Искусствэм щашIэрэ орэдыIоу Мышъэ Азидэ Урысыем и Мафэ фэгъэхьыгъэу гущыIэгъу ты­фэхъугъ.

— МэфэкIым тыщызэфэгушIоныр шэнышIу тфэхъугъ, — игу­п­шысэхэм тащегъэгъуазэ Тэхъу­тэмыкъое районым лъэпкъ куль­турэмкIэ и Унэшхо иорэдыIоу Мышъэ Азидэ. — Сыфай Урысыем и Мафэ цIыфхэр зэфэнэгушIохэу щызэIукIэнхэу, сэлам фабэ щызэрахынэу.

— МэфэкIым ухэлэжьагъа?

— Интернетыр е нэмыкIырэ амалхэр дгъэфедэхэзэ, къат­Iо­хэрэ орэдхэр цIыфхэм алъыд­гъэIэсыгъэх.

— Медицинэ сэнэхьатэу къыхэпхыгъэмкIэ Iоф пшIэщтыгъ. Искусствэр нахь пшIогъэшIэгъона?

— Искусствэр шIу зыщалъэгъурэ унагъом сыщапIугъ. Сисэнэхьат зэблэсхъуныр ащ къы­пкъырыкIыгъэу сэлъытэ.

— Пшынахьыжъэу Ан­дзаур Адыгэ Республикэм инароднэ артист, пщы­нэо цIэрыIу.

— Адыгэ Республикэм и Къэ­ралыгъо орэдыIо-къэшъокIо ансамблэу «Ислъамыем» иоркестрэ Андзаур хэт. Тыркуем, Иорданием, Израиль, Москва, фэшъхьаф­хэм ащыIагъ. Лъэпкъ искусствэм ар къытегущыIэзэ, къэбар гъэшIэ­гъонхэм сащигъэгъозагъ. Медицинэ сэнэхьатыр сэ симыеу слъытэу сызыфежьэм, IофшIапIэр зэблэсхъугъ.

— Азид, укIэлэеджакIоу орэд къызэрэпIощтыгъэр, фестивальхэм, мэфэкI ­зэхахьэхэм уахэлажьэзэ щытхъур зэрэпфаIощтыгъэр дэгъоу къэсэшIэжьы.

— Сэри ахэр сщыгъупшагъэ­хэп. Гум зигъэпсэфынэу орэд къэпIощтымрэ искусствэр сэнэ­хьатэу къыхэпхыщтымрэ япхыгъэ гупшысэхэр зэзгъапшэхэу бэрэ къыхэкIыгъ. Нахь сызыфэщагъэр къыхэсхынымкIэ IэпыIэгъу къыс­фэхъугъэхэм сафэраз.

— Дунэе фестивалэу Тыр­куем щыкIуагъэм узыхэлажьэм, уиорэд зэ­хэзыхыгъэхэр къыпщытхъухэу бэрэ зэхэсэхы.

— IэкIыб къэралым щыпсэу­хэрэр тиадыгабзэ къедэIухэзэ, гущыIэхэр икъоу къагурымыIоу къыхэкIы. Арэу щытми, лъэпкъ шIэжьым, шIулъэгъум афэгъэхьыгъэхэм къядэIухэзэ, гушIуагъом зэлъекIух, Iэгу къытфытеох.

— Псэ зыпыт орэд дахэр гурыIогъошIоу алъытэба?

— ИкIэрыкIэу къэсIонэу къыкIэлъэIухэрэр бэ мэхъух.

— Республикэм иобщественнэ движениеу «Адыгэ Хасэм» итхьаматэу ЛIымыщэкъо Рэ­мэзан Тыркуем къызыщыодэIум, гум иорэдхэр къэпIуагъэхэу къытиIуагъ.

— Концертыр е нэмыкI зэха­хьэу узыхэлажьэрэр зыщыкIорэ чIыпIэм, уахътэм ялъытыгъэу къэпIощт орэдыр къыхэпхэу бэрэ къыхэкIы. КъытэдэIугъэхэм агу тырихьыгъэмэ, дгъэгушIонхэ тлъэ­кIыгъэмэ, тэри тиIофшIэн рэзэныгъэ хэтэгъуатэ.

— «Си Мурадин», «Ощ нахьи сынахь дах», «ШIу­лъэгъум насып къы­хэ­кIы», нэмыкIхэри адыга­бзэкIэ къэоIох.

— Зигугъу къэпшIыгъэхэр гум щыщ орэдых. ШIулъэгъум ехьы­лIагъэхэм гупшысэу ахэлъыр къыдэплъытэзэ, цIыфхэм алъыогъэIэсы.

— Урысыем ителекъэтынэу «Жъуагъом» изэ­нэкъокъу узэрэхэлэжьа­гъэм гукIэ фэбгъэзэжьэу къыхэкIыба?

— Хэгъэгум ишъолъыр 85-мэ къарыкIыгъэхэр зэнэкъокъоу «Жъо­гъуакIэм» зэфищагъэх. Бзэ зэфэшъхьафхэмкIэ орэдхэр къэтIуагъэх.

— «Си Мурадин» зыфи­Iорэр дэгъу дэдэу къэпIуагъэу осэшI купым хигъэу­нэфыкIыгъагъ.

— УишIэныгъэ зэрэхэбгъа­хъорэм имызакъоу, узыщапIугъэ республикэм ыцIэ Урысыем зэ­рэщызэхахырэм уегъэгушIо. Зэ­IукIэгъум ухэлажьэзэ цIыф гъэшIэгъонхэм нэIуасэ уафэхъу. «ЖъогъуакIэм» сидунэееплъыкIэ хэхъоныгъэхэр фишIыгъэх.

— Кавказ фэгъэхьыгъэ орэдымкIэ тизэдэгущыIэгъу тыухы сшIоигъу.

— «Кавказыр» урысыбзэкIэ къэсэIо. Урысыем ишъолъыр анахь инхэм Кавказ ащыщ, лъэп­къыбэ щэпсэу. Iэгу къысфытеохэзэ, къыздежъыухэзэ орэдэу къыхэсыдзагъэр къасIо зыхъукIэ, гум ихъыкIырэр гущыIэкIэ къэ­Iо­тэгъошIоп. Урысыем, Адыгеим, нэмыкIхэм якъэралыгъо быракъхэр пчэгушхом къызырахьэхэкIэ угу къаIэты, Адыгеир шъолъыр шъхьафэу Урысыем зэрэхэтым уегъэгушхо.

— Уигъэхъагъэхэм ахэбгъэхъонэу пфэтэIо.

— Тхьауегъэпсэу.