«Майкопчанкэр» мэфэкIхэм ахэлажьэ
Лъэпкъ кIэлэцIыкIу къэшъокIо ансамблэу «Майкопчанкэр» Iофтхьабзэхэм ахэлажьэзэ, цIыфхэр егъэгушIох.
ТекIоныгъэм ия 75-рэ илъэс фэгъэхьыгъэхэ онлайн зэхахьэхэу «Тызэгъусэу орэд къэтэIо», «ТекIоныгъэм и Маф», «Адыгеим идышъэ жъуагъохэр», «ЕгъэшIэрэ полк» зыфиIохэрэм, нэмыкIхэм «Майкопчанкэм» иIэпэIэсэныгъэ къащигъэлъэгъуагъ. Ансамблэм ихудожественнэ пащэу, Адыгэ Республикэм инароднэ артистэу Къулэ Амэрбый заом ехьылIэгъэ усэхэм къяджагъ.
КIэлэцIыкIухэм я Дунэе мафэ онлайн концертэу «Майкопчанкэм» къытыгъэм ансамблэм икъэшъо хэхыгъэхэр къыщигъэлъэгъуагъэх. Лъэпкъ къашъохэр агу зэрэрихьырэр къыхагъэщызэ, искусствэм пыщагъэхэм яеплъыкIэхэр зэлъыIэсыкIэ амалхэм къащаIотагъэх. Анахьэу къыхагъэщыгъэр «Майкопчанкэм» илъэпкъ къашъохэр зэгъэфагъэхэу кIэлэеджакIохэм къызэрашIыхэрэр ары.
— Псэ зыпыт концертхэу филармонием, культурэм иунэхэм ащыкIохэрэм афэдэу онлайн зэхахьэхэр хъухэрэп. Арэу щытми, тиIэпэIэсэныгъэкIэ цIыфхэм талъыIэсын, дгъэгушIонхэ зэрэтлъэкIырэм рэзэныгъэ хэтэгъуатэ, — еIо художественнэ пащэм.
Урысыем и Мафэ фэгъэхьыгъэ Iофтхьабзэхэм «Майкопчанкэм» дэгъоу зафигъэхьазырыгъ. Хэгъэгум и Правительствэ ишIухьафтын къызыфагъэшъошагъэу, Урысыем культурэмкIэ изаслуженнэ IофышIэу Къулэ Амэрбый тызэрэщигъэгъозагъэу, Урысыем ихэхъоныгъэхэм, хэгъэгум ищыIэкIэ-псэукIэ яхьылIэгъэ Iофтхьабзэхэм ахэлажьэх. Ансамблэм урысхэр, адыгэхэр, ермэлхэр, къэндзалхэр, нэмыкIхэр хэтых. Лъэпкъ искусствэм зэрэзэфищагъэхэм егъэгушIох.