Мыекъопэ футбол клубэу «Зэ­къошны­гъэм» итренер шъхьаIэу, Адыгэ Респуб­ликэм изаслуженнэ тренерэу Ешыгоо Сэфэрбый гъэзет­еджэхэм яупчIэхэм джэуап къаритыжьынэу, иеплъыкIэхэм тащигъэгъозэнэу телъэIугъ. — Футболым тыфэзэщыгъ, — къыти­Iуагъ Ешыгоо Сэфэрбый. – Европэм ихэгъэгухэм зэIукIэгъу гъэшIэгъонхэр ащэкIох. Испанием, Италием, Германием, Белоруссием, нэмыкIхэм язэIу­кIэгъухэм талъэплъэ. — Илъэс заулэкIэ узэкIэIэбэжьмэ, Зинедин Зидан Испанием ущыIукIэгъагъ. Шъузэготэу сурэт къышъутырахыгъагъ. — Зинедин Зидан ешIэкIо цIэрыIоу щытыгъ, «Реал» Мадрид итренер шъхьаI. Ар зипэщэ командэм сигуапэу сылъэплъэ. — Европэ футболым сыда кIэу хэплъагъорэр? — Футболыр лъэкIуатэ. Командэхэр яешIакIэхэм алъэхъух, хэкIыпIэу къагъотырэр сшIогъэшIэгъон. — Урысыем футболымкIэ иапшъэ­рэ куп я 23-рэ ешIэгъухэр щыкIуагъэх. Зэгъэпшэнхэр пшIыгъэха? — «Ростов», «Шъачэ», «Урал», «Ахмат», нэмыкIхэм 2019-рэ илъэсым ешIакIэу къагъэлъагъощтыгъэр къэтэшIэ­жьы. Мэзэ пчъагъэхэм загъэхьазырын алъэкIыгъэп. Рагъэжьэгъэ зэнэкъокъур зэпамыгъэунэу, яешIакIэ хагъахъозэ бэрэ тагъэгушIонэу афэсэIо. «Зенит», «Краснодар», «Локомотив», ЦСКА, фэшъхьаф командэ дэгъухэр тиIэх. Футболыр лъыкIотэщтэу сэгугъэ.   — «Зэкъошныгъэр» ятIонэрэ купым хэт, зэIукIэгъухэр шIэхэу ри­гъэжьэжьыщтха?   — Бэдзэогъум и 1-м «Зэкъошны­гъэм» зиугъоижьынэу итхъухьагъ. ЕшIа­кIохэм таIукIэщт, зэзэгъыныгъэхэр зыфэдэщтхэм татегущыIэщт.   — «Зэкъошныгъэм» иешIакIэ хигъэхъонэу шъуфэтэIо.   — Тхьауегъэпсэу.

ЕмтIылъ Нурбый.