Адыгэ Республикэм и Къэралыгъо филармоние инысхъэпэ театрэу «Дышъэ къошыным» ихудожественнэ пащэу Сихъу Станислав илъэс IофшIэгъур зэраухыгъэм, мурадхэм къатегущыIэнэу телъэIугъ.

— Филармонием изал цIыкIу тикъэгъэлъэгъонхэр щызэхэтэ-щэх, — къеIуатэ Адыгэ Республикэм инароднэ артистэу Сихъу Станислав. — КIэлэцIыкIухэм ташIогъэшIэгъон.

— КIэлэцIыкIухэм язакъоп, ны-тыхэри филармонием къэкIох, къэгъэлъэгъонхэм ягуапэу яплъых.

— Къалэу Мыекъуапэ, Шытхьалэ, Мыекъопэ, Джэджэ район-хэм, нэмыкIхэм къарыкIыхэрэр тиспектаклэхэм ащытэлъэгъух. ТIысыпIэ зэрамыгъотырэм фэшI зы мафэм гъогогъуитIо къэгъэлъэгъоныр театрэм щыкIоу къыхэкIы.

— Пшысэхэм атехыгъэхэ къэгъэлъэгъонхэу хьэкIэ-къуакIэхэм, щагу бзыухэм, фэшъхьафхэм яхьылIагъэхэр гъэшIэгъонэу гъэпсыгъэнхэм сыда анахьэу къыхэжъугъэщырэр?

— КIэлэцIыкIухэр пшысэм техыгъэ къэгъэлъэгъоным еплъыхэзэ, гупшысэхэм зэлъакIух. Тыгъужъым, мышъэм, баджэм, нэмыкIхэм ярольхэр къэзышIыхэрэ артистхэм язекIокIэ-шIыкIэхэм зыIэпащэх. КIэлэцIыкIур къэгъэлъэгъоным ыгукIэ хэтэщэ, зэхихырэм шIошъхъуныгъэ фыриIэу мэдаIо.

— Пшысэхэр хъугъэ- шIэгъэ къэбарым афегъада?

— Ары зэрэхъурэр. КIэлэ-цIыкIум идунай гукIи, псэкIи ухэхьэшъ, гъусэ уфэхъугъэу къэгъэлъэгъоным ори уеплъы.

— Тыгъужъым гукIэгъу хэлъэу, хьэкIэ-къуакIэхэм IэпыIэгъу афэхъу шIоигъоу спектаклэм ащытлъэгъоу къыхэкIы.

— Зы чIыгу тыщэпсэу. Тызэпэмыуцоу, гуфэбэныгъэ зэфытиIэу тызэдыщыIэ зэрэтшIоигъор къэгъэлъэгъоным къыщытIуатэу къыхэкIы…

— ТхьакIумкIыхьэр ишэн-зекIуакIэхэмкIэ тхьакIумкIыхьэу, баджэр — баджэу къэнэжьынхэм кIэлэцIыкIухэр есагъэх.

— Тэ искусствэм зедгъэушъомбгъузэ, еплъыкIэ зэфэшъхьафхэр спектаклэм хэдгъэхьанхэр тшIотэрэз.

ПIуныгъэм фэIорышIэ

— Шэн-хабзэхэм афэгъэхьыгъэхэр гурыIогъошIоу къэшъогъэлъагъох.

— Адыгэ шъуашэр нысхъапэм щыгъ, къашъор пчэгум къыщешIы. Ар цIыфхэм ашIогъэшIэгъон. Дахэр дэхагъэ хэлъэу къэдгъэлъагъо тшIоигъу. Нэнэжъ-тэтэжъхэм, ны-тыхэм кIэлэцIыкIур зэрафэпсэурэр, щыIэныгъэм еплъыкIэу фыриIэр, фэшъхьафхэри лъэпкъ шIэжьым, пIуныгъэм дештэх.

— Иягъэ къэзыгъэкIорэ тхьакIумкIыхьэу Букэ изекIуакIи кIэлэцIыкIухэр ежъугъэплъыгъэх.

— Режиссерэу Нэгъой Асыет спектаклэр ыгъэуцугъ. Дэгъумрэ дэимрэ кIэлэцIыкIухэм зэрагъэпшэнхэ, янэ-ятэхэу спектаклэм еплъыхэрэр IэпыIэгъу къафэхъухэзэ, зэфэхьысыжьхэр ашIын- хэм фэтэгъасэх.

Уахътэм иджэмакъ

— Станислав, шъуиIофшIакIэ тыгу рехьы, ау Интернетыр, нэмыкI зэлъыIэсыкIэ амалхэр нахь игъэкIотыгъэу зыщагъэфедэрэ уахътэм шъузэрэщылъыкIотэщтым къытегущыIэба.

— Лъэшэу тызыгъэгумэкIырэ Iофыгъохэм ар ащыщ. КIэлэцIыкIум пIуныгъэ дэгъу ептыным фэшI щыIэныгъэм изэхъокIыныгъэхэр къыдэплъытэнхэ фае. Искусствэм цIыфыр егъасэ, ащ фэгъэхьыгъэу политикэм, щыIэныгъэм апылъхэм къатхыгъэр макIэп. Театрэм кIэлэцIыкIухэр нахь фэщагъэхэу псэунхэм фэшI амалышIухэр щыIэх. КIэлэцIыкIухэм ягулъытэ къэIэтыгъэным театрэр хэлажьэ.

— Театрэм щыкIорэ къэгъэлъэгъонхэм тяплъы зыхъукIэ, кIэлэцIыкIухэм ятелефонхэр къаштэхэрэп.

— Телефонхэр гъэкIосэгъэнхэ фаеу тэлъытэ. Ащ изакъоп къыхэзгъэщымэ сшIоигъор. Спектаклэр еплъыхэрэм ашIогъэшIэгъон зыхъукIэ, телефоныр гъэбылъыгъэкIэ къызэраштэщт шIыкIэм егупшысэщтхэп.

— КIэу жъугъэуцущт къэгъэлъэгъонхэм тащыгъэгъуазэба.

— Мыгъэ тикъэгъэлъэгъонхэм къахэхъощтхэр бэ мэхъух. Театрэм ирежиссерэу Нэгъой Зу- рыет «Пачъыхьэу Вруляля» зыфиIорэр егъэхьазыры. ТекIоныгъэм ия 75-рэ илъэс фэгъэхьыгъэу музыкант цIыкIум ехьылIагъэри З. Нэгъоим егъэуцу.

— АдыгабзэкIэ шъогъэхьазыры Къуекъо Налбый ытхыгъэм техыгъэр.

— «Рыу, сибэщ!» зыфиIорэр Нэгъой Асыет дэгъоу ыгъэуцущтэу сэлъытэ. Ащ фэшъхьаф пьесэхэри дгъэхьазырынхэ тимурад.

— «Морозко» зыфиIорэ къэгъэлъэгъоным сыдигъо теплъын тлъэкIыщта?

— Ащ сэ Iоф дэсэшIэ, 2020-рэ илъэсым икIэух ехъулIэу къэдгъэлъэгъон тлъэкIыщт.

КъэзышIыхэрэр

— КIэлэцIыкIухэм абзэкIэ къэгущыIэнхэ зылъэкIыхэрэ артист дэгъухэр шъуиIэх.

— Сергей Ведериным, Адышэс Спартак, Юрий Григоренкэм, Капэ Саидэ, Евгений Колочевым, ТIэшъу Светланэ ярольхэр дэгъоу къашIых.

Театрэм ипащэу Джолэкъо Ларисэ къызэрэтиIуагъэу, ахэр арых тикъэгъэлъэгъонхэр цIыф- хэм алъызыгъэIэсыхэрэр.

ЕплъыкIэхэр

— Сипшъэшъэжъые сигъусэу къэгъэлъэгъонхэм сигуапэу сяплъы, — къытиIуагъ искусствэм иIофышIэу Светлана Митус. —Артистхэр дахэу фэпагъэх, спектаклэр къызаухыкIэ рольхэр къэзышIыгъэхэм тагоуцозэ нэпэеплъ сурэтхэу къыттырахыхэ-рэр гукъэкIыжь гъэшIэгъонхэм ахэтэлъытэх.

— Сипшъашъэхэу Данэрэ Аминэрэ «Дышъэ къошыным» икъэгъэлъэгъонхэр лъэшэу агу рехьых, — игупшысэхэр къытфеIуатэх искусствэхэмкIэ Дунэе зэнэкъокъухэм ялауреатэу Набэкъо Бэлэ. — ТикIэлэцIыкIухэм адыгабзэр, шэн-хабзэхэр нахьышIоу зэрагъэшIэнхэмкIэ театрэм икъэгъэлъэгъонхэр зыгъэсапIэ афэхъух. Артистхэм гурыIогъошIоу ягущыIэхэр зэрагъэпсыхэрэм ишIуагъэкIэ къэгъэлъэгъоным купкIэу хэлъыр кIэлэцIыкIухэм нахьышIоу къагурэIо. «Дышъэ IункIыбзэжъыер», «Зиусхьанэу Блэгъожъыр», нэмыкI спектаклэхэу театрэм щагъэуцугъэхэр жъы хъухэрэп.

Адыгэ Республикэм и Къэралыгъо филармоние ихудожественнэ пащэу Адыиф Туренко IэнатIэу зыIутым емылъытыгъэу спектаклэхэм яплъы. Ипшъашъэ къэгъэлъэгъоныр къызаухыкIэ филармонием зэрэчIэкIыжьыщтым дэгуIэрэп, артистхэм гущыIэгъу афэхъуныр шIогъэшIэгъон.

— Сшыпхъу икIалэхэри сигъусэхэу къэгъэлъэгъонхэм тяплъы, — къеIуатэ Адыиф. — Театрэм зыIэпищагъэх, сэнэхьатэу къыхахыщтым тегупшысэ.

КIэлэцIыкIухэм сыд фэдэ сэнэхьат къыхахыщтми, искусствэр шIукIэ къятэжьыщт, цIыфышIу зэрэхъущтхэм тицыхьэ телъэу зичэзыу къэгъэлъэгъонхэм тяжэ.

ЕмтIылъ Нурбый.