъ. Видеоедзыгъохэм осэшIхэр яплъыгъэх, зэфэхьысыжьхэр ашIыгъэх.
ШIухьафтын шъхьаIэр
Адыгэ Республикэм культурэмкIэ и Министерствэ, республикэм лъэпкъ культурэмкIэ и Гупчэ зэхащэгъэ Дунэе фестивалым ишIухьафтын шъхьаIэ Иорданием щыщ пшъэшъэжъыеу илъэс 11 зыныбжь Имана Бишэ фагъэшъошагъ. Мэкъэ Iэтыгъэ дахэкIэ орэдхэр ащ къеIох. УедэIу зыхъукIэ, орэдым хэлъ гупшы- сэр IупкIэу къызэрэзэIуихырэр огъэшIагъо.
Нэбгырэ 1000 фэдиз фестивалым зэфищагъ. Заочнэ шIыкIэм тетэу зэнэкъокъур кIуагъэми, искусствэм пылъхэм онлайныр, Интернетыр, нэмыкI зэлъыIэсыкIэ амалхэр агъэфедэхэзэ, Дунэе фестиваль-зэнэкъокъур зэрэкIорэ шIыкIэм лъыплъагъэх. Зэгъэпшэнхэр ашIыхэзэ, искусствэм ихэхъоныгъэхэр къыхагъэщыгъэх.
ЕплъыкIэхэр
— Тыркуем икъалэу Анкара музыкальнэ Iэмэ-псымэхэмкIэ иансамблэу «Бзэпсым» тигуапэу тедэIугъ, — къытиIуагъ бзэхэр зыщызэрагъашIэрэ Гупчэу «Активым» ипащэу Едыдж Мэмэт. — Адыгэ мэкъамэхэр скрипкэмкIэ къырагъэIуагъэх. Художественнэ пащэу Дэврим Айхан, ансамблэу нэбгырэ 11 зыхэтым тагъэгушIуагъ. Лъэпкъ орэдышъохэр зэхэзыхыгъэхэр телефонкIэ къытфытеуагъэх, орэдышъохэм ядэIухэзэ къэшъуагъэхэри къытхэкIыгъэх. Фестивалыр Мыекъуапэ щыкIонэу мыхъугъэми, дэгъоу зэрэзэхащагъэр тлъэгъугъэ. Бзэ зэфэшъхьафхэмкIэ орэдхэр ныбжьыкIэхэм къаIуагъэх — ари шIукIэ къыхэтэгъэщы.
— «Адыгэ макъэм» къыхиутыгъэхэм сызяджэм, фестивалым хэлажьэхэрэм, зэхэщакIохэм ямурадхэм защызгъэгъозагъ, къэбарыр синэIуасэхэм къафэсIотагъ, — къытиIуагъ зэлъашIэрэ сурэтышI-модельерэу, Адыгэ Республикэм культурэмкIэ изаслуженнэ IофышIэу, Урысыем МамырныгъэмкIэ и Лигэ икъутамэу Адыгеим щыIэм ипремие къызыфагъэшъошагъэу СтIашъу Юрэ. — НыбжьыкIэхэм язэнэкъокъу лъэшэу сыгу рихьыгъ. ОрэдыIохэм, музыкантхэм сядэIузэ, искусствэм зэрэзэфищэхэрэм сылъыплъагъ.
Лъэпкъ, шъолъыр пэпчъ искусствэу иIэр ныбжьыкIэхэм къытагъэлъэгъузэ, ежьхэми яIэпэIэсэныгъэ хагъахъо, дунэе псэукIэр нахьышIоу къагурэIо.
Гран-прир зыфагъэшъошэгъэ Имана Бишэ орэд къыIоу нахьыпэкIи зэхэсхыгъ. НыбжьыкIэхэм ясэнаущыгъэ къыхэзыгъэщырэ фестивалым изэхэщакIохэм шIушIагъэу яIэр дунэе IофшIэгъэшхо хъугъэу сэлъытэ. Искусствэр лъагэу аIэтызэ, мамыр псэукIэр нахь дахэ ашIы, цIыфхэр зэфащэх.
Ацумыжъ Айбек Израиль къикIыжьыгъэу Мэфэхьаблэ щэпсэу. Кфар-Камэ щыщхэр фестивалым зэрэхэлэжьагъэхэм Айбек ыгъэгушIуагъ.
— Адыгэ шэн-хабзэхэр къэтыухъумэнхэмкIэ Дунэе фестивалым мэхьэнэ ин иIэу сэлъытэ, — къытиIуагъ Ацумыжъ Айбек.
Къахэщыгъэхэр
ТекIоныгъэм ия 75-рэ илъэс, Адыгеир илъэси 100 зэрэхъурэм афэгъэхьыгъэ Дунэе фестивалым лауреат щытхъуцIэр къыщыдэзыхыгъэхэр 64-рэ мэхъух. Ансамблэхэм, музыкантхэм, орэдыIохэм осэшIхэр къащытхъугъэх. Урысыем культурэмкIэ и Министерствэ, Адыгеим ихэбзэ къулыкъушIэхэм фестивалым мэхьэнэ ин ратыгъ, къэкIощт фестиваль-зэнэкъокъур нахь гъэшIэгъон зэрэхъущтым зэдегупшысэх.
ЗэхэщэкIо купым итхьаматэу, Урысыем, Адыгеим, Ингушетием культурэмкIэ язаслуженнэ IофышIэу ШъэуапцIэкъо Аминэт къытиIуагъ лъэпкъ искусствэм, шIэжьым афэгъэхьыгъэ орэдхэр нахьыбэрэ фестивалым хагъэхьанхэм зэрэпылъыщтхэр. Узыщыщ хэгъэгум, лъэпкъым яорэдхэр къэпIонхэм мэхьэнэ ин фестивалым изэхэщакIохэм раты.
Адыгеим иныбжьыкIэхэу хагъэунэфыкIырэ чIыпIэхэр къыдэзыхыгъэхэр бэ мэхъух. Тэхъутэмыкъое районым иансамблэу «Нэфылъыр», Теуцожь районым щыщ пщынаоу Тыгъужъ Джэнэт щысэшIу къэзыгъэлъэгъуагъэхэм ащыщых. Софья Мединскаям, Юлиана Гордиенкэм, Артем Мокровым, Къэлэкъутэкъо Динарэ, Арина Акопян, ансамблэу «Кубаночкэм», зыгъэсапIэу «Радугэм», нэмыкIхэм щытхъуцIэхэр къыдахыгъэх.
Фестивалэу «Адыгеим ижъогъожъыехэр» дунаим щылъэкIуатэ. НыбжьыкIэхэр зэхищэхэзэ, ясэнаущыгъэ къызэIуехы.
Унагъор ящысэшIу
Артем Мокровыр Мыекъопэ районым щэпсэу, кIэлэеджакIу. Москва ителекъэтынхэм пчъагъэрэ ахэлэжьагъ.
— Сяни, сянэжъи искусствэм иIофышIэх, — къеIуатэ Артем Мокровым. — Орэд къэсIоныр сыгу рехьы.
Адыгэ Республикэм и Къэралыгъо филармоние и Къэралыгъо оркестрэу «Русская удалым» игъусэу Артем Мокровыр концертхэм ахэлажьэ. Фестивалэу «Адыгеим ижъогъожъыехэр» зыгъэсапIэ фэхъугъэу елъытэ.
Къэлэкъутэкъо Динарэ адыгабзэкIэ къыхидзэрэ орэдхэр гум екIух. Тэхъутэмыкъуае щыпсэурэ пшъэшъэжъыем ятэу Инвер «Адыгеим ижъогъожъыехэм» пщынаоу ахэлажьэщтыгъ. Непэ ар Адыгеим щыцIэрыIу, Тыркуем щыкIогъэ фестивальхэм ищытхъу щаIуагъ. Къэлэкъутэкъо Динари искусствэм щызэлъашIэщтэу тэгугъэ.
— Фестивалэу «Адыгеим ижъогъожъыехэр» еджапIэ сфэхъугъэу сэлъытэ, — къытиIуагъ ансамблэу «Ошъутенэм» иорэдыIоу, Адыгэ Республикэм изаслуженнэ артисткэу Даутэ Сусанэ. — Фестивалым хэлажьэхэрэм салъэплъэ, артист цIэрыIохэр къахэкIыщтхэу сэлъытэ.
Огу къаргъом жъуагъоу къыщынэфырэм гур зыфещэ. Адыгеим ичIыпIэ дахэхэр, ицIыф шIагъохэр зэзыгъэлъэгъу зышIоигъохэу фестивалым заочнэу хэлэжьагъэхэр зичэзыу Дунэе фестивалым Мыекъуапэ щызэIукIэнхэу, ясэнаущыгъэ къагъэлъэгъонэу афэтэIо.
ЕмтIылъ Нурбый.