Мыекъопэ гандбол клубэу «Адыифым» ипащэу Къудайнэт Мэджыдэ илъэс ешIэгъур зэраухыгъэм, командэм хэкIыжьыгъэхэм, кIэу аштэщтхэм афэгъэхьыгъэу гущыIэгъу тыфэхъугъ.

— Хэгъэгум гандболымкIэ изэнэкъокъоу 2019 — 2020-рэ илъэс ешIэгъум тызыхэлэжьагъэр тфагъэнэфэгъэ уахътэр къэмысэу тыухыгъэ, — къеIуатэ Къудайнэт Мэджыдэ. — Дунаир зэлъызыкIугъэ зэпахырэ узым зыщытыухъумэным фэшI Урысыем гандболымкIэ и Федерацие ащ фэдэ унашъо ыштагъ.

— ЕплъыкIэу о фыуиIэр къытаIоба.

— Зэнэкъокъум кIэухэу фэхъущтыр къэшIэгъуаеу зэрэщытым спортыр егъэдахэ. Илъэс ешIэгъур лъыдгъэкIуатэ сэ сшIоигъуагъ шъхьае, цIыфхэм япсауныгъэ икъэухъумэн Iофыгъо шъхьаIэу зэрэщытыр къыдэтлъытэн фае.

— «Ростов-Доным» апэрэ чIыпIэр фагъэшъошагъ, Европэм и Кубок къыдэхыгъэным фэбэнэщт. «АГУ-Адыифым»…

— Адыгеим иешIакIохэм я 9-рэ чIыпIэр къыдахыгъ.

— БлэкIыгъэ илъэсхэм ядгъапшэмэ, «АГУ-Адыифыр» зэнэкъокъум щылъыкIуатэу олъыта?

— Я 8-рэ чIыпIэр къыдэтхын, командэ анахь лъэшхэм якIэух ешIэгъухэм тахэлэжьэн тимурадыгъ. Тигухэлъхэр икъоу дгъэцэкIагъэхэп, арэу щытми, тиешIакIэ хэдгъэхъуагъэу, тылъыкIотэным фэшI егъэжьэпIэшIухэр тшIыгъэхэу уахътэм къегъэлъагъо.

ТекIоныгъэм уегъэгушхо

— Зэнэкъокъум текIоныгъэу къыщыдэшъухырэр нахьыбэ хъугъэ.

— «Луч» Москва, «Университет» Ижевск, «Уфа-Алиса» Уфа, «Динамо-Синара» Волгоград ешIэгъухэр къашIотхьыгъэх. Мыекъуапэ щыкIогъэ зэIукIэгъухэр арых къыхэзгъэщыхэрэр. Тикъалэ тыдэкIыгъэу тешIэзэ, зыцIэ къетIогъэ командэхэм очкоуи 3 ныIэп къашIотхьыгъэр.

— «Ростов-Доным», «Ладэм», нэмыкI командэ лъэшхэм шъуатекIон шулъэкIыщтми сшIэрэп, ау шъощ фэдэхэм зэIукIэгъухэр къашIошъухьыным сыда къепIолIэщтыр?

— УпчIэр къызэрыкIоп. «Динамо-Синарэм», «Ставропльем», нэмыкIхэм «Адыифыр» атекIон ылъэкIыщтыгъэу сэлъытэ. ЕшIэгъум къырыкIощтым нахьышIоу зыфэдгъэхьазырын фае.

— Илъэс ешIэгъум тренер шъхьаIэр щызэблэшъухъугъ.

— Урысыем изаслуженнэ тренерэу Александр Реввэ Адыгеим игандбол щашIэ. «Звезда» Звенигород, «Кубань» Краснодар Iоф ащишIагъ. «Адыифым» хэхъоныгъэхэр ышIынхэм иIахьышIу хилъхьагъ. Ар къыдэтлъыти, «Адиф-2-м» итренер шъхьаIэу Александр Реввэ дгъэнэфагъэ.

— Никита Голуб «Адыифым» итренер шъхьаIэ хъугъэ.

— Гандболым Никита Голуб щыцIэрыIоу слъытэрэп. «Адыиф-2-м» ипащэу хэгъэгум иныбжьыкIэхэм язэнэкъокъу медальхэр къыщыдихыгъэх. Урысыем икIэлэеджакIохэм я Спартакиадэ дышъэр къыщихьыгъ, Адыгэ Республикэм изаслуженнэ тренер…

— Чыжьэу шъумыIабэу Мыекъуапэ щыпсэурэ тренерыр къызэрэхэшъухыгъэр дэгъу.

— Тренерхэм яIэнатIэхэр зызэблэтэхъухэм «Адыифым» иешIакIэ хигъэхъуагъ. ТекIоныгъэр нахьыбэрэ къыдахы зэрэхъугъэм типшъашъэхэри, тэри тигъэгушхуагъ.

ЕгъэжьэпIэшIухэр

— «Адыифыр» зэнэкъокъум щылъыкIотэным фэшI мыгъэ егъэжьапIэу шъушIыгъэхэм уакъытегущыIэ тшIоигъу.

— «Кубань» Мыекъуапэ тызэрэщыдешIагъэр къыхэзгъэщынэу сыфай. Пчъагъэр зэфэдэу зэIукIэгъур зэрэтыухыгъэм имызакъоу, текIоныгъэм фэбэнэн зэрилъэкIыщт ешIакIэ «Адыифым» къыгъэлъэгъуагъ. «ЗэIукIэгъур тшIуахьыщт» аIозэ типшъашъэхэр ешIапIэм зэрихьэщтыгъэхэм кIэух фэтшIыгъэу тлъытэ хъущт.

— «Адыиф-2-м» укъытегущыIагъэп.

— БлэкIыгъэ илъэсым елъытыгъэмэ, «Адыиф-2-р» зы чIыпIэкIэ дэкIоягъ, я 9-рэ хъугъэ. Тренер шъхьаIэу «Адыифым» иIэгъэ Александр Реввэ нахь ныбжьыкIаIохэм Iоф адишIэным хэгъозагъ, бэкIэ тегъэгугъэ.

Лъапсэр орэбагъо

— Мэджыд, «Адыифым» инеущырэ мафэ зыфэдэн ылъэкIыщтым сыда къепIолIэщтыр?

— «Адыифым» нахьыбэ хъухэу хэтхэр Адыгэ Республикэм щапIугъэхэ пшъашъэхэр арых. ЧIыпIэ гандболым хэхъоныгъэхэр ышIынхэмкIэ амалышIухэр тиIэх. Джэнчэтэ СултIан ыцIэ зыхьырэ спорт еджапIэм ипащэу ЛIыбзыу Сусанэ «Адыифым» къэлэпчъэIутэу щешIэщтыгъ. Анна Кареевар, Анна Игнатченкэр, Яна Усковар, нэмыкIхэу Мыекъуапэ щапIугъэхэр дунэе гандболым цIэрыIо щыхъугъэх. Сэнаущыгъэ зыхэлъ кIэлэеджакIохэр непи клубым щытэгъасэх.

— «Адыиф-2-м» къыхэкIыгъэхэ пшъашъэхэу командэ шъхьаIэм щешIэхэрэм ацIэхэр къытфеIохэба.

— Сигуапэу къахэзгъэщыных. 2002 – 2003-рэ илъэсхэм къэхъугъэхэ Алина Морозовам, Мария Кучеренкэм, Диана Казихановам, Юлия Кожубековам, Дарина Никулинам, Ангелина Куцеваловам «Адыифым» испорт шъуашэ ащыгъэу суперлигэм щешIэх. Пшъашъэхэр Урысыем ихэшыпыкIыгъэ ныбжьыкIэ командэхэм арагъэблагъэх, дунэе зэIукIэгъухэм ахэлажьэх.

ТигумэкIхэр

— Гъэзетеджэхэр зыгъэгумэкIыхэрэ упчIэхэм татегъэгущыI.

— Дэгъу, къэупчI.

— Хэта «Адыифым» хэкIыжьыгъэр?

— Гум къео, ау ешIэкIо дэгъухэр «Адыифым» къыхэдгъэнэжьынхэ тлъэкIыгъэп. Командэм икапитанэу Ксения Дьяченкэр, къэлапчъэмкIэ Iэгуаор анахьыбэрэ дэзыдзэхэрэм ащыщэу Алиса Дворцеваяр «Звезда» Звенигород аштагъэх. Анна Ефимкинам иIэпэIэсэныгъэ Мыекъуапэ щыхигъэхъуагъ, «Кубань» икIэрыкIэу аштэжьыгъ. Ксения Зубовар «Динамо-Синара» Волгоград рагъэблэгъагъ.

— НэмыкI пшъашъэхэри «Адыифым» хэкIыжьыхэ ашIоигъу.

— Ащи тыщыгъуаз, ау ацIэхэр къетIощтхэп. Уахътэ тешIэн фае.

— Жъугъасэхэрэ ешIакIохэр «Адыифым» хэмыкIыжьыхэу ахьыбэрэ тагъэгушIонымкIэ сыда ишъухъухьэрэр?

— Илъэсыбэмэ ателъытэгъэ зэзэгъыныгъэхэр адэтэшIых. Дунэе гандболым опытэу иIэр къызыфэдгъэфедэщт.

— ХэкIыжьыгъэхэм ачIыпIэ ижъугъэхьащтхэр къэпIонхэм уфэхьазыра?

— Дэгъоу ешIэрэ нэбгыри 3-мэ зэзэгъыныгъэ адэтэшIы, нэмыкI ешIакIохэри къедгъэблэгъэнхэ тимурад.

— ЗэхъокIыныгъэхэр зыфэхъухэрэ «Адыифыр» 2020 — 2021-рэ илъэс зэнэкъокъум зыфэбэнэщтым клубым шъущытегущыIагъа?

— Республикэм и Правительствэ зэхэщэн IофхэмкIэ IэпыIэгъу къытфэхъу. Командэ пэпчъ зэхъокIыныгъэхэр фэхъух, тыгу дгъэкIодырэп. «Адыифыр» нахь дэгъоу зэрешIэщтым тыпылъын, спортыр зышIогъэшIэгъонхэу къытфэгумэкIыхэрэр нахьыбэрэ дгъэгушIонхэ тимурад.

— Гъэхъагъэхэр шъушIынхэу шъуфэтэIо.

— Тхьауегъэпсэу.

ЕмтIылъ Нурбый.