ЖъоныгъуакIэм и 25-м онлайн шIыкIэм тетэу лъэпкъ проектэу «Культура» зыфиIорэм къыдыхэлъытагъэу Урысые Федерацием и Къэралыгъо совет музей-къэгъэлъэгъон IофшIэным хэхъоныгъэ ышIыным фэгъэзэгъэ купэу щылажьэрэм зэхэсыгъо иIагъ. Шъолъырхэм ялIыкIохэу хэлэжьагъэхэм (пстэумкIи 18) япрактикэ IофшIэн анахь дэгъухэр ыкIи карантин Iофтхьабзэхэр зауххэкIэ проектыкIэхэм япредложениехэр къахьыгъэх.

Адыгэ Республикэм культурэмкIэ и Министерствэ къызэритыгъэмкIэ, музей-къэгъэлъон IофшIэнымкIэ Лъэпкъ музеим ипроектитIу анахь дэгъухэм ахалъытагъ. Ахэр: къэгъэлъэгъонхэу «Адыги — рыцари, воины, всадники» ыкIи «Мир женщины в интерьерах исторической памяти» зыфиIохэрэр. Iофтхьабзэу «Культурнэ кIэныр зэлъашIэнымкIэ УФ-м исубъектхэм арыт федеральнэ ыкIи шъолъыр музейхэм къэгъэлъэгъон проектхэр ащызэхэщэгъэнхэр» зыфиIорэм къыдыхэ­лъытагъэу мы къэгъэлъэгъонитIур Лъэпкъ музеим ыгъэхьазырыгъ.

Апэрэ проектым адыгэ хъулъфыгъэм илъэпкъ нэшанэхэр къыреIотыкIых: зэолIэу, шыоу, зэмыблэжьэу зэрэщытыгъэр. Мыщ игъусэх зыфэдэ къэмыхъугъэ экспонатхэу лIэшIэгъу чыжьэхэм агъэфедэщтыгъэхэр: Iашэ зэфэшъхьафхэр, шым рахьылIэрэ пкъыгъохэр.

ЯтIонэрэ проектым музеим ифонд щыщ пкъыгъо 450-рэ хэхьагъ. Ащ къыхеубытэх: IэрышI IофшIагъэхэу ижъырэ дышъэ хэдыкIыныр, бзылъфыгъэ шъуашэр, хъызмэтым щагъэфедэрэ пкъыгъохэр, дышъэ хьап-щыпхэр. Адыгэ бзылъфыгъэм инэшанэ ижъырэ лъэхъаным къыщегъэжьагъэу я XIX-рэ лIэшIэгъум икIэух нэс зэхэугуфыкIыгъэу проектым къыриIотыкIыгъ. Къэгъэ­лъэгъоныр тIоу зэтеутыгъагъ: археологиер ыкIи этнографиер.

Зэхэсыгъом икIэух зэрэщырахъухьагъэмкIэ, музейхэм яIоф­шIэн IэпыIэгъу зэрэфэхъущтхэ предложениеу къахьыгъэхэр, джащ фэдэу музей IофшIэнымкIэ анахь дэгъоу къыхагъэщыгъэ­хэр Урысыем культурэмкIэ и Министерствэ, музейхэм я Союз, шъолъырхэм арагъэхьыщтых.

Iэшъынэ Сусан.