Урысыем футболымкIэ иапшъэрэ куп хэт командэхэм 2019 — 2020-рэ илъэс ешIэгъур мэкъуогъум и 21-м рагъэжьэжьынэу загъэхьазыры.

Хэгъэгум футболымкIэ и Союз игъэцэкIэкIо куп изэхэсыгъо къызэрэщаIуагъэу, Урысыем и Правительствэ зэхэщэн IофыгъохэмкIэ IэпыIэгъу къафэхъузэ, зэнэкъокъур рагъэкIокIыщт.

Европэм иопыт агъэфедэщт. ЗэIукIэгъухэр зыщыкIощтхэ стадионхэм тIысыпIэу яIэм ипроценти 10-м телъытагъэу билетхэр ащэщтых. Футболыр зышIогъэшIэгъонхэу стадионым щеплъынэу фаехэр бэ мэхъух. Арэу щытми, амалэу щыIэм емызэгъыхэ хъущтэп.

Адыгеим щыпсэухэу «Краснодар» иешIэгъухэм къалэм щеплъы зышIоигъохэм упчIабэ яI. Илыягъэу мыгумэкIынхэу тичIыпIэгъухэм тыкъяджэ. Джыри уахътэ щыI, хэкIыпIэхэм гъэзетеджэхэр ащыдгъэгъозэщтых.

ЕмтIылъ Нурбый.