«Ошъутенэр» игъусэхэм язэхэщакIу
Лъэпкъ шIэжьыр бзэм, тарихъым язэгъэшIэн, музыкальнэ искусствэм ихэхъоныгъэхэм япхыгъэу зэрэщытыр щыIэныгъэм къеушыхьаты.
Адыгэ Республикэм и Къэралыгъо филармоние иэстраднэ ансамблэу «Ошъутенэм» бзэ зэфэшъхьафхэмкIэ орэдхэр къеIох. Пэсэрэ лъэхъаным адыгэхэм щыIэкIэ-псэукIэу яIагъэм, лъэпкъ шэн-хабзэхэм афэгъэхьыгъэхэр щыIэныгъэм игъунджэх.
Къалэу ЦIэмэз (Новороссийск) ехьылIагъэр, «СихьакIэ» зыфиIорэр, фэшъхьаф орэдхэу лъэпкъ гупшысэр зыщыпхырыщыгъэхэр искусствэм пыщагъэхэм лъэшэу агу рехьых.
— Республикэм и Правительствэ зэхищэрэ мэфэкI концертхэм, хъугъэ-шIагъэхэм япхыгъэ зэхахьэхэм «Ошъутенэр» зэрахэлэжьэщтыр тшIэ зыхъукIэ, «СихьакIэр» къыIощтэу тыгугъэзэ, Iофтхьабзэм тэкIо, — игупшысэхэм тащегъэгъуазэ Дунэе Адыгэ Хасэм хэтэу, общественнэ IофышIэшхоу МэщфэшIу Нэдждэт. — Орэдышъор дахэ, гущыIэу хэлъхэм уагъэгъуазэ, лъэпкъ шIэжьыр Iэтыгъэу зэхэтэхы.
ШIэжьым илъагъохэр
— Ижъырэ адыгэ орэдхэу «Ошъутенэм» ирепертуар хэтхэр бэ мэхъух, — къеIуатэ ансамлэм ихудожественнэ пащэу, Адыгэ Республикэм искусствэхэмкIэ изаслуженнэ IофышIэшхоу, композиторэу ХьакIэко Алый. — Орэд пэпчъ гупшысэ хэхыгъэ иI. Сэмэркъэу зыхэлъыри, шIулъэгъур къизыIотыкIырэри, шIэжьым ехьылIагъэри лъэпкъ искусствэм ибаиныгъэх. Адыгэхэм ятарихъ гъогу, шэн-хабзэхэр тиорэдхэм ахэгъэщагъэх, купкIэу ахэлъыр цIыфхэм алъыдгъэIэсызэ тэгъэжъынчых.
Сэмэркъэу-кIэнэкIэлъэ орэдэу «ЩырытIымыр» макъэр Iэтыгъэу, шъабэу зэхэпхызэ, пшъашъэу зыфэгъэхьыгъэр плъэгъу пшIоигъоу ансамблэм уедэIу. «Си Пакъэр» нэмыкIэу гъэпсыгъэми, шIулъэгъу гупшысэу хэлъым узыфещэ.
«Гощэгъэгъым игъыбзэ» зызэхэпхыкIэ…
Ясэнэхьат феджагъэхэу, артист цIэрыIо хъугъэхэу Адыгеим орэдыIохэр иIэх. Мэшэлахь, республикэм ыцIэ музыкальнэ искусствэм щаIэтыгъ. Сэмэгу Гощнагъо, Шъэожъ Розэ, Андзэрэкъо Чеслав, Нэхэе Тэмарэ, нэмыкIхэм ягугъу къэтшIы зыхъукIэ, артист пэпчъ искусствэм зыкъыщызэIуихын зыщилъэкIыгъэ лъэныкъохэр къыхэтэгъэщых. Лъэпкъ шIэжьым ылъапсэ къыдэпшырэ гупшысэр яорэдхэмкIэ агъэдэхэныр, агъэбэгъоныр къадэхъугъ.
Адыгеим икультурэ фэгъэхьыгъэ зэхэхьэшхоу Москва щыкIорэм КIыкI Зулхьаджэ «Гощэгъэгъым игъыбзэ» къызыщеIом, искусствэм идунэе шэпхъэ лъагэхэм зэралъыIэсыгъэр зэхэщакIохэм къыхагъэщыгъ. Темыр КавказымкIэ апэрэ бзылъфыгъэхэм ащыщэу «РСФСР-м изаслуженнэ артистк» зыфиIорэ цIэ лъапIэр къыфаусыгъ.
— «Ошъутенэм» ихудожественнэ пащэу ХьакIэко Алый «Гощэгъэгъым игъыбзэ» къасIо шIоигъоу къызысэлъэIум, орэдым сыфэмыхьазырэу къысщыхъущтыгъ, — игупшысэхэм тащегъэгъуазэ Адыгэ Республикэм изаслуженнэ артисткэу Даутэ Сусанэ. — Илъэси 5-м нахьыбэ зытешIэм, «Гощэгъэгъым игъыбзэ» зэзгъашIэу сыфежьагъ.
КIыкI Зулхьаджэ дискым орэдыр зэрэтыритхагъэм Даутэ Сусанэ едэIузэ, ымакъэ диштэрэ къэIуакIэр къыгъотыгъ, орэдыр дахэу ыгъэжъынчыгъ.
Тэ — тыадыг
Гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэм июбилей фэгъэхьыгъэ пчыхьэзэхахьэу республикэм и Къэралыгъо филармоние щыкIуагъэм «Ошъутенэм» игъэкIотыгъэ концерт къыщитыгъ.
— Лъэпкъ орэдыбэ зэхахьэм щыIугъ, — къеIуатэ республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзан. — Тиорэдхэм адыгэхэм ятарихъ ащызэхэтэхы. Тиныдэлъфыбзэ нахьышIоу кIэлэеджакIохэм, ныбжьыкIэхэм ашIэным фэшI ащ фэдэ зэхахьэхэм пIуныгъэ мэхьэнэ ин ятэты. «Тэ — тыадыг» зыфиIорэ орэдым хэлъ гущыIэхэр зытхыгъэ ЛIыIужъу Адамэ тыгу къигущыIыкIыгъ. Бзэр, тарихъыр, шэн-хабзэхэр зэрэзэпхыгъэхэр тигупшысэхэм къапкъырэкIых.
— «Ошъутенэм» къыIогъэ орэдхэм тигуапэу тядэIугъ, — еIо гуманитар ушэтынхэмкIэ Адыгэ Республикэ институтым ипащэу ЛIыIужъу Адамэ. — Лъэпкъ шIэжьым ехьылIэгъэ Iофтхьабзэхэр нахьыбэрэ зэхэтщэнхэ тимурад.
Тигуапэу тядэIу
«Ошъутенэм» иорэдыIохэм псынкIэу узыIэпащэ. Дахэу зафапэ, артист нэшанэхэр гум рихьэу зэрахьэх. Даутэ Сусанэ, Мамхыгъэ Маринэ, ПIатIыкъо Маринэ, Алевтинэ Кобазевам яорэдхэри, якъашъохэри гум екIух. Жарэкъо Руслъан, Хьазэщыкъо Мосэ, адыгабзэкIи, урысыбзэкIи орэд къэзыIорэ Юрий Конжиным яIэпэIэсэныгъэ хагъахъо. Оркестрэм хэтхэу Хъут Рустам, Максим Злобиным, Максим Алиевым, Татьяна Нестеренкэм, Сергей Клишиным, макъэхэм Iоф адэзышIэрэ Никита Козенковым «Ошъутенэм» иконцертхэр къагъэдахэ. ОелI Адамэ зэхахьэхэр зэрещэх.
— Тхьабысымэ Умарэ, Гъот Аслъан, ХьакIэко Алый, нэмыкIхэм яорэдхэр къэтэIох, — тизэдэгущыIэгъу лъегъэкIуатэ Мамхыгъэ Маринэ. — Ансамблэр республикэм щашIэ, тиконцертхэм цIыфыбэ къызэряжэрэм тегъэгушIо.
Зичэзыу зэIукIэгъухэр
— Урысыем и Мафэ фэгъэхьыгъэ мэфэкI зэхахьэхэу Мыекъуапэ щыкIуагъэхэм тахэлэжьагъ, — къытиIуагъ «Ошъутенэм» ипащэу ХьакIэко Асе. — Лъэпкъ Iофтхьабзэу «Тэ — тыадыг» зыфиIорэр Къэбэртэе-Бэлъкъарым, Къэрэщэе-Щэрджэсым, Краснодар краим, нэмыкIхэм ащызэхэтщэнэу зытэгъэхьазыры. Тилъэпкъэгъухэр зыщыпсэурэ Тыркуем тырагъэблэгъагъ.
Адыгэ Республикэм культурэмкIэ иапэрэ министрэу Хьанэхъу Адамэ кIэщакIо фэхъуи, «Ошъутенэр» Мыекъуапэ щызэхащагъ. Художественнэ пащэу, композиторэу Гъот Аслъан ригъэжьэгъэ Iофыр лъэкIуатэ, илъагъохэр кIосэщтхэп.
— Адыгэр адыгэу дунаим щыпсэуным фэшI иныдэлъфыбзэ, икультурэ къыухъумэнхэ фае. Ащ фэгъэхьыгъэ зэхахьэу «Тэ — тыадыг» зыфиIорэм хэхъоныгъэхэр фэтшIыщтых, — къытиIуагъ Адыгэ Республикэм и Къэралыгъо филармоние ипащэу, Урысыем изаслуженнэ артистэу, Адыгеим, Темыр Осетием — Аланием янароднэ артистэу Къулэ Мыхьамэт.
— Лъэпкъ шIэжьым, тимузыкальнэ искусствэ афэгъэхьыгъэ зэхахьэхэр филармонием итворческэ купхэм зэхащэх. «Ошъутенэм» шIэныгъэлэжьхэр игъусэхэу фольклорым Iоф зэрэдишIэрэм, егъэжьапIэу ышIыгъэхэм хэхъоныгъэхэр афэтшIыщтых. ШIэжь зэхахьэхэм республикэ общественнэ движениеу «Адыгэ Хасэри» къахэдгъэлэжьэщт, тизэкъотыныгъэ зыгъэпытэрэ амалышIухэм талъыхъущт.
ЕмтIылъ Нурбый.