Урысыем, Адыгеим янароднэ артистэу, композиторэу Дмитрий Шостакович ыцIэкIэ агъэнэфэгъэ шIухьафтыныр къызыфагъэшъошэгъэ Нэхэе Аслъан Конституцием зэхъокIыныгъэхэр фэшIыгъэнхэм иеплъыкIэхэр къыриIолIэнхэу телъэIугъ.

— Тихэгъэгу лъэпкъыбэ щэпсэу, — къытиIуагъ Адыгэ Республикэм и Къэралыгъо орэдыIо-къэшъокIо ансамблэу «Ислъамыем» ихудожественнэ пащэу, республикэм икомпозиторхэм я Союз итхьаматэу Нэхэе Аслъан. — Лъытэныгъэ зэфэтшIыжьызэ, щыIэныгъэм хэхъоныгъэхэр щытшIынхэм фэшI музыкальнэ искусствэм мэхьэнэ ин иIэу сэлъытэ.

— Лъэпкъ пэпчъ имузыкальнэ искусствэ щыIэныгъэм щылъигъэкIотэнымкIэ сыда Конституцием хатхэжьы пшIоигъор?

— Бзэ уимыIэу лъэпкъ ухъущтэп. Ныдэлъфыбзэм изэгъэшIэн, игъэфедэн афэгъэхьыгъэ хэбзэ унэшъо пытэхэр тиIэнхэ, ахэр зэрагъэцакIэхэрэм лъыплъэрэ къулыкъушIэхэм пхъашэу тяупчIыжьын тлъэкIэу Iофхэр зэхэщэгъэнхэ зэрэфаер Конституцием къыщыхэтымыгъэщы хъущтэп. Хэбзэ шапхъэ щыIэ зыхъукIэ, Iофыр зымыгъэцакIэрэр бгъэмысэн плъэкIыщт.

 — Республикэм урысыбзэр, адыгабзэр, IэкIыб къэралыбзэхэр щызэрагъашIэх.

 — Адыгеим бзэхэр щызэрамыгъашIэу зыми къыуиIощтэп. Пушкиным, Толстоим, нэмыкIхэм урысыбзэкIэ атхыгъэхэм сяджэ. Урысыем, Адыгеим зэхъокIыныгъэшIухэу ащыхъухэрэр сэлъэгъух. ЦIыфхэми яфэIо-фашIэхэр гъэцэкIэгъэнхэмкIэ егъэжьэпIэшIухэр Адыгеим щашIыгъэх, тапэкIи щашIыщтых, ау гумэкIэу тиIэхэри къэтIонхэ фае.

 Лъэхъаным дештэх

 — Бзэм къыфэдгъэзэжьмэ сыда джыри къытэпIощтыр?

 — Тятэжъ пIашъэхэу тхакIи, еджакIи зымышIэщтыгъэхэм аусыгъэ орэдхэу тифольклор къыхэтхыжьыгъэхэр лъэхъаным диштэхэу зэдгъафэхэзэ «Ислъамыем» къеIох, ансамблэр дунаим цIэрыIо щыхъугъ. Музыкальнэ искусствэр лъытымыгъэкIуатэмэ, Интернетым, нэмыкIхэм зызыщаушъомбгъурэ лъэхъаным ти адыгабзэ сыда къырыкIощтыр? «Гощэгъэгъым игъыбзэ», «ЩырытIымыр», лIыхъужъ ыкIи шIулъэгъу орэдхэр хэта адыгабзэкIэ къэзыIощтыр, хэта тиконцертхэм яплъыщтыр?

— УиныдэлъфыбзэкIэ укъызэхахын, укъызэхашIыкIын фае.

— Ары, адыгабзэмрэ литературэмрэ ясыхьат пчъагъэу еджапIэм щакIурэм, программэу зэрагъашIэрэм, фэшъхьафхэм хэбзэ екIолIакIэу ящыкIагъэр Конституцием хэтхэгъэнхэр ищыкIагъэу сэлъытэ.

— Тиадыгабзэ дунаим нахьышIоу щыжъынчыным фэгъэхьыгъэ гупшысэхэмкIэ тизэдэгущыIэгъу тыухы сшIоигъу.

 — Узыдэпсэурэ лъэпкъым икультурэ, иискусствэ, ыбзэ пшIэхэ зыхъукIэ, лъытэныгъэу фэпшIырэм зыкъиIэтыщт. ТекIоныгъэм ия 75-рэ илъэс фэгъэхьыгъэ Iофтхьабзэхэр джыри зэхэтщэщтых. Дунаим щызэлъашIэрэ орэдэу «ТекIоныгъэм и Маф» зыфиIорэр «Ислъамыем» иартисткэ цIэрыIоу ХъокIо Сусанэ адыгабзэкIэ зэридзэкIыжьи, ансамблэм къыIуагъ.

 — ЦIыфхэм ар лъэшэу агу зэрэрихьыгъэм сыщыгъуаз.

 — Урысыем и Мафэ игъэмэфэкIын мэкъуогъум и 12-м тыхэлэжьэщт. Урысые Федерацием и Гимн адыгабзэкIэ зэдзэкIыгъэу «Ислъамыем» къыIощт. Тыбзэ дгъэлъапIэзэ, музыкальнэ искусствэм зызэриушъомбгъурэр щыIэныгъэм тапэкIи къыщытIотэщт, Конституцием тырыгъозэщт.

 — Шъуигухэлъхэр къыжъудэхъунхэу шъуфэтэIо.

 — Тхьауегъэпсэу.

ЕмтIылъ Нурбый.