Республикэм дзюдомкIэ испорт еджапIэу Кобл Якъубэ ыцIэ зыхьырэм зыщызыгъэсэрэ Датхъужъ Алый иIэпэIэсэныгъэ хигъахъозэ, лъэгапIэхэм афэкIо.

Пщыжъхьаблэ щапIугъэ нарт шъаор Европэм, Урысыем язэнэкъокъухэм ахэлажьэ, илъэс къэс игъэхъагъэхэм ахегъахъо.

Урысыем иныбжьыкIэхэм язэнэкъокъу 2017-рэ илъэсым зыхэлажьэм, я 5-рэ чIыпIэр къыдихыгъ. Европэм дзюдомкIэ и Кубок къыдэхыгъэным 2018-рэ илъэсым ныбжьыкIэхэр зыфэбанэхэм, А. Датхъужъым я 5-рэ чIыпIэр къыфагъэшъошагъ. Илъэс 21-м нэс зыныбжьхэр ащ щызэIукIагъэх.

Хэгъэгум и Къыблэ 2018-рэ илъэсым изэнэкъокъу А. Датхъужъым дышъэр къыщихьыгъ. Урысыем и Кубок къыдэхыгъэнымкIэ 2019-рэ илъэсым Мыекъуапэ щыкIогъэ зэнэкъокъум А. Датхъужъым джэрзыр къыщыфагъэшъошагъ.

 Мыгъэ илъэс 23-м нэс зыныбжьхэм язэнэкъокъоу Урысыем ибэнакIохэр зыщызэIукIагъэхэм тыжьыныр къыщыдихыгъ. Хэгъэгум дзюдомкIэ ихэшыпыкIыгъэ командэ хэтэу батырым алырэгъум щыриIэщт бэнэгъухэм зафегъэхьазыры.

Датхъужъ Алый иапэрэ тренерыр къоджэ спортым шIукIэ щашIэ. Ар Адыгэ Республикэм изаслуженнэ тренерэу Нэджыкъо Руслъан. Джырэ уахътэм Адыгэ Республикэм изаслуженнэ тренерэу Беданыкъо Рэмэзан ипащэу икъулайныгъэ хигъахъозэ, дзюдом ишъэфхэр А. Датхъужъым зэрегъашIэх.

— Къэбар гушIуагъо Москва къикIыгъ, — къытиIуагъ республикэм дзюдомкIэ испорт еджапIэу Кобл Якъубэ ыцIэ зыхьырэм ипащэу, Адыгеим дзюдомкIэ ихэшыпыкIыгъэ командэ итренер шъхьаIэу Бастэ Сэлымэ. — Урысыем спортымкIэ и Министерствэ иунашъокIэ Датхъужъ Алый дзюдомкIэ спортым имастер щытхъуцIэ къыфагъэшъошагъ.

— Тренерхэм, спортым сыщылъыкIотэнымкIэ IэпыIэгъу къысфэхъухэрэм «тхьашъуегъэпсэу» ясIожьынэу сыфай, — имурадхэм тащегъэгъуазэ Адыгэ къэралыгъо университетым июридическэ факультет щеджэрэ Датхъужъ Алый. — Олимпиадэхэм сахэлэжьэныр сигухэлъ шъхьаIэхэм ащыщ.

Уимурадхэр къыбдэхъунхэу, нахьыбэрэ тыбгъэгушIонэу пфэтэIо, Алый! Илъэс къэс спортышхом узэрэщылъыкIуатэрэм тегъэгушхо.

Cурэтым итыр: cпортым имастерэу Датхъужъ Алый.

 ЕмтIылъ Нурбый.