КIэлэцIыкIу ыкIи Iэтэхъо художественнэ творчествэмкIэ Дунэе фестиваль-зэнэкъокъоу «Адыгеим ижъогъожъыехэр» зыфиIорэр мы илъэсым мэкъуогъум и 27 – 29-м щыIэщт. Адыгэ автоном хэкур зызэхащагъэр илъэси 100 зэрэхъурэм ыкIи шIэжьымрэ дзэ щытхъумрэ я Илъэс ар фэгъэхьыгъэщт. Ащ изыфэгъэхьазырын джы аублагъ.

Адыгэ Республикэм культурэмкIэ и Министерствэрэ лъэпкъ культурэм и Гупчэрэ Iофтхьабзэм икIэщакIох.

Зэнэкъокъур 1997-рэ илъэсым къыщегъэжьагъэу зэхащэ, ау мыгъэ пандемием къыхэкIыкIэ апэрэу заочнэ шIыкIэм тетэу рекIокIыщт. Iофтхьабзэм къыгъэнэфэрэ шапхъэхэм атетэу къатырэ видеоматериалхэм уасэ афашIыщт.

Мэхьанэ зиIэ фестиваль- зэнэкъокъум нэбгырэ 800-м ехъу хэлажьэ ашIоигъоу къатыгъ. Ялъэпкъ культурэ, ясэнаущыгъэ, яIэпэIэсэныгъэ ыкIи искусствэм шIулъэгъоу фыряIэр къагъэлъэгъощт творческэ купхэу ыкIи хэушъхьафыкIыгъэ орэдыIохэу къэралыгъо благъэхэм ыкIи чыжьэхэм къарыкIыщтхэм: Индием, Германием, Израиль, Иорданием, Тыркуем, Молдовэм, Румынием, Белоруссием, Оренбург, Ростов ыкIи Волгоград хэкухэм, Ставрополь, Краснодар крайхэм, Къэбэртэе-Бэлъкъар, Къэрэщэе-Щэрджэс, Чэчэн ыкIи Адыгэ республикэхэм.

IэкIыб къэралыгъохэм, Урысыем якультурэ ыкIи яискусствэ ащызэлъашIэрэ цIыфхэр зыхэхьащтхэ купым зэнэкъокъум хэлажьэхэрэм уасэ фишIыщт.

IэкIыб чыжьэм ыкIи благъэм яныбжьыкIэхэм зытырахыгъэ видеороликхэр культурэм епхыгъэ социальнэ хъытыухэм къарыхьащтых: @mincult_ra, @cnk01.ra, Facebook, Вконтакт, Адыгеим лъэпкъ культурэмкIэ и Гупчэ и YouTube-канал.

Iофтхьабзэм текIоныгъэ къыщыдэзыхыгъэхэм ыкIи хэлэжьагъэхэм дипломхэр, кубокхэр, шIухьафтынхэр аратыщтых.

(Тикорр.).